(Maks pen Talǵatqa – Bostandyq!)

(Jerdiń júzin jalmap kelgen úsh alyp,

Kúdigim bar,

«Kete me dep joǵalyp»...)

Jer Ana da shaldyǵypty naýqasqa,

Júregimdeı,

Oıpy-toıpy

Qozǵalyp...

Turǵandaı-aý,

Barsha álem jutalyp,

Bas salardaı bir-birine ot alyp.

Joq emes-aý,

Qorqynyshtyń bary ras

«Soǵys órti kete me – dep, – tutanyp?».

Ótkergende,

Bastan talaı zulmatty,

Sabaq alar

Basta eshteńe qalmapty.

Sary súrgin, qý qyrǵynǵa ushyrap,

Talaı ulttar ózin-ózi jalmapty.

Qaq jaryldyq,

Baı,

Kedeıge bólinip,

Kele jatyr,

Áı, birdeńe kórinip...

Oılamaı ma,

El rızyǵyn jegender

«Qalar-aý – dep, – týyrlyǵym tilinip?»

Tastaıaqtaı qaǵystyrǵan qazaqty,

Ne istersiń bul,

Imany joq kázzapty?!

«Eldi qorǵaý,

Jerdi qorǵaý – Qylmys!» dep,

Sottap otyr

Jer qorǵaǵan qazaqty!

Ult namysy –

Maks penen Talǵatty,

«Qylmysker» – dep opasyzdar,

Tańdapty.

Isataı men Mahambettiń –

Ór rýhyn

Muqym qazaq ekeýinen ańdapty.

(Osy bolar –

Ar-Namysyń sottalǵan!

Kórer jaryq,

Bolashaǵyń otalǵan...)

Namysyńdy jyrtyp,

Sodan sottalǵan:

Máńgi baqı –

Maks penen Talǵattyń

Mahambet pen Isataıdaı jattalyp –

Esimderi,

El esinde saqtalǵan!

Qýanysh MUQTAI

28.11.16 jyl