Keshe Parlament palatalarynyń birlesken otyrysy bolyp, onda depýtattar Qazaqstan Respýblıkasy Táýelsizdiginiń 25 jyldyǵyna arnalǵan Deklarasıa qabyldady.

Birlesken otyrysty ashqan Májilis Tóraǵasy Nurlan Nyǵmatýlın Parlament palatalary tóraǵalarynyń atyna bir top depýtattan Táýelsizdiktiń 25 jyldyǵyna arnalǵan Deklarasıa qabyldaý týraly Úndeý joldaǵanyn aıtty. Osyǵan oraı birlesken otyrystyń kún tártibine Dek­larasıa qabyldaý týraly bir-aq másele en­gi­ziledi, dedi Tóraǵa. Osydan ári kún tártibi bekitilip, birlesken otyrys óz jumy­syn Memlekettik Ánuranmen bastady.

Odan ári Májilis Tóraǵasy Qazaqstan Respýblıkasy Táýelsizdiginiń 25 jyldyǵy Deklarasıasy óte mańyzdy tarıhı kezeńge arnalǵan qujat ekenin aıta kelip: «Osy ýaqyttyń ishinde, barlyq jetistikter men tabystar, eń aldymen Tuńǵysh Prezıdentimiz – Elbasy Nursultan Ábishuly Nazarbaevtyń eren eńbeginiń jemisi. Sonymen birge, árqashanda Prezıdentimizge qoldaý kórsetip, tirek bolyp kele jatqan halqymyzdyń bereke-birliginiń nátıjesi. Sondyqtan, Parlamentte osy tarıhı qujatty qarastyrý – ol kele jatqan Táýelsizdik mereıtoıynyń erekshe mańyzdylyǵyn kórsetedi», – dedi.

Osydan keıin Tóraǵa Deklarasıa mátinin jarıalaý úshin sózdi Májilis depýtaty Qýanysh Sultanovqa berdi. Qazaqstan Respýblıkasynyń Parlamenti Qazaqstan Táýelsizdigin halqymyzdyń asa zor qundylyǵy retinde baǵalaı otyryp, Táýelsiz Qazaqstandy qurý jáne qalyptastyrýda eren eńbek sińirgen Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaevtyń strategıalyq baǵytyna berik ustanymyn tanyta otyryp, «Qazaqstan-2050» Strategıasynyń basty maqsatyna jetýdi bolashaq urpaq aldyndaǵy óziniń tarıhı paryzy jáne jaýapkershiligi dep sezine otyryp, «Máńgilik El» qasterli mekeninde jarqyn keleshegimizdi jasaýǵa umtyla otyryp, Qazaqstan Respýblıkasy Táýelsizdiginiń jıyrma bes jyldyǵy Deklarasıasyn qabyldaıdy, dep bastady sózin Qýanysh Sultanuly.

Odan ári Deklarasıa mátini bylaı jalǵasty: Táýelsizdiktiń 25 jyldyq mereıtoıy – óz tarıhynda tuńǵysh ret zamanaýı memleket qurǵan Qazaqstan halqynyń aýqymdy tarıhı jetistikteriniń jarqyn kórinisi. Qazaqstan úshin Táýelsizdiktiń 25 jyly ilgerileý men ornyqty damýdyń kezeńi boldy. Táýelsiz Qazaqstan óziniń jańa tarıhymen tabysty memleket jáne búkil Ortalyq Azıa óńiriniń kóshbasshysy atanýǵa quqyǵy bar ekendigin dáleldedi.

Óz Táýelsizdiginiń 25 jylynda Qazaq­stan ekonomıkasy qarqyndy damyǵan, ta­bys­qa jetýdiń biregeı tájirıbesi bar saıa­sı tu­raqty memleket retinde qalyptasty. Biz­­diń elimizde ekonomıkalyq, saıası jáne áleý­­mettik salalarda asa iri ózgerister júzege asty.

Táýelsiz Qazaqstannyń barlyq jetis­tik­teri men jeńisteri Qazaqstan Respýblı­kasynyń Tuńǵysh Prezıdenti – Elbasy Nursultan Ábishuly Nazarbaevtyń tegeý­rindi jáne dana basshylyǵymen árbir qazaq­standyqtyń tabandy da tynymsyz eń­beginiń arqasynda múmkin boldy. Prezı­dent N.Nazarbaevtyń saıası erik-jigeri jáne strategıalyq kóregendigi damýdyń qazaq­standyq úlgisiniń tabysty bolýyn aıqyndap, Qazaqstannyń ornyqty ósip-órkendeý jolyna shyǵýyna múmkindik týdyrdy.

Elimiz «Qazaqstan-2050» Strategıasyn dáıekti túrde júzege asyra otyryp, álemniń ozyq 30 eliniń qataryna qosylýǵa qaryshty qadam basýda. Memleket basshysynyń baıypty jáne jemisti halyqaralyq bastamalarymen elimiz bıik halyqaralyq bedelge ıe bolyp, ǵalamdyq ıadrolyq qarýsyzdaný qozǵalysynyń tanymal kóshbasshysyna aınaldy.

Odan ári Deklarasıada Qazaqstannyń ótken jolyna sholý jasaldy. 1991 jyly 16 jeltoqsanda Parlament «Qazaqstan Respýblıkasynyń Memlekettik táýelsizdigi týraly» Konstıtýsıalyq zańdy qabyldady dedi Q.Sultanov. Táýelsiz Qazaqstannyń bul tuńǵysh qujaty halqymyzdyń qýatty jáne pármendi memleket qurý armanynyń júzege asýyn aıǵaqtady. Zań Qazaqstan egemendiginiń onyń ulan-ǵaıyr aýmaǵynda jáne álemniń saıası kartasynda myzǵymastyǵyn máńgilikke bekitip berdi. Elimizdiń basty qujaty – Qazaqstan Respýblıkasy Konstıtýsıasyn 1995 jylǵy 30 tamyzdaǵy referendýmda búkil Qazaqstan halqy biraýyzdan qabyldady.

Konstıtýsıa egemendiktiń saıası jáne quqyqtyq negizderin bekitip, adamnyń ómirin, quqyqtary men bostandyǵyn, tegine, áleýmettik jaǵdaıyna, násiline, ultyna, tiline, dinge qatystylyǵyna qaramastan, adam men azamat quqyqtarynyń teńdigin memlekettiń joǵary qundylyqtary dep jarıalady.

Táýelsiz Qazaqstannyń Konstıtýsıasy memleket pen qoǵamnyń turaqtylyǵy men órkendeýiniń myzǵymas negizine aınaldy. Qazaqstanda tıimdi demokratıalyq ınstıtýttar – prezıdenttik ınstıtýt, Parlament, sot júıesi jáne belsendi azamattyq qoǵam qalyptasty.

Elimizde jahandyq syn-qaterlerge tótep berýge jáne búkil qoǵamnyń múddeleriniń júzege asýyn qamtamasyz etýge qabiletti memlekettik qurylymnyń tıimdi júıesin qurýǵa múmkindik bergen tarıhı mańyzdy ekonomıkalyq jáne saıası reformalar júrgizildi.

Táýelsizdiktiń alǵashqy kúnderinen bastap elimizdiń saıasaty uzaq merzimge negizdeldi, qazaqstandyqtardyń ál-aýqaty, ómirdiń joǵary sapasyna júıeli de maq­satty umtylysy onyń basty ustanym­dary boldy jáne solaı bolyp qala beredi.

Qazaqstan álemniń básekege eń qabi­letti 50 eliniń qataryna endi, deı kelip Dek­lara­sıa odan ári Qazaqstannyń álem­niń eń joǵary damyǵan 30 eliniń qata­ry­na ki­rýdi maqsat etip qoıǵan «Qazaq­stan-2050» Strategıasy jańa sıpattaǵy stra­­te­gıalyq qujatty qabyldaǵanyn aıtty.

Memleket basshysynyń «100 naqty qadam: barshaǵa arnalǵan qazirgi zamanǵy memleket» Ult jospary álemdik qarjy júıesindegi asa jaǵymsyz qubylystarǵa qaramastan, elimizde óndiris pen ınovasıany, áleýmettik salany damytýǵa jáne jumys oryndaryn ashýǵa múmkindik beredi.

Qazaqstan ıadrolyq qaýipsizdik reı­tın­ginde eń qaýipsiz elderdiń qataryna kiredi. Prezıdent N.Á. Nazarbaev Qazaqstandy elimizdiń ulttyq múddelerine nuqsan keltirmesten ıadrolyq qarýsyz memleketke aınaldyrý jónindegi tarıhı mańyzdy mindetti sheshe bildi. 1991 jylǵy 29 tamyzda Elbasy Semeı ıadrolyq polıgonyn japty. Qazaqstan Prezıdenti óz eliniń ǵana emes, sondaı-aq, búkil adamzattyń taǵdyry úshin ózine jaýapkershilik ala otyryp, álemdik deńgeıdegi saıasatker retinde tanyldy.

Semeı polıgonynyń jabylýymen ıadrolyq qarýdy taratpaýdyń jáne qarýsyzdanýdyń jahandyq prosesiniń jańa kezeńi bastaldy. Qazaqstannyń bastamasy boıynsha BUU 29 tamyzdy «Iad­rolyq synaqtarǵa qarsy is-qımyldyń halyqaralyq kúni» dep jarıalady.

Qazaqstan ıadrolyq qarýdy taratpaý rejimin nyǵaıtý jónindegi naqty usy­nystaryn alǵa tartyp, Iadrolyq qarýsyz álemniń jalpyǵa ortaq deklarasıasyn qabyldaýdy usyndy.

Odan ári Qazaqstannyń álemdik dıp­lo­matıadaǵy tabysty qadamdary aıtyldy. Táýelsizdiktiń 25 jylynda qazaq­standyq dıplomatıa álem elderiniń ba­sym bóligimen senimdi dostyq jáne ynty­maqtastyq qarym-qatynastar ornatyp, ha­lyqaralyq uıymdardyń qyzmetine belsendi túrde aralasyp keledi, delingen Deklarasıada.

Bizdiń elimiz álemdik qoǵamdastyqta ornyn nyq aıqyndap, laıyqty qurmet pen bedelge ıe bolyp otyr. Álemde aýmaǵy jóninen toǵyzynshy oryn alatyn Qazaqstan Respýblıkasynyń shek­arasyn delımıtasıalaý men demarkasıa­laý Prezıdent N.Nazarbaevtyń tarıhı jetistikteri bolyp tabylady.

Qazaqstan óńirlik jáne jahandyq prosesterdiń belsendi qatysýshysy bola otyryp, halyqaralyq qaýipsizdikti nyǵaı­týǵa qomaqty úles qosýda. «Eýropaǵa jol» memlekettik baǵdarlamasyn jú­zege asyrý Qazaqstannyń Eýropanyń jetek­­shi memleketterimen áriptestik pen ynty­­maq­­tastyqtyń barynsha joǵary deń­geıi­ne shyǵýyna jol ashty. Qazaqstan yn­ty­maqtastyqtyń eýrazıalyq kópirine aınaldy.

Bizdiń elimiz EAEO, SHYU, AÓSSHK sekildi ıntegrasıalyq jobalardyń bas­tamashysy jáne ilgeriletýshisi bolyp taby­lady. Qazaqstan EQYU, IYU, EAEO, SHYU, TMD, UQSHU, AÓSSHK jáne Túrki keńe­si sıaqty iri halyqaralyq uıymdarda ta­bys­ty tóraǵalyq etýdiń tájirıbesine ıe.

Táýelsizdiginiń 25 jyldyǵy qar­sa­ńynda Qazaqstan Ortalyq Azıa elde­riniń arasynda alǵashqy bolyp 2017-2018 jyl­darǵa BUU Qaýipsizdik Keńesiniń turaqty emes múshesi bolyp saılandy.

Halyqaralyq qoǵamdastyq Qazaq­stannyń halyqaralyq qatynastardy damytýdaǵy úlesin laıyqty baǵalaı otyryp, bizdiń elimizge EKSPO-2017 ha­lyqaralyq mamandandyrylǵan kórmesin ótkizýdi senip tapsyrdy.

Táýelsizdik jyldarynda Qazaq­stan­nyń Qarýly Kúshteri elimizdiń senimdi qalqanyna aınaldy. Prezıdent – Jo­ǵarǵy Bas qolbasshy N.Á.Nazarbaev Qazaqstan Respýblıkasynyń táýel­siz­digin, aýmaqtyq tutastyǵyn, onyń she­k­ara­synyń myzǵymastyǵyn, halqy­myz­dyń beıbit jáne tynysh ómirin senim­di qorǵaýǵa qabiletti Qarýly Kúshter­di túbegeıli reformalaýdy, áskerı qýaty men áleýetin arttyrýdy qamtamasyz etti.

Táýelsizdiktiń 25 jylynda Qa­zaq­standa joǵary ekonomıkalyq kórset­kishterge qol jetkizildi. Memleket bas­shysy N.Á.Nazarbaev Qazaqstan halqyn dáıekti túrde eń joǵary álemdik kór­setkishterge jetýge baǵyttap keledi.

«Qazaqstan-2050» Strategıasy, «Nur­ly jol» jańa ekonomıkalyq saıasaty, «100 naqty qadam» Ult jospary – álem­niń eń damyǵan memleketteriniń qatary­na kirýge qabiletti Qazaqstannyń qýatyn nyǵaıtýǵa baǵyttalǵan josparlar. Biz­diń básekeles bolatyn biregeı ba­symdyq­tarymyz – Qazaqstannyń mol tabıǵı baı­lyǵy, aýylsharýashylyq, kom­mý­nı­­kasıalyq jáne tranzıttik áleýeti elimizdiń ekonomıkalyq jetistik­teriniń negizine aınaldy.

Búginde Qazaqstan – jekemenshik ınstıtýty ornyqqan, orta tap belsendi damıtyn, al kásipkerlik ekonomıkalyq órkendeýdiń qozǵaýshy kúshi bolyp tabylatyn turaqty naryqtyq ekonomıkasy bar el.

Elbasynyń strategıalyq kóregendigi arqasynda Qazaqstanda jahandyq qarjylyq-ekonomıkalyq daǵdarystarǵa qaramastan, el ekonomıkasyn jańǵyrtý tabysty júzege asyrylyp jatyr.

Qazaqstan ındýstrıalyq qýatyn nyǵaıtý men ınovasıany damytýdy nyq kózdep otyr.

Aýqymdy qurylymdyq reformalar barysynda múlde jańa joǵary tehnologıaly salalar: munaı-hımıa, avtomobıl ónerkásibi, temir jol, mashına jasaý, IT-tehnologıalar, ǵaryshtyq spýtnıkter óndirisi salalary quryldy.

Elbasynyń bastamasy boıynsha ár azamattyń ómir súrý deńgeıin art­ty­rýǵa baǵyttalǵan «Bıznestiń jol kar­tasy-2020», «Agrobıznes-2020», «Ju­­mys­pen qamtý-2020» baǵdarlamalary júze­ge asyrylyp jatyr. Táýelsizdiktiń mereı­li 25 jylynda Qazaqstan Álemdik banktiń Doing Business reıtıńinde 35-oryn aldy.

Elimizde jańa ekonomıkalyq umty­lys­ty qamtamasyz etýge múmkindik bere­tin «Nurly jol» baǵdarlamasy, «Ba­­tys Eý­ropa – Batys Qytaı» halyq­ara­lyq kólik dálizi, Transkaspıı halyq­­ara­lyq kólik marshrýty sekildi birqa­tar stra­tegıalyq mańyzdy ınfraqu­ry­lymdyq jobalar júzege asyrylyp otyr.

Osydan ári Deklarasıada Pre­zı­dent­tiń elordany qurýdaǵy róli týraly baıandalǵan. Jańa elordamyz Astanany qurý­daǵy aıryqsha ról elimizdiń Tuńǵysh Pre­zıdenti N.Á.Nazarbaevqa tıesili. Asta­na Qazaqstan Táýelsizdiginiń saltanat qurýyn pash etip, halqymyzdyń maqta­nyshyna aınaldy.

Astana qurylysy jańa memlekettiń, jańa qoǵamnyń qurylysy retinde kıeli mánge ıe boldy. Astana ótkenniń barlyq qundylyqtaryn jınaqtap, bolashaqtyń jarqyn kelbetin elestetti.

Búginde Astana – óz kúshine senimdi, jańa Qazaqstannyń búkil álemge áleýetin tanytqan iri iskerlik ortalyq. Astana samıtter men basqa da mańyzdy ha­lyqaralyq kezdesýlerdi ótkizetin iri ortalyqqa aınaldy, elimizdiń basqa qala­lary úshin damýdyń úlgisi boldy.

Astananyń ózinde 2017 jyly «Bo­la­shaqtyń energıasy» ınovasıalyq kún tár­­tibimen EKSPO-2017 halyqaralyq ma­man­dandyrylǵan kórmesi ótetin bolady.

Qazaqstan konfesıaaralyq jáne etnosaralyq tatýlyq pen kelisim ústemdik qurǵan memleket damýynyń búkil álemde tanylǵan jańa biregeı modelin qurdy. Memleket basshysy Qazaqstan halqy birligin nyǵaıtýdyń konstıtýsıalyq már­tebesi bar aıryqsha ınstıtýty – Qazaqstan halqy Assambleıasyn qurdy.

Álemdik dinderdiń, tilderdiń, máde­nıetter men dástúrlerdiń toǵysyndaǵy tarıhı aralasýy Qazaqstanda beıbitshilik pen kelisim áleýmettiń adamgershilik jáne ádep normasyna, ortaq mádenıetimizdiń ajyramas bóligine aınalǵan qoǵamnyń aıryqsha úlgisin qalyptastyrdy.

Ol kópetnostyq pen kópkonfes­sıa­lylyqty Qazaqstannyń strategıalyq res­ýrsyna jáne artyqshylyǵyna aınaldyra otyryp, rýhanılyq pen azamattyqtyń quryshtaı quımasyn meılinshe bekemdeı tústi. N.Nazarbaevtyń beıbitshilik pen qoǵamdyq kelisim modeli qoǵamnyń úı­le­simdi damýynyń álemdik etalonyna aınal­dy.

«Máńgilik El» qundylyqtary Táýel­­sizdik jetistikterin, Qazaqstan halqy­nyń múddeler ortaqtastyǵy men tarıhı taǵdyryn kórneki beınelep berdi. «Máń­­gilik Eldiń» jeti qundylyǵy qazaq­stan­dyqtardyń Táýelsizdikti nyǵaı­týǵa, erkin de órkendegen elde ómir súrý­ge um­ty­lysyn – ortaq maqsatyn, ortaq múd­deleri men ortaq bolashaǵyn biriktirdi.

Qazaqstan halqy qabyldaǵan «Máń­gilik El» Patrıottyq aktisi qýatty ju­myl­­dyrýshy bastaýǵa, qoǵamdyq keli­sim­di nyǵaıtýdyń ózegine, búkil qoǵam­nyń múddeleri men umtylysyn birtutas turǵyda bekemdeý quralyna aınaldy.

Basty baǵdary Jalpyǵa Ortaq Eńbek Qoǵamy qundylyqtary bolyp tabylatyn áleýmettik turaqtylyq qoǵamy quryldy. Qazaqstan táýelsizdigin alǵan sátten bas­tap Prezıdent N.Á.Nazarbaev halyq aldyna áleýmettik baǵdarly naryqtyq ekonomıkasy bar qýatty egemen memleket qurý mindetin qoıdy.

Áleýmettik jańǵyrtý áleýmettik progrestiń ekonomıkalyq erkindikteri men ıdealdaryn úılestikpen óristetip, qoǵam men árbir adamnyń ál-aýqatynyń artýy úshin jaǵdaı jasady, qarqyndy damıtyn eńbek naryǵyn qurýǵa múmkindik berdi.

25 jylda bala týý deńgeıi 60 paıyzǵa ósti. Qazaqstan analar úshin qolaıly elder reıtıńinde jyl saıyn joǵary kóterilip keledi. Biz qazaqstandyqtardyń ómir súrý jasyn uzartýǵa qol jetkizdik.

Eńbek adamynyń múddeleri – bizdiń memleketimizdiń basty nazarynda. Mem­leket qazaqstandyqtardyń oqýy men kási­bı daǵdylaryn únemi jetildirip otyrýy úshin jaǵdaı jasaıdy, erkin eńbekke jáne laıyqty eńbekaqy alýǵa múddeli árbir azamattyń konstıtýsıalyq quqyqtaryn qamtamasyz etý úshin óndirister, ınfra­qurylymdar jáne basqa da nysandar qurylysyn júrgizedi.

Bilim berý salasyn keshendi reformalaý Qazaqstannyń álemdik bilim berý keńistiginde laıyqty oryn alýyna jaǵdaı jasady. Otandyq bilim berý júıesi men ǵylymdy jetildirý memlekettik saıasattyń strategıalyq basymdyqtarynyń biri jáne eldi áleýmettik-ekonomıkalyq jań­ǵyr­týdyń sheshýshi tetigi bolyp tabyla­dy. Qazaqstan eresek adamdardyń saýat­tylyǵy deńgeıi boıynsha Adam damýy ındeksi álemdik tizimniń alǵashqy úshten birine kiredi. Qazaqstan zıatker ultty qalyptastyrý úshin dáıekti túrde jaǵdaı jasaı otyryp, adam damýynyń deńgeıi joǵary elder tobynan nyq oryn aldy.

Prezıdent bastamasynyń arqasynda elde erekshe sıpatty «Bolashaq» baǵdar­lamasy udaıy júzege asyrylýda,
«Na­zarbaev Ýnıversıtet», zıatkerlik mek­tep­terdiń keń taraǵan jelisi quryldy.

Elimizdiń kóptegen joǵary oqý oryndarynda ýnıversıtettik bilim berý deńgeıi kóterilip keledi. Barlyq óńirlerde myńnan astam zamanaýı mektepter salyndy.

Ult densaýlyǵy, densaýlyq saqtaý salasyn damytý jáne salamatty ómir saltyn qalyptastyrý ekonomıkalyq jáne áleýmettik damýdyń mańyzdy faktorlaryna aınaldy. Otandyq densaýlyq saqtaý salasy álemdik standarttar deńgeıine kóterildi: zamanaýı medısına or­ta­lyqtary, aýrýhanalar men emhanalar salyndy, elimizdiń barlyq óńir­lerinde zertteýler men joǵary tehno­logıaly operasıalardyń búkil spek­tri júzege asyrylýda. Qazaqstan eýrazıa­lyq keńistikte medısınalyq týrızm­niń ortalyǵyna aınalyp keledi. Halyq den­saý­lyǵy kórsetkishterinde BUU Dúnıe­júzilik densaýlyq saqtaý uıymy moıyn­daǵan aıtarlyqtaı oń ózgeristerge qol jetkizildi.

Qarjy resýrstarymen jáne joǵa­ry shyǵarmashylyq qaıtarymmen nyǵaı­tyla túsken mádenıet salasy qýatty damý serpinine ıe boldy. Prezıdent N.Á.Nazarbaevtyń bastamasy boıynsha iske asyrylǵan «Mádenı mura» baǵdar­lamasy otandyq mádenıetti saqtaý men damytý jónindegi keń aýqymdy ju­mystardyń bastamasy bolyp tabyldy.

Qoja Ahmet Iasaýı kesenesi, «Tań­baly» arheologıalyq kesheni sıaqty bi­re­geı otandyq eskertkishterdiń, son­daı-aq, «Saryarqa – Soltústik Qazaq­stan­nyń dalalary men kólderi» tabıǵı mura ny­sandarynyń IýNESKO-nyń Búkil­álemdik mádenı muralary tizimine enýi álem­dik mańyzy bar oqıǵa bolyp tabylady.

Táýelsizdik jyldarynda sport pen salamatty ómir salty salasynda tama­sha nátıjelerge qol jetkizildi. Sport­shylarymyzdyń asa iri halyqaralyq jarystardaǵy tabystary qýatty jáne birlikshil sportshy ult ómir súretin Qazaq­stannyń jańa beınesin jasady. Bú­ginde Qazaqstan sporty eń jaqsy da­myǵan álemdegi 30 eldiń qataryna kiredi.

Deklarasıanyń tujyrymynda bir­qatar usynystar jasalǵan. Atap aıt­qanda: Táýelsizdiktiń Uly joly máńgi bolýy tıis! – deı kelip: elordada «Táýelsiz Qazaqstan» monýmentin turǵy­zý qajet ekendigi aıtylǵan.

El Konstıtýsıasynda Tuńǵysh Pre­zıdent – Elbasy Nursultan Ábishuly Nazarbaevtyń bizdiń memleketimizdi qurý­daǵy biregeı úlesin atap ótýdi, Elbasynyń esimin elordanyń ataýynda jáne eli­mizdiń basqa da mańyzdy nysandaryn­da kórsetýdi usynamyz. Bizdiń tutas maq­satymyz – Elbasy tóńiregine toptasyp, eń qymbat qazynamyz – táýelsiz Qazaqstandy kózimizdiń qarashyǵyndaı saqtap jáne urpaqtarymyzǵa amanattap, «Máńgilik El» qundylyqtaryn qasterleý.

Táýelsizdik bizdiń eń basty uıys­tyrýshy qundylyǵymyz bolǵan, qazir de solaı jáne bola da bermek, dep Qýanysh Sultanov Deklarasıanyń mátinin tolyq aıaqtady.

Deklarasıa jobasynyń mátini oqy­lyp bolǵan soń Parlament palata­larynyń birlesken otyrysy ony bir­aýyzdan qa­byl­dady. Deklarasıa qabyl­danǵannan keıin bir top depýtat onyń máni men ma­ńy­zy týraly ózderiniń oılaryn ortaǵa saldy.

Alǵashqy sóz Senat depýtaty Muh­tar Altynbaevqa berildi. Qazaqstan Res­pýb­lıkasy Táýelsizdiginiń 25 jyldyq mereıtoıy jylynda biz elimizde oryn alǵan tarıhı máni tereń kóptegen oqı­ǵalardyń kýási bolyp, olardyń tikeleı qatysýshysy bolǵanymyzdy aıqyn sezinemiz jáne ony árdaıym maqtan tutamyz, dep bastady ol óziniń sózin.

Tarıh qoınaýyna kóz júgirtsek, osydan az ǵana ýaqyt buryn jaǵdaı múldem basqasha edi. Áli esimizde, bizdiń alǵashqy sheteldik saparlarymyzda Qazaqstannyń álem kartasynda qaı jerde ornalasqanyn uzaq túsindirýmen qatar, onyń ornalasqan jerin táptishtep kórsetýge týra keletin. Muny biz Qazaqstannyń 25 jyl ishinde júrip ótken jolynyń qanshalyqty aýqymdy bolǵanyn túsiný úshin árdaıym eskerip otyrýymyz kerek. Shırek ǵasyr ishinde biz alys jáne jaqyn shet eldermen dostyq qarym-qatynas pen ózara tıimdi yntymaqtastyq qurdyq.

Odan ári sheshen qabyldanǵan qu­jat­tyń mańyzyna oıysty. Deklarasıada Memleket basshysynyń táýelsizdigimizdi ornatý men nyǵaıtýdaǵy, memleket­tiligimizdi qalyptastyrýdaǵy negiz qa­laý­shy róli aıqyn kórsetilgen, deı kelip Qazaqstannyń aldaǵy 2017-2018 jyl­dary BUU Qaýipsizdik Keńesiniń tu­raq­ty emes músheligine saılanýy shyn má­ninde tarıhı oqıǵa. Bul eli­mizdiń álemdik qaýymdastyqtaǵy ornyn nyǵaı­typ, Elbasynyń zor halyq­aralyq be­delin pash etti, dedi. Sóziniń qo­rytyn­dysynda M.Altynbaev Dek­larasıany qoldaıtynyn jetkizdi.

Sóz kezegin alǵan Májilis depýtaty Nurtaı Sabılánov jańa tarıhtyń bastaýy bolyp, Alash armandaǵan Azattyqtyń aq tańy atqan kúnge shırek ǵasyr toldy, dedi óziniń sózinde. Talaı qıyn-qystaý kezeńderdi bastan keshirgen ultymyz úshin táýelsizdik – asyl qazynamyz. Tutas bir halyqtyń taǵdyry synalar sheshýshi sátte Tuńǵysh Prezıdentimiz Nursultan Ábishuly Nazarbaev el tizginin qolyna alyp, Táýelsizdiktiń týyn tigip, tar jolda kidirmeı, taıǵaqta súrinbeı jol bastady. Osylaı degen sheshen, odan ári qıyn-qystaý jyldarǵa sholý jasap ótti. Táýelsizdiktiń alǵashqy jyldary elge ońaı bolǵan joq. Kópultty eldiń ishin daýǵa, syrtyn jaýǵa aldyr­maýdyń aýyr syny aldymyzda turdy. El múddesin basty murat etken, Elba­symyz Nursultan Ábishuly Nazarbaev­tyń eńbeginiń arqasynda jarqyraı kelgen jas memleket alǵa qadam basty, dedi ol.

Odan ári sheshen táýelsizdik jyldarynda memleket búdjeti 1100 esege, ishki jalpy ónim kólemi 1500 esege artty. Jalaqy jyldar saıyn eselenip, 2 mıllıonǵa jýyq jańa jumys orny ashylyp, ınfraqurylymdar qalpyna kel­tirilip, damyp, el ıgiligine jarady. Osynyń barlyǵy qarjylyq daǵ­­darys­tarǵa tótep berip, ekonomıka­myzdy damytyp, memleketimizdi bıik beles­terge jetkizgen Elbasynyń tereń oılaı­tyn, bolashaqty dáldikpen boljaı­tyn kóre­gendigi arqasynda júzege asty. Qa­zaqtyń namysyn tý etken Jel­toq­san jastaryn da Elbasy aqtady, qor­ǵady, qoldady, batyr ul men qy­zyn pash etti. «Erlik pen eldiktiń, qaı­sar­lyq­tyń nyshany» dep baǵasyn berdi, deı kelip, Deklarasıada usynylǵan As­tana qalasynda «Táýelsiz Qazaqstan» monýmentin ornatý, Memleketi­mizdiń Konstıtýsıasynda Tuńǵysh Prezı­den­timizdiń biregeı úlesin kórsetý, Elbasy esimin elordamyz ben basqa da mańyzdy nysandarǵa berý arqyly aıshyqtaý ıdeıa­laryn qoldaıtynyn jetkizdi.

Kezek ózine kelgende Senat depýtaty Serik Aqylbaı 25 jyldyqtyń bar­lyq jetistikteri Elbasymyz Nursultan Ábishuly Nazarbaevtyń esimimen ty­­­ǵyz baılanysty dep bastady óziniń sózin. Beıbitshilik, kelisim, qoǵam bir­ligi, ekonomıkalyq jáne áleýmettik tu­raq­­tylyq, halyqaralyq qaýymdastyq­tyń tanýy – osynyń barlyǵy biz, qazaq­stan­dyqtar maqtan tutatyn jetistikter. Eli­miz Táýelsizdiktiń 25 jyl­dyǵyn bola­sha­ǵymyzdyń naqty baǵdaryn sezine oty­ryp qarsy alýda. Elbasymyzdyń bas­shylyǵymen Qazaqstan damýynda keń aýqymdy ekonomıkalyq, saıası jáne áleý­mettik reformalar júzege asyryldy. Bar­lyq aýyrtpalyqtar men sát­siz­dikter­ge qaramastan, elimizde áleýmettik-ekono­mıkalyq qurylys sátti ótti. Mu­nyń negizin­de eń aldymen elimizdegi kópultty halqymyzdyń birligi jatyr.

Odan ári Deklarasıa týraly sheshen sózin: «Memleket damýynyń negizgi kezeńderin jáne qalyptasýyn qamtıtyn saltanatty saıası-zańdy qujat bolyp taby­lady. Onda zamandastarǵa jáne bola­shaq urpaqqa táýelsizdikti, onyń bazalyq qundylyqtaryn, bostandyqty, birlikti, turaqtylyq pen órkendeýdi saqtaýǵa jáne nyǵaıtýǵa úndeý qamtyldy, dep jalǵastyryp: «Memleket basshysy – Tuńǵysh Prezı­dentimizdiń tarıhı mısıasyn tıisin­she taný bizdiń moraldyq jáne saıası boryshymyz bolyp tabylady», dep qorytty.

Jaryssózde sóz alǵan Májilistegi Ha­lyq­aralyq ister, qorǵanys jáne qaýip­sizdik komıtetiniń múshesi Vladıslav Kosarev Memleket basshysynyń shırek ǵasyr ishindegi Qazaqstannyń damýyna qosqan sheksiz úlesterine toqtalyp ótti. Ásirese, ol syrtqy saıasattaǵy kóregendik pen kóshbasshylyq qasıettiń bir kórinisi bolyp keletin san salaly kelissózder jasaýdaǵy Elbasynyń eren eńbegine basymdyq berdi. Mine, osyndaı tabandylyq pen qajyr-qaırattyń arqasynda iske asyrylǵan esil eńbek eshqashanda eskerýsiz qalmaýy tıis, degen Vladıslav Borısovıch, Keńes Odaǵy ydyrap, 1991 jylǵy Táýelsizdiktiń alǵashqy aılaryndaǵy ańǵal-sańǵal kúıimiz kóz aldynda ekendigin eske aldy.

Meniń áli de kóz aldymda, jurt jap­paı mazasyz kúıge túsip, halyq sharýashylyǵyndaǵy etene baılanys­tar búlingen shaqta bizdiń elimizge bárin de nólden bastap, aıaqtan turýǵa týra keldi. Solaı boldy da. Endi, mine, baıtaq daladaǵy búgingi Qazaqstan Eýrazıa qurlyǵynyń qaq tórinde gaýhar tastaı jarqyraıdy. Ota­ny­myzdyń osynshalyqty deńgeıge jetip, jaǵ­daıymyzdyń jaqsarýynda Memleket basshysy Nursultan Ábish­uly­nyń eń­begi ushan-teńiz. Bul bizdiń tarı­­hy­myzdyń ajyramas bóligi ári aqıqı shyn­dyǵy. Sondyqtan da, Táýelsiz Qazaqstan­nyń qalyptasý kezeńi men damý jolyn­daǵy Prezıdentimizdiń eren eńbegi memle­ketimizdiń Kons­tı­týsıasynda kórinis berýi tıis. Bul týraly búgin talqylanyp jatqan Dek­larasıada egjeı-tegjeıli baıandalǵan, dedi depýtat.

V.Kosarev sodan keıingi sózin Nursultan Ábishulynyń barlyq qazaqstandyqtardyń jalpyulttyq qundylyqtardy saqtaý men dáripteýdi qoǵamdyq deńgeıge kóterip, beıbit tirshilikke negizdelgen ómir súrý ıdeıasy otandastarymyzdyń maqsatty ustanymdaryna aınalǵanymen sabaqtap, izgilikke úndeıtin Elba­sy­myz óz oıyna el azamattaryn jumyl­dyra bilgendigin atap kórsetti.

Al BUU Qaýipsizdik Keńesiniń tańdaýy elimizdiń mereıli jylymen tuspa-tus kelýi Qazaqstannyń álemdik saıasat sah­na­synda bedeli artqanynyń taǵy bir dáleli ekeni aıqyn. Endigi jerde Qazaqstan mundaı mártebeli uıym aıasynda ózin jasampaz el retinde kórsetip, álem halqy kóksegen ómirlik qundylyqtardy qorǵap, qýattaıdy dep aıtýǵa bolady. Bul sózimizdi bizdiń eldiń jú­rip ótken joly, osy kezge deıin Shan­haı yntymaqtastyq uıymy men Eý­ra­zıalyq ekonomıkalyq odaq, EQYU syndy ár túrli halyq­ara­lyq uıymdarǵa tóraǵalyq etken tá­jirı­besi naqtylaı túsedi. Táýelsiz­diktiń alǵashqy kúninen bas­tap eldiń ishki turaqtylyǵy men tynysh­tyǵyn saqtaýda orasan zor jumys­tar atqarylyp keledi. Mine, osy sezim senimge aınalyp, bizdi alǵa jete­leýi qajet, degen Vladıslav Borı­sovıch el Táýelsizdiginiń jıyrma bes jyldyǵyndaǵy Deklarasıa erek­sheligin ekshep aıtty. Osyndaı mańyzdy qujatty qabyldaı otyryp, biz ózimizdiń shırek ǵasyrdaǵy tabystarymyzdy kúlli álemge pash etip, baıandy bolashaǵymyz úshin odan ári talmaı eńbektenýge bel býamyz. Nursultan Ábishuly birde bylaı degen edi: «…bizdiń árbir jeńisimiz – bereke-birligimizdiń aıǵaǵy». Qıyn-qystaý kezeńde birigý aýyrlyqty jeńildetip, jetistikterge jeteleıdi emes pe?! Osyndaı Kóshbasshysy bar halyq kemerine tolyp, áli de damı túsetindigine senimdimin, dep V.Kosarev óz sózin túıindedi.

Parlament Senatynyń depýtaty Aqan Bıjanov óz sózinde Táýelsizdiktiń mán-mańyzyna toqtaldy. Búgingi sát, ıaǵnı el Táýelsizdiginiń 25 jyldyǵy Deklarasıasyn qabyldaý mańyzdy memlekettik merekeler – Táýelsizdik jáne Tuńǵysh Prezıdent kúnderi qarsańynda ótip jatyr. Munda ózara logıkalyq baılanys bar, sebebi, bizdiń elimizdiń jańa tarıhynda bolyp jatqan taǵdyrsheshti áleýmettik-ekonomıkalyq jáne saıası jetistikter el Prezıdentiniń atymen tyǵyz baılanysty, degen senator ata-babamyzdyń ǵasyrlar boıy arman etken egemen memleket qurý jónindegi uly mısıasy Tuńǵysh Prezıdentimiz Nursultan Ábishuly Nazarbaevtyń júrgizgen salmaqty da sarabdal saıasatynyń arqasynda júzege asqanyn aıtyp ótti.

Elbasy Qazaqstan halqynyń ózine artqan zor senimin úlken abyroımen atqaryp shyqty jáne qazir de mısıa­syn tabysty jalǵastyrýda dep óz áriptesterin asa mańyzdy atalmysh qujatty qoldaýǵa jáne qabyldaýǵa shaqyrdy. «Máńgilik El» bolamyz desek, osyndaı Deklarasıanyń óte qajet ekenine kúmánimiz joq bolý kerek. Tuńǵysh Prezıdentimizge, Elba­syna laıyqty baǵa bereıik. Sebebi, bul tarıhı tulǵanyń saıası mısıasy asa mańyzdy, asa erekshe, dedi ol.

Sodan keıin minberge shyqqan Májilistiń Halyqaralyq ister, qorǵanys jáne qaýipsizdik komıtetiniń hatshysy Irına Aronova da 25 jyl ishindegi Memleket basshysynyń zor jaýapkershilikpen atqaryp kelgen qyzmeti joǵary baǵalaýǵa laıyq ekendigine toqtaldy. Búginge deıin bizdiń elimizde 1400 jańa bilim oshaǵy myńdaǵan búl­dir­shinderdi bilim nárimen sýsyn­datyp jatsa, 1300 emdeý-saýyq­tyrý maqsatynda aýrýhana men em­hanalardyń salynýy – bizdiń buryn-sońdy tarıhymyzda bolmaǵan oqıǵa. Osyndaı sý jańa ǵımarattardaǵy sońǵy úlgidegi sandyq tehnologıa­lar halqymyzdyń bilimin ushtap, ultymyzdyń saýlyǵyn shyńdaýda. Sonyń arqasynda el azamattarynyń turmys jaǵdaıy jaqsaryp, ómir súrý jastary 10 jylǵa deıin uzara tústi.

Sonymen qatar, jyl saıynǵy bala týý kórsetkishiniń 400 myńnan asyp túsýi Qazaqstan damýynyń aıqyn kórinisteri. Meniń osy pikirlerimmen, barlyq qazaqstandyqtar kelisedi degen senimdemin. Onyń ústine mem­leketimizdiń qalyptasý kezeńindegi eren eńbegin eskere otyryp, Nur­sultan Ábishulyna qandaı qurmet kórsetsek te jarasymdy. Oǵan bizdiń Konstıtýsıamyz ben zańnamalyq normalarymyz múmkindikter beredi degen oıdamyn, dedi Irına Petrovna.

Táýelsizdik alǵannan keıingi kezderde elimizdiń İJÓ-si jyl ótken saıyn turaqty túrde ósip otyrdy. Ony biz mynadaı statısıkalyq kór­setkishterden baıqaımyz. Máselen, 1993 jyly İJÓ-niń jan basyna shaq­qandaǵy kórsetkishi 696 AQSH dollaryna teń bolsa, ótken jyldyń sońyndaǵy bul deńgeı 10,5 myń AQSH dollaryn quraǵan. Osyndaı jetis­tikterdi sóz etken Senat depýtaty Olga Perepechına oraıy kelgende eldiń ekonomıkalyq áleýetin aıtyp, jahan­dyq básekege qabilettiliktiń jaı-kúıin baıandady. Búgingi tańda Qazaqstan básekege qabilettilik turǵysynan 53-orynǵa jaıǵasqan. Sondaı-aq, 31,2 mlrd AQSH dollaryna teń rezervtik qorymen bizdiń el memleketterdiń halyqaralyq deńgeıiniń reıtıńinde kósh ilgeri shyǵyp, damýshy elderdiń alǵy shebinen kórindi. Al búgingi tańda Ulttyq qordaǵy qarajatymyz 62 mlrd dollardy qurasa, 2020 jylǵa qaraı bul mejeni 90 mlrd-qa jetkizýdi josparlap otyrmyz. Son­dyqtan biz Parlament depýtaty retin­de memleketimizdiń qalyptasý jolyn­daǵy Ult Kóshbasshysy Nursultan Nazarbaevtyń eren eńbegine tarıhı baǵasyn adal bergenimiz jón bolar dep sanaımyn, dedi baıandamashy.

Odan soń sóz kezegi Senat depýtaty Eleýsin Saǵyndyqovqa berildi. Depýtat bul Deklarasıa dańǵyl jolǵa bet burǵan, syn-qaterge shep qurǵan egemen elimiz úshin erekshe mańyzdy saıası qujat ekendigin atap ótti. Onyń túpki mazmuny – «Máńgilik Eldiń» órleý, órkendeý, órkenıettený joldary. Asyl babalarymyzdyń muraty – «Máńgilik El» ósıetin Ult Kóshbasshysy Nursultan Ábishuly Nazarbaev ǵasyrlar toǵysynda jalpyulttyq ıdeıaǵa ulastyrdy. Ony júzege asyrý jáne onyń myzǵy­mas irgetasyn qalaýǵa qatysý – bar­sha­myzdyń qasıetti boryshymyz, bolashaq aldyndaǵy mereıli minde­timiz, dedi Eleýsin Saǵyndyqov.

Budan ári Deklarasıany qoldaǵan qyzý pikirdi Májilis depýtaty Azat Perýashev jalǵastyrdy. Táýelsizdigimizdiń shırek ǵasyr­lyq merekesi qarsańynda, Qazaqstan Parlamenti arnaıy deklarasıa qabyldap otyr. Árıne, tarıh ólshe­mimen alǵanda, bul qas-qaǵym sát. Bi­raq osy ýaqyt ishinde, Elbasy – Qa­zaq­stannyń Tuńǵysh Prezıdenti Nursultan Ábishuly Nazarbaevtyń basshylyǵymen halqymyz osynaý tańǵajaıyp tolaıym tabystarǵa qol jetkizip, búkil álemniń nazaryn aýdaryp otyr. Qazaq halqynyń azattyǵy úshin kúresken Alash arys­tary aıtqanyndaı, «memlekettigi joq halyq – jetim halyq». Elimizdiń san ǵasyrlar boıǵy úmitin, qoljetpesteı saǵymdy armany – tek 25 jyl buryn ǵana Táýelsiz Qazaqstannyń Tuńǵysh Prezıdentiniń bastaýymen shynaıy ómirge aınaldy. Sanaýly ýaqyt ishinde «elimiz egemen memleket retinde qalyptasty» dep maqtanyshpen aıta alamyz. Endigi tilegimiz Elbasynyń strategıalyq baǵytyn baǵdar etken táýelsizdigimizdiń tuǵyry máńgilik bolǵaı! – dedi Azat Perýashev. Sondaı-aq, ol búginde táýelsizdigimiz tarıhı synaqtardan súrinbeı, tar jol, taıǵaq keshýlerden abyroımen aman ótkenin, qaıta «myń ólip, myń tirilgen» elimiz túrli qater men tosqaýyldardan shyń­dalyp, búginde naǵyz qýatty, bedeldi memleketke aınalǵanyn atap ótti.

Bul bizdiń Ult Kóshbasshysy – Tuńǵysh Prezı­den­timiz Nursultan Nazarbaevtyń qaısarlyǵynyń, eren erliginiń, mıl­lıondaǵan qazaq­standyqtardyń qajyrly eńbeginiń nátıjesinde múmkin boldy. Shırek ǵasyrda Nursultan Nazarbaevtyń batyl ári tereń refor­malarynyń arqasynda elimizdiń barlyq salasyna taǵdyrsheshti ózgerister enip, memleketimiz ómirge qaıta keldi. Naqtysynda, jańa qoǵam paıda bolyp, dúnıede jańa bir memleket quryldy, dedi Azat Perýashev.

Sondaı-aq, ol Deklarasıadaǵy usy­nystar Konstıtýsıamyzdaǵy Tuń­ǵysh Prezıdentimizdiń Qazaqstan mem­le­ketin qurýshy ári negizin qalaýshy dep belgilengen orynyn zańdy negizde odan ári bekemdeı túsetinin jetkizdi.

Táýelsizdigimizdiń tól perzentiniń biri jekemenshik kásiporyndar bolyp tabylady. Alǵashqy kúnderden bastap Memleket basshysy jeke kásipkerlikti naryqtyq ekonomıkadaǵy negizgi faktor retinde álpeshtep, qoldap-qorǵap keledi. Munyń bir dáleli, Táýelsizdik alǵan soń birden 1992 jyly 4 shilde «Jeke kásipkerlikti qoldaý týraly» zań qabyldandy. Al 25 jyldan keıin, ıaǵnı bıylǵy jyly jeke bıznestiń mol múmkindikteriniń keńeıtilgen Kásipkerlik kodeks kúshine endi. Mundaı kásibı zań TMD aýmaǵynda esh elde joq ekendigin aıta alamyn, dedi depýtat.

Depýtat, sonymen qatar, sońǵy 10 jylda shaǵyn jáne orta kásip­kerlikpen aınalysatyndar qatary eki esege kóbeıgenin, búginde 3 mıllıon­nan astam adam shaǵyn jáne orta bıznes salasynda jumys isteıti­nin mysalǵa keltirdi. Sondaı-aq, Qa­zaqstan búginde halyqaralyq reıtıń­tegi bıznes-ahýaly boıynsha ustanym­daryn kúsheıte túsýde de jaqsy nátı­jelerge qol jet­ki­zip júr. Qazirgi kúni elimizde júz­degen jańa kásiporyn qurylyp, bu­ryn-sońdy bolmaǵan ónim túrleri shyǵarylýda. Burynǵy shıkizat óńdeýmen shektelgen elimiz qazirgi kúni taýar óńdeý ónerkásibine nyq qadam basty. Eldiń kólik-logıstıka áleýe­ti, aýyl sharýashylyǵy jáne ınfra­qu­ry­lym salasyndaǵy jobalary da jedel damyp keledi. Halyqaralyq sarap­shy­lardyń baǵalaýynsha, búginde biz burynǵy Keńes Odaǵy elderiniń ishindegi ekonomıkasy áldeqaıda kósh il­geri damyǵan el bolyp otyrmyz. Al eldiń búginge deıin jetken árbir je­tis­tiginiń artynda Tuńǵysh Prezıden­ti­mizdiń tolassyz, ólsheýsiz eńbeginiń úlesi tur, dedi.

Biz barlyǵymyz – búgingi zamanaýı qazaq memleketiniń qurylýynyń kýási, tikeleı qatysýshysy jáne atsalysýshylary ekendigimizdi maqtan tutamyz. Qazaqstan bıznes-qaýymdastyǵy atynan, «Aq jol» demokratıalyq fraksıasy atynan Táýelsiz Qazaqstannyń Tuńǵysh Prezıdenti Nursultan Ábishuly Nazarbaevty jáne barsha otandastarymyzdy kele jatqan merekesimen quttyqtaımyn jáne de barshańyzdy usynǵan Deklarasıany qoldaýǵa shaqyramyn, dep sózin aıaqtady Azat Perýashev.

Sonymen qatar, Májilis depýtaty Baqytgúl Hamenova da Elbasynyń eren eńbegi jaıynda qoldaý pikirin bildirip, áńgimesin tereńnen órbitti. Kúltegin babamyzdyń «Halqyna – begi, begine – halqy sengen el uzaq jasaıdy» degenindeı, táýelsizdikti basty muraty etken halqymyzdyń 25 jyldyq tarıhyn Elbasynsyz elestetý múmkin emes, dedi depýtat.

Ultty uly muratqa uıystyrǵan Elbasynyń eńbegin baǵalaı bilý – árbirimizdiń mindetimiz! Búgini men erteńimizge Elbasynyń tarıhı bolmysy keńinen nasıhattalýy kerek! Bul baǵyttaǵy is-sharalardyń biri retinde elimizdiń mańyzdy, aýqymdy nysandary Elbasy esimimen atalsa, bul – halyqtyń birtýar perzentine degen sheksiz syı-qurmetiniń kórinisi bolmaq, dedi B.Hamenova.

Osyndaı jaryssózderden soń qujat daýysqa salyndy. Nátıjesinde, Senattyń – 46, Májilistiń 105 depýtaty Deklarasıany jaqtap daýys berdi.

«Sonymen, Qazaqstan Res­pýb­lıkasy Táýelsizdiginiń 25 jyldyǵy Deklarasıasy qabyldandy. Bul – elimiz úshin, sonyń ishinde, Par­lament úshin erekshe oryn alatyn mańyzdy qujat, mańyzdy sheshim. Osy qabyldanǵan Deklarasıa bizdiń tarıhymyz jáne bolashaq urpaǵymyzǵa qaldyratyn muramyz, dedi Májilis Tóraǵasy Nurlan Nyǵmatýlın qo­rytyndy sózinde.

Jaqsybaı Samrat,

Dınara Bitikova,

Nurlybek DOSYBAI,

«Egemen Qazaqstan»