Jasyratyny joq, qazir «ekinshi áıel bolǵym keledi» deıtin qyzdar óte kóp. Alǵashynda túsinbeıtinmin, «nege ózderińdi ekinshi sortqa jatqyzasyńdar» dep, sóıtsem kóp jaǵdaıda ekinshi áıeldiń kóp jaýapkershiligi joq bolady eken, eri kóp bala tap dep te mazalamaıdy eken. Esesine, qymbat syılyqtar kóp syılanady eken. Oǵan jan jaǵymdaǵy ekinshi áıel bolyp júrgen qyzdardyń ómiri kýá.
Men de toqaldyqqa qarsy edim. Biraq qazir ómirde keıbir nárselerdi ýaqyttyń suranysyna qaraı ózgertýge bolady dep sanaımyn. Máselen qazir qoǵamymyzda jasy 27-28 den asqan qyzdar óte kóp. Turmys qurǵysy kelmeıdi emes, keledi tek shańyraq kótereıik dep senimdi túrde aıta alatyndary joq. Meniń de jasym bıyl 31-ge keldi. Turmysqa shyqqym keledi.
Áıtse de turmysqa shyǵa qoıarlyqtaı jigit joq. Jasyń 27-den asqan soń turmysqa shyqshy dep bireýdiń usynys aıta qoımaıtynyna kóziń de jete bastaıdy eken. Býhgaltermin. Turaqty eki jumys ornym bar. Qosymsha keıbir usaq kompanıalardyń esep-qısabyn júrgizip berip aqsha da tabamyn. Bir bólmeli jataqhanam bar. Materıaldyq turǵyda táýelsizbiz dep aıta alamyn. Biraq sol otyzdan assam da jalǵyz júrgenim janyma batady. Byltyrdan beri jumysta jasy 46-daǵy birge jumys isteıtin qyzmettes, otbasyly jigitpen aralasyp turamyn. Alǵashynda jaı qyzyǵýshylyqpen tıiskenmen, sol jasyma deıin qyz bolyp júrgenime súısindi aý deımin, aramyz sodan beri úzilgen emes. Ol týraly ózime de aıtqan. Biraq bir shańyraq astyna turatyndaı áńgime aıtpaıdy. Shyny kerek, bireýdiń shańyraǵyn buzǵyzyp, ózime qosatyn oıym joq. Biraq aralasatyn qurbylarymnyń otbasyn kórip, jaqyn jýyqty kórip sońǵy kezderi ekinshi áıel bolsań da otbasyn bolýdyń qajet ekenin, áıel adam úshin mańyzdylyǵyn sezinip júrmin. Ózim «meni toqal qylyp al» dep aıtýǵa namystanamyn. Biraq shyny kerek, búgingi istep júrgenim toqaldyń qyzmeti ekenin bilemin. Aldynan táttilep tamaǵyn daıyndap qoıamyn, arasynda kıim satyp áperemin. Balaly bolǵym keledi. Bala ózim úshin týǵym keledi. Ony aıtyp túsindirdim de, «eshqandaı aqsha talap etpeımin, ózim baǵyp qaǵamyn» dep aldyn ala aıttym. Jasyryp keregi ne, ózi de gúlin alyp kelip turady, ara tura syılyq ta jasaıdy. Alaıda toqal retinde qabyldaǵysy joq.
Osyndaıda oılaımyn, toqal alýǵa nege ruqsat etpeske, eń bolmasa balama ákesiniń tegin alyp bere alar edim, ózim týystarymnyń aldynda joldasym dep te tanystyra alar edim. Toqal alýǵa ruqsat berý talaı janbaı qalǵan shyraqtyń janýyna sebep bolar edi. Shańyraqtardyń sebepsiz buzylýynyń aldyn alar edi. Sondyqtan toqal alýǵa ruqsat bersek, qoǵamdaǵy bir máseleniń sheshilgeni bolar edi.
Osyndaıda aıta keter jaıt qurbym da bireýdiń toqaly. Jaqynda álgi er adam kólik alyp berdi. Estýimshe óz áıeli áli kólikke otyrmaǵan kórinedi. Óz áıelinen buryn toqalyna kólik syılaýynan-aq onyń kimdi artyǵyraq jaqsy kóretini kórinip tur. Shynyn aıtaıyq qazir toqaly joq, er adam qoǵamymyzda kemde kem. Tek zańdy túrde ruqsattyń joqtyǵy olardy qınaıtyn sıaqty. Sondyqtan toqal alýdy zańdastyrsaq durys bolar edi.
Laýra, Qaskeleń qalasy
