Astana áýejaıyndamyn. Namaz oqýǵa arnalǵan bólmeni jaýyp tastaǵaly namazdy ýaqytynda oqý ýaıym boldy. Ary-beri qarap yńǵaıly oryn tappaǵan soń buryshtaǵy baspaldaqtyń shatyrǵa shyǵatyn tusyna baryp, jaınamazdy jaıyp, sonda oqydym. Dárethanada bir sheteldik aıaǵyn jýyp jatyr. Ondaǵy jurt onyń bul áreketin túsine almaı, jaqtyrmaǵan keıip tanytýda. Namazyn áı shaıǵa qaramaı bos orynǵa baryp oqı saldy. Keshe Hanshatyr saýda úıindegi namazhananyń esiginde qara qulyp turǵanyn kórgenimin. Bul ne sonda? Táýelsizdigimizdiń 25 jyldyǵyna arnalǵan tartýy ma? Joq, keńes kezeńine keri keldik pe? Joq álde ekstrımızmmen kúrestiń túri me? Álemniń kez-kelgen áýejaıynda (Amerıka, Evropany da qosyńyz) namaz oqýǵa arnaıy oryn bólingen. İshinde dáret alýǵa barsha jaǵdaı jasalǵan.
Jaraıdy, namaz oqıtyn el azamattarymyzdy eskermeı, quqyqtaryn taptaı bersin! Biraq biz órkenıetti elmiz. Áne-mine 30 eldiń qataryna qosylamyz dep urandatyp jatyrmyz. Álemniń barlyq elderimen tyǵyz qarym qatynastamyz. Islam ynymaqtastyq uıymyna tóraǵalyq ettik. Elbasy umrasy men qajylyǵyn ótep qaıty. Jurt bizdi musylman eli dep biledi. Sóıte tura kelgen sheteldikterdiń aıaqtaryn qoǵamdyq dárethanada jýdyryp, namazdaryn aıaq asty bolatyn jerde oqytyp qoıǵanymyz qalaı?
Namaz oqıtyn adam áıteýir bir jolyn taýyp, Alla mindettegen paryzyn oqıdy. Biraq qaı jerde? Beıbereketsizdikke óz qolymyzben ıtermelemeı, óz elimizdiń qadirin túsirmeı namazhana ashýǵa ne kedergi?! Ashýǵa emes, bar namazhanany jabýǵa ne sebep? Ekstremızmnen saqtaný ma? Namazhananyń buryshyna "bul jerde ýaǵyz aıtýǵa bolmaıdy" desek, jetkilikti emes pe? Kimmen sóılessem, barlyǵy bıliktiń bul sheshimine narazy. Musylmandardy bılikke narazy kóńilge ıtermeleıtin mundaı isterge kim jaýapty? Joq álde "Kápir bılik" deıtin takfırılerge óz qolymyzben dálel daıyndap berip jatyrmyz ba? Olaı bolsa, tákfırılermen kúresip, bosqa shabylyp qaıtemiz?!
Ótkende mınıstr Nurlan Ermekbaev myrzamen kezdeskenimde, osy jaǵdaıdy jetkizgenmin. Feısbýkte jekke akkaýntyn ashyp, qoǵamnyń pikirin tyńdaımyn degen soń, taǵy da jamaǵattyń únin jetkizip otyrmyn.
