Qazaqstandyq akter, shoýmen ári ánshi Ánýar Nurpeıisov "Qazaqstan arýy" ulttyq konkýrsynyń fınalyndaǵy áreketin túsindirdi, - dep habarlaıdy  tengrinews.kz

Aıta keteıik, tikeleı efırde Nurpeıisov qatysýshy qyzdardy kitap oqymaıtynyn aıtyp, uıaltqan edi.

"Men tabıǵı sulýlyqtyń bolǵanyn qalaımyn. Shynymdy aıtaıyn - men qazylar alqasyna kirgim kelmegen edi, uıymdastyrýshylardan meni shyǵaryp tastaýyn suradym, biraq olar men asa qatty qurmetteıtin bir adam arqyly shyǵyp, ótinish bildirdi. Bireý arqyly ótinish aıtqandy unata bermeımin. Ótken jyly konkýrstyń qalaı ótetinin kórdim. Bul jolǵy sulýlyq baıqaýyna sońǵy ret qatysý úshin barymdy jasadym. Qazylar alqasynyń múshesi retinde múmkindigimdi paıdalanyp, pikirimdi aıttym. Biraq, ókinishke qaraı, sońyna deıin aıta almadym, mıkrofondy tartyp aldy", - dedi Nurpeıisov. Ol osy sózinen keıin zaldan shyǵyp ketipti.

Onyń aıtýynsha, qatysýshy qyzǵa kitap jaıly taǵy da suraq qoıýǵa ótken jylǵy konkýrs sebep bolypty. Sol ýaqytta Álıa Mergenbaeva kitap oqymaıtynyn moıyndaǵan edi.

"Ótken jyly túńilgenim sonshalyqty, kitap jaıly suraq qoıýǵa bel býdym. Eger qyz jaqsy jaýap berse, úndemeı qalamyn dep oıladym. Al eger dym da bilmeıtin bolyp shyqsa, osylaı málimdeme jasaımyn dep oıladym. Sebebi bul dıagnoz. Bizde sulýlyq kúlti bar, biraq bilim men densaýlyq kúlti joq. Ókinishke qaraı, bizdiń trend sondaı, ádemi bolyp, turmysqa shyǵý, bala bosaný jáne bireýdiń asyraýynda otyrý. Al eger turmysqa shyǵýdy jazbasa, toqal bola salý", - deıdi akter. 

"Men qarapaıym suraq qoıdym ǵoı, qyz ne úshin renjıdi? Men tek suraq qoıdym. Meniń aıtqan sózderimnen keıin elimizde eń bolmaǵanda bir qyz kitap oqı bastasa, bul sózim oryndy boldy degen sóz jáne bul telearnanyń bir mınýtyn osy maqsatta jumsaýǵa laıyq bolǵany. Qyzdarǵa jasandy sulýlyqqa júgirýdiń qajet emes ekenin burynnan aıtqym keletin. 20 jyldan keıin sizder sulý bolmaı qalasyzdar. Basqa dúnıege qyzyǵý kerek", - dedi Nurpeıisov.

Al "Qazaqstannyń birinshi vıse-arýy" ataǵyn jeńip alǵan "Astana arýy" Elnaz Nurseıitova konkýrstaǵy nátıjege kóńili tolatynyn aıtady. "25 qyzdyń ishinde kóbi tıtýl ala almady, sondyqtan birinshi oryn alǵanyma qýanyshtymyn, qandaı da bolsyn jeńis qoı", - dedi Nurseıitova.

Arý bilim tekserý konkýrsynda nelikten durys jaýap bere almaǵanyn túsindirdi. "Menińshe, jaqsy jaýap berdim, biraq bir sátte sasyp qaldym. Men eshkimge renjigen joqpyn. Sebebi ol (Ánýar Nurpeıisov - Avt.) árdaıym kitap jaıly suraq qoıady, bulaı bolatynyn bildim. Ánýar Nurpeıisovtiń odan keıin aıtqany maǵan ǵana emes, barlyq qatysýshyǵa qatysty. Biraq keıbireýler onyń bul sózi maǵan ǵana aıtyldy dep oılap, jaman pikirler jazyp jatyr, ózine sol kerek degendeı", - deıdi qyz. "Jalpy alǵanda ol durys aıtty, biraq bul konkýrsta aıtqany durys emes dep oılaımyn. Sebebi bul zıatkerlik konkýrs emes, sulýlyq baıqaýy", - dedi ol.

Onyń aıtýynsha, qyz qazirgi ádebıetti oqıdy. "Qazirgi ýaqytta "Shantaram" kitabyn oqyp jatyrmyn, "Do vstrechı s toboı", "Eslı ıa ostanýs" "Pesn", "Garrı Potterdiń" barlyq bóligin oqyǵanmyn. Maǵan qazirgi ádebı týyndylar unaıdy, orys tiline aýdarylǵan aǵylshyn kitaptary da unaıdy", - dedi qyz. Qazaq klasıkteriniń ishinen ol Ábdijámil Nurpeıisovtiń "Qan men ter" romanyn, Muhtar Áýezovtiń "Abaı joly" romanyn jáne Sultanmahmut Toraıǵyrovtyń "Qamar sulý" romanyn oqyǵanyn aıtty.

"Onyń halyqtyń aldynda batyr, al meniń dym oqymaıtyn qyz bolyp kóringenim ádiletsizdik. Ata-anamnyń aldynda da uıat! Olar meni eldiń aldynda masqara bolsyn dep tárbıelegen joq qoı. Meniń anam muǵalim, sondyqtan bala kezden kitap oqyp óstik. Ánýar Nurpeıisov meni masqaralap qana qoımaı, ata-anam men týystarymdy da ókpeletkenin túsinbeıdi! Ony qoıshy, mıllıondaǵan qazaq qyzyna aýyr sóz aıtyldy", - dedi Elnaz Nurseıitova.

"Astana arýy-2016" jáne "Qazaqstannyń birinshi vıse-arýy" 18 jastaǵy Elnar Nurseıitova Qazaq tehnologıa jáne bıznes ýnıversıtetiniń stýdenti, beıneleý ónerimen, mýzykamen aınalysady, armrestlıng, basketbol, voleıbolmen aınalysady.