Shavkat Mırzıóev qaıda týdy?

Shavkat Mıromonuly Mırzıóev 1957 jyly 24 shildede týylǵan.

Ózbekstan Prezıdenti qaıda týylǵany jaıly eki nusqa bar: biri – Ózbekstannyń Jızak oblysynyń Zaamın aýdanynda týylǵan; ekinshisi – Mırzıóev ol jaqqa 60-jyldary qonys aýdarǵan, al týǵan jeri Tájikstandaǵy Ýra-Túbın oblysynyń Iahtan aýyly.

Shavhat Mırzıóev tájik bolýy múmkin be?

Bulaı bolýy ekitalaı, óıtkeni ol týylǵan Iahtan aýyly turǵyndarynyń basym kópshiligi etnıkalyq ózbekter. Biraq bul oqıǵanyń taǵy bir nusqasy bar: Mırzıeevtyń ata-babasy Machıdan (Tájikstannyń soltústigindegi aımaq) «mır» (basqarýshy) degen ataqty rýdan taraǵan. Sondyqtan olardyń esimderi «Mır» sózinen bastalady, ıaǵnı ataqty, qadirli, bilimdi adamdar. Shavkattyń babasy oqymysty, dáýletti adam bolǵan. Býhar medresesinde bilim alǵan, 1920 jyly Qyzyl Ásker Býhardy jaýlap alǵanǵa deıin bılegen Býhar emıratynyń sońǵy ámiri Álim hannyń senimdi serigi bolǵan.

Shavkat Mırzıóev qaıda oqydy?

Mektep bitirgen soń, Shavkat Mırzıóev Tashkent aýyl sharýashylyǵyn sýlandyrý men mehanızasıasy ınstıtýtyna oqýǵa «ınjener-mehanık» mamandyǵy boıynsha túsip, 1981 jyly tamamdaıdy. Oqý bitire salysymen, bitirgen ýnıversıtetinde jumys isteýge qalady. Ol onda 11 jyl boıy qyzmet atqarady. 1981-1992 jyldary kishi ǵylymı qyzmetker, komsomoldyq uıymnyń hatshysy, odan keıin osy ınstıtýtta partıa uıymdastyrýshysy men 1992 jyly prorektory laýazymyna deıin kóterilgen. Dál osy ýnıversıtette tehnıka ǵylymdarynyń kandıdaty dárejesin alady. 1990 jyly Ózbekstandaǵy Joǵarǵy Keńestiń depýtaty bolyp saılandy, 1994 jyly memlekettiń jańa parlamenti saılanady. (Olıı Majlıs).  Prorektorlyq qyzmetten keıin Tashkenttegi Kýıbyshev aýdanynyń ákimi, 1974-1991 jyly sýlandyrý júıesi mekemeleri men kásiporyndarynda, 1992-1996 jyldary Tashkent qalasynyń Mırzo-Ýlýgbek aýdanynyń, al 1996-2001 jyly Jızak oblysynyń, 2001-2003 jyldary Samarqan oblysynyń ákimi boldy. 2003 jyly 11 jeltoqsanynda Olıı Májilis Ózbekstannyń Premer-mınıstri etip, Ýtkır Sýltanov qyzmetinen ketkennen keıin Islam Karımovtyń usynysymen taǵaıyndaldy. 2005 jyly da ornynan túspegen ol aýyl sharýashylyǵy men aımaqtyń damýyna jetekshilik etip, qatar alyp júrdi.

Shavkat Mırzıóevtiń otbasy qandaı?

Shavkat Mırzıóev – Mıromon Mırzıóev degen dárigerdiń uly. Ol áıeli týberkýlezben qaıtys bolǵannan keıin, ómirin osy aýrýmen kúresýge arnaǵan. Balalyq shaǵynda ógeı anasynyń qolynda tárbıelengen. Olardyń qarym-qatynasy jaıly da eki nusqa bar: biri – ógeı anasy ony úlken mahabbatpen tárbıeledi, sondyqtan ol anasyn ógeı dep ataǵandardy jaqtyrmady; ekinshisi – kishkentaı qatesi úshin ol Shavkatty sýsyz, nansyz qaldyrdy, saldarynan  aǵasynyń úıine kóshýge májbúr boldy. 2010 jyly ógeı anasy tiri jáne Shavkatpen arlasyp turady dep aıtylyp júrdi. BAQ ókilderiniń aıtýynsha, Shavkat Mırzıóevtiń eki týǵan ápkesi jáne ákesiniń ekinshi nekesinen týylǵan aǵasy men ápkesi bar. Shavkat Mırzıóevtiń áıeliniń aty Zıroathon Hoshımova. Derek kózderi boıynsha, ol Ferǵana oblysyndaǵy Kokandta týylǵan. Ol kóp jyldar boıy kúıeýiniń tasasynda júrse de, kúıeýiniń tegin almaǵan eken.

Reseımen qarym-qatynasy:

Shavkat Mırzıóev proreseılik saıasatker sanalady. Onyń ústine ol ataqty reseılik mıllıarder Alısher Ýsmanovtyń týysqany. Mırzıóev Máskeýge jaqyndasý saıasatyn ustanatyn bolady dep kútilýde.

Qazaqstanmen qarym-qatynasy

Qazaqstan Prezıdenti Nursultan Nazarbaev Ózbekstan Respýblıkasynyń saılanǵan prezıdenti Shavkat Mırzıóevpen telefon arqyly sóılesti, dep habarlady Qazaqstan Respýblıkasy Prezıdentiniń baspasóz qyzmeti.

Nursultan Nazarbaev Sh.Mırzıóevti prezıdent saılaýyndaǵy jeńisimen quttyqtap, saılaýaldy baǵdarlamasyn iske asyrý barysynda oǵan tabys jáne memlekettik qyzmette jańa jetistikter tiledi. Memleket basshylary Qazaqstan men Ózbekstan yntymaqtastyǵynyń basymdyǵy bar baǵyttary boıynsha ekijaqty qarym-qatynasty odan ári jandandyrýdyń mańyz dylyǵyn atap ótti. Prezıdentter halyqaralyq kún tártibiniń jáne óńirlik qaýipsizdikti nyǵaıtýdyń máseleleri jóninde pikir almasty. Sońynda Nursultan Nazarbaev Shavkat Mırzıóevti Qazaqstanǵa memlekettik saparmen kelýge shaqyrdy.

Shavkat  Mırzıóevtiń  saılaýaldy baǵdarlamalary

2030 jylǵa deıin Ózbekstandaǵy jalpy ishki ónimdi eki esege arttyrý;  Mırzıóevtiń sózinshe qazirdiń ózinde segiz arnaıy baǵdarlamalar  qabyldandy jáne olar hımıa ónerkásibi, túrli-tústi jáne sırek metaldardy óndirý, kómirsýtek shıkizaty, tekstıl, bylǵary aıaq-kıim, farmasevtıkalyq ónerkásip, jemis-kókónis ónimderi jáne qurylys materıaldaryna baǵyttalyp otyr.

Sonymen qatar, onyń sózinshe jergilikti shıkizatqa baǵyttalǵan tekstıl ónerkásibiniń  aldaǵy damý baǵdarlamasy aıaqtaldy. Endigi kezekte 2 mıllıard 300 mıllıon dollardy quraıtyn  140 ınvestısıalyq jobalardy iske asyrý josparlanyp otyr. Nátıjesinde tekstıl ónimderi úsh esege deıin ósedi dep kútilýde.

Ol sonymen qosa farmasevtıkalyq ónerkásiptiń  jedel  damýy jaıly baǵdarlamasy bar ekenin aıtty. Aıtýynsha, 67 aýmaqtyq jobalardyń júzege asyrylýy jańa 162 dárilik preparatty óndirýge jáne dárilik zattardy shyǵarýǵa 2,5 ese ulǵaıtýǵa múmkindik beredi.

Karımovtan keıin ózgergen 9 nárse (Shavkat Mırzıóev Ózbekstannyń ýaqytsha basshysy bolǵandaǵy ózgerister)

1. Ózbekstannyń turǵyndary memlekettiń Prezıdentine tikeleı narazylyqtary men usynystaryn aıta alady. Gov.uz úkimet portalynda vırtýaldy qabyldaý ashyldy. Onyń nátıjeleri Facebook-ta Mırzıóevtiń paraqshasynda jarıalanady.
2. Ózbekstannyń eńbek mınıstrligi Halyqaralyq eńbek uıymynyń maqtany zorlyqpen tergizý jónindegi tyıym salýdy bekitýin atap ótti. «Senim telefony» paıda boldy, «aq altyndy» jınaýǵa zorlyqpen qatysatyndar osy telefonǵa júginse bolady.
3. 2012 jyly bılikten alastatylǵan Abdýlla Arıpovty Kabmınge qaıta oraldy. Sondaı-aq, vıse-premer Rýstam Azımovtyń ókilettigi kúsheıtildi. Jızaktyń ákimi Asror Kobılovty qyzmetinen bosatty, ornyna burynǵy Tashkent ákimi Abdýkahhar Týhtaev keldi.
4. Bas qalanyń aımaqtarynda tirkelý úshin ruqsat alýǵa bolatyn týystardyń qataryn azaıtty. Endi tek jaqyn týystary: joldastary, kámelettik jasqa tolmaǵan nemese kámelettik jasqa tolǵan, óziniń otbasy joqtar pasportyna shtamp qoıdyrta alady.
5. Mırzıóevtiń bılikke kelýi qýǵynǵa ushyraǵan bedeldi krımınalshy Gafýr Rahımovqa oń áser etti. Mırzıóev ataqty ártisterdi – Sheralı Djýraev, Iýldýz Ýsmanova, Obıd Asomovty úlken sahnaǵa qaıtardy. Buǵan deıin olarǵa tyıym salǵan bolatyn.
6. Ýngar Tepa taýyndaǵy shekara boıyndaǵy daýdan Tashkent pen Bishkek arasyndaǵy qarym-qatynas shıelenise tústi. Karımovtyń qazasynan keıin Mırzıóev shyǵystaǵy kórshisine beıbit kelisimge ornatýǵa shaqyrdy. Qyrǵyzstan da kóp sozǵan joq, 1 qazan kúni birinshi vıse-premer Muhammetqaly Abýlǵazıev bastaǵan 130 delegasıa Andıjanǵa is-saparmen bardy.
7. Karımovtyń qaýipsizdigi úshin ózgelerge tyıym salynǵan prezıdenttik jol toraby Tashkenttiń avtomobılshilerine qaıtaryldy. Bul prezıdenttik jol atymen áıgili trassa Temýr Malık kóshesine irgeles jatyr. Qurylysshylar jol jıegine torlar ornatyp, jaıaý ótpe jolyn qalpyna keltirip jatyr.
8. Shavkat Mırzıóev 23 qyrkúıek kúni «ÓzR azamattyǵy jaıly» zańǵa qol qoıdy. Endi sheteldik azamattyqty alǵandar Ózbekstannyń azamattyǵynan aıyrylatyn bolady.
9. Tashkentte qyrkúıek aıynda birden birneshe jol jóndeý jobasy qolǵa alyndy. Bas qalanyń ár aýdandaryndaǵy kvartal ishindegi joldar jóndelip jatyr.

Prezıdent bolyp saılanǵannan keıingi jarlyqtary

Elde 4 jeltoqsanda ótken merziminen burynǵy prezıdent saılaýynda resmı esep boıynsha premer-mınıstr ári prezıdent mindetin ýaqytsha atqarýshy Shavkat Mırzıaevtyń 88,6 paıyz daýys jınap, jeńiske jetkeni habarlanǵan.

Shavkat Mırzıóev saılanǵan kúni keshkisin Halyqaralyq forým saraıynda sóılegen sózinde Islam Karımovtyń Konstıtýsıany qurýdaǵy orny jaıly atap ótti jáne 2016 jyly «Saý ana men bala jyly» bolǵan memlekettik baǵdarlamaǵa esep berdi. 2017 jyldy Prezıdent «halyqpen dıalog jáne adam múddesin qorǵaý jyly» dep engizdi. Sonymen qatar, ol oblys pen qala ákimderin saılaýdy usyndy. Buǵan deıin ákimderdi Prezıdent ózi saılap kelgen bolatyn.

Tashkentte el konstıtýsıasynyń 24 jyldyǵy qurmetine arnap sóz sóılegen Mırzıóev: «halyq saılasa, jergilikti bıliktiń jaýapkershiligi arta túspek. %88 halyq meni tańdady. Mundaı kórsetkish óte sırek bolady. Bul – bizdiń halyq úlken de mańyzdy nárseni kútetinin ańǵartady. Men bul synnan halqymmen aqyldasa otyryp ótýge daıynmyn. Jáne ony oryndaımyn», – dedi.

Shavkat Mırzıóev Ózbekstan Respýblıkasynyń Prezıdenti retinde birinshi bolyp istegen isi – qujatqa mamyrda qaıtys bolǵan Ózbekstannyń halyq aqyny Erkın Vohıdovtyń 80-jyldyq mereıtoıyn toılaýǵa qol qoıdy.

Ózbekstanda týrızmdi damytý úshin damyǵan 15 memleketke vızany alyp tastaý týraly jarlyqqa qol qoıdy. Ol memleketterdiń ishine Avstralıa, Avstrıa, Ulybrıtanıa, Almanıa, Danıa, Ispanıa, Italıa, Kanada, Lúksembýrg, Nıderlandy, Koreı Respýblıkasy, Sıngapýr, Fınlándıa, Shveısarıa jáne Japonıa kiredi. Sondaı-aq, 12 memleketten keletin 55 jastan asqan týrıser jatady. Olar Belgıa, Indonezıa, QHR, Malaızıa, AQSH, Fransıa, Vetnam, Izraıl, Polsha, Vengrıa, Portýgalıa, Chehıa.

6 jeltoqsanda jarıalanǵan týrızmniń damýy men «ataqty memleket jáne saıası qaıratker, Ózbekstan Respýblıkasynyń Birinshi Prezıdenti Islam Abdýǵanıuly Karımovqa» eskertkish ornatýǵa baıqaý jarıalaý jarlyǵyna Shavkat Mırzıóev saılaýǵa deıin qol qoıǵan bolatyn.

Qamshyger: Maral Shaıhy