Jeke kásippen aınalysý, óz betinshe áreket etip, nan tabý kóptiń qaperine kirse de úlken isti bastaýǵa kelgende kópshiliktiń júregi daýalamaı jatady. Desek te mal asyrap, ony kóbeıtip, dáýletin arttyrýǵa bel býǵan qandastarymyz barshylyq.
Máselen Túlkibas aýdanyna qarasty Myńbaı aýylynyń turǵyny «QazAgro» holdıńiniń enshiles kompanıasy bolyp tabylatyn «Aýyl sharýashylyǵyn qarjylaı qoldaý qory» AQ men Islam Damý bankiniń birigip júzege asyryp jatqan shaǵyn nesıeleý baǵdarlamasy aıasynda birinshi bolyp qarjylandyrylypty.
Aıadaı ǵana aýylda tirshilik etip jatqan halyqtyń negizgi tabys kózi aýyl sharýashylyǵy eken. Sonyń ishinde mal sharýashylyǵy. Túlkibas aýdany negizinen mal baǵýǵa óte qolaıly aımaq bolyp sanalady. Shóbi shúıgin, jeri qunarly. Osyny tıimdi paıdalanýdy kózdegen aýyl turǵyny Aıtmuqan Tileýishov «Sátti» dep atalatyn nesıelik baǵdarlama boıynsha 4 jylǵa 2 mln teńge kóleminde nesıe alyp, 11 bas sıyr satyp alypty. Qora-qopsysy men jem-shóbin nesıe almas buryn daıyndap qoısa kerek. Ótinish bergen ýaqyttan bastap nesıe alýshynyń múmkindigin saralaǵan bank qyzmetkerleri aqyrynda ótinishti qanaǵattandyryp, suraǵan aqshasyn berip, tipti sıyrlardy satyp alýǵa da járdemdesipti.
Buǵan deıin jylqy bordaqylaýmen aınalysyp kelgen Aıtmuqan sharýanyń jas ta bolsa maldyń ebin taba biletin isker jigit ekeni kórinip tur. Qora-qopsy da jaýraýyq keletin sıyr maly úshin jyly etip jasalypty, bir sózben aıtqanda talapqa saqadaı saı. Nesıege osylaısha sıyr alǵanyna rıza. Aıtýynsha, jaqsy paıda kóreıin dep tur. 11 sıyrdyń barlyǵy tóldep úlgergen. 11 bas 22-ge kóbeıipti. Nebary jarty jyldyń ishinde buzaýlary et alyp, ósip shyǵa kelgen. Endi biraz ósirgennen keıin bazarǵa shyǵarmaqshy nemese etteı satpaq oıy bar. Osylaısha bir-eki jyldyń ishinde ketken shyǵyndy tolyǵymen aqtap alam deıdi.
Odan qalsa bul sıyrlar kúnine eń kemi 11 lıtr sút beretin kórinedi. 11 sıyr kún saıyn 11 lıtrden sút berse 120 lıtr sút ónimin taıaý mańdaǵy aty Ońtústik óńirge keńinen tanymal bop ketken Qarabulaq aýylynyń bazaryna aparyp kóterme baǵamen satady. Ár lıtrin 60-70 teńgeden. Sonda súttiń ózinen kúnine 7-8 myń, jylyna 2-3 mln teńge taza tabys tabady. Mine esep. Jalpy nesıeni ústemaqysymen qosa eseptegende osy sútti satýdan túsetin paıdamen-aq jaýyp tastaýǵa tolyq múmkindik bar deıdi Aıtmuqan baýyrymyz. Al, buzaýlardan túsetin paıda óz aldyna bólek áńgime. Ol buzaýlar ary ketse bir-eki jylda úlken sıyrǵa aınalyp shyǵa keledi. Osylaısha mal basyn kóbeıtip, artyǵyn satyp, nesıeden de birjola qutylyp, otbasyn tolyq asyraýǵa jaǵdaılary jetetin bolady. Árıne eńbek etsem dep talpynǵan sharýanyń paıdaǵa kenelýine áýeli Qudaı járdemshi, sosyn bazardaǵy naryqqa baılanysty bolmaq. Ázirge teńgemiz qunyn joǵaltpaı, naryq ta birshama rettelip, turaqtalyp qaldy. Osy sebepti de nesıe alýǵa táýekelge barǵan uqsaıdy.
Shyndyǵyna kelgende búginde halyqtyń nesıelik uıymdarǵa degen kózqarasy eki túrli. Bireýler nesıege múlde jolamaý kerek degenge bekip alsa, endi bireýler táýekelge bel býyp, qaryzǵa aqsha alyp, isin bastap jatyr. Qudaıǵa shúkir, qazaq maldyń jaıyn biletin halyq qoı. Al mal baqqanyń qashanda qarny toq bolary sózsiz. Al endi memleket qoldaý tanytyp, istiń kózin kórsetip jatsa bárimiz jabylyp osy berekeli istiń órken jaıýyna atsalysqanymyz durys sekildi. Sebebi aýyldaǵy aǵaıynnyń jaǵdaıy durystalsa, búkil eldiń áleýeti kóterildi deı berińiz.
