Ońtústik Qazaqstan oblysy Báıdibek aýdanynyń týmasy Janatkúldiń qıyndyqqa toly taǵdyryn estigen er azamattar oǵan úılengisi keletinderin aıtyp, jarysa usynys tastaýda. Qyzy jezdesinen júkti bolǵan áıeldiń azapty ómiri olardyń júregin eljiretken. Bul týraly Nur.kz jazady zamana.kz saıtyna silteme jasaı otyryp.

"Myna ómirde qaıyrymdy, Qudaıǵa qaraǵan adamdar kóp eken. Sizderdiń arqalaryńyzda ómirge degen qushtarlyǵym oıandy. Jomart jandar sýyq kúnde janymdy jylytyp, qolynan kelgen kómegin aıanbaı berip jatyr", - deıdi Janatkúl.

Janatkúldiń Shymkenttegi kópqabatty úılerdiń biriniń jertólesinde turatyny, onyń bala kúnnen qıyndyqtan kóz ashpaı kele jatqany buǵan deıin habarlanǵan bolatyn. Sol sátten bastap oǵan habarlasyp, shama-sharqynsha kómektesip jatqan adamdar óte kóp eken.

Kúnine shamamen 50-60 adam habarlasady

"Shynymdy aıtsam, meniń taǵdyrym jurtty osynshalyqty qyzyqtyrady dep oılamappyn. Maqala jarıalanǵannan bergi bir aptanyń ishinde telefonǵa tynym bolmaı ketti. Kúnine shamamen 50-60 adam habarlasady. Kóbi jyly sózderin aıtyp, jubatyp jatyr. Endi biri: "Úıime kelip tur. Jaıly baspana, jyly jatyn orynmen qamtamasyz ete alamyn. Tek tirligimdi istep júrseń boldy", – dep jatyr. Al endi taǵy biraz kisiler atasyna nemese aǵasyna turmysqa shyǵýymdy ótinýde", - deıdi ol.

Tipti úıdi meniń atyma aýdaryp bere salatynyn aıtty

"Solardyń arasynan Talǵat, Nurjan esimdi azamattardyń atyn erekshe atap kórsetkim keledi. Álgi Talǵat esimdi kisi osy jaqynda habarlasyp, menimen jolyqqysy keletinin aıtty. Kezdestik. Appaq jıp minip alǵan eken, aýqatty, myqty kásipker ekeni kórinip tur. "Qaryndasym, moıyma, jasyma! Bul qıyndyqtyń bári áli-aq artta qalady", – dep maǵan 50 myń teńge usyndy. Azyq-túligi taǵy bar. Oǵan qosa Balqashta alty bólmeli úıi baryn, qalasam, kóshirip ákete alatynyn jetkizdi. Tipti úıdi meniń atyma aýdaryp bere salatynyn aıtty. Biraq men odan bas tarttym. Ol jaqta týysym da joq, ózim bolsa eki kúnniń birinde aýyramyn. Jaǵdaıym qalaı bolady dep ýaıymdadym", - dep jalǵastyrdy kelinshek.

Janatkúlge jasalyp jatqan kómek munymen bitpepti. Aty-jónderin aıtpaǵan taǵy bir-eki adam ydys-aıaq, kórpe-tósek, kilem aparyp beripti. Azyn-aýlaq aqshalaı járdemderi taǵy bar.

Qysqasy, nebári bir aptanyń ishinde 100 myń teńgege jýyq aqshalaı kómek pen biraz azyq-túlikke ıe bolǵan Janatkúldiń qýanyshynda shek joq.