2005 jyly Elbasy Kentaý qalasyna kelip, halyqpen emen-jarqyn kezdesken edi. Sol kezdesý kezinde Nursultan Ábishuly «Naǵyz kentaýlyqtar barlyq aýyrtpalyqqa shydaı bildi. Búgin qala bizdiń respýblıkamyzben birge órkendeýde» dedi. Mine, osynyń ózi kentaýlyqtardyń bolashaqqa degen senimin nyǵaıtyp, qadamyn nyq basýyna, ýaqytsha bolǵan qıynshylyqtardyń bárin artta qaldyrýyna sebep boldy.
Búgingi tańda memlekettik «Bir salaly shaǵyn qalalardy damytý» baǵdarlamasyna engen kenshiler qalasynyń kásipkerlikti damytý men qalany abattandyrý, ınfraqurylymdy retteý isine respýblıka tarapynan úlken qoldaý kórsetilip otyr. Iaǵnı qazirgi tańda Kentaýdyń ekinshi jańarý kezeńi júrip jatyr. Qala jańa keıipke enip, ón boıyna qan júgirdi. Jyl saıyn jetistikke qol jetkizip keledi.
OQO Kásipkerler palatasynda «OQO-nyń ınvestısıalyq tartymdylyǵy» atty jańa jobanyń tanystyrylymy ótti. Osy joba sheńberinde birinshi kezdesýdi Kentaý qalasynyń ákimi Á.Maqulbaev ótkizdi.
Oblystyń ózge aýdan, qalalaryndaǵy sıaqty Kentaýda da ındýstrıaldy aımaq qurylǵan. Sonyń ınfraqurylymy bıyl tolyǵymen aıaqtaldy. Qazir ol jerde josparlanǵan bes jobanyń úsheýi júzege asyrylýda. Endi Kentaý ákimdiginiń aldynda sol ındýstrıaldy aımaqty jobalarǵa toltyrý maqsaty tur. Kásipkerler men buqaralyq aqparat quraldary aldynda ákim jalpy shaǵyn qalanyń, sondaı-aq, ındýstrıaldy aımaqtyń ınvestısıalyq múmkinshilikterin, erekshelikterin tanystyrdy.
-- Kentaý bir kezderi ónerkásip óndirisi órkendegen qala bolǵan. Sony qaıtadan qalpyna keltirsek deımiz. Osy arqyly qosymsha jumys oryndaryn ashýǵa, adamdarǵa turaqty tabys tabýǵa múmkindik beriledi, --dedi monoqala basshysy.
Investısıalyq tartymdylyǵy jaǵynan qaraǵanda Kentaý kóptegen jobalarǵa qolaıly keledi. Máselen, Taý ken salasy, aýyl sharýashylyǵy, ónerkásip salasy, qyzmet túrleri jáne taǵy basqalar. Áýel basta qalany qurýdaǵy maqsat Ashysaı polımetal kenishin baıytý jumystary bolatyn. Qarataýdyń qoınaýynda áli de kóptegen paıdaly qazbalar jatyr. Bıylǵy jyldan bastap geologıalyq barlaý jumystary qolǵa alynǵan.
Aýyl sharýashylyǵy salasy boıynsha munda kásipkerlerge jylyjaı, baý-baqsha, qus fermasy, mal bordaqylaý alańdary, konservileý sehtaryn ashýǵa múmkindikter zor. 16 gektar jer telimi agro ındýstrıaldy aımaq qurý maqsatyna 20 jylǵa rezervke qaldyrylypty. Sonyń janynan 12 gektar jer óndiristik jylyjaılar úshin kásipkerlerge berilmek. Budan bólek, Kentaý qalasy týrızmge de asa yńǵaıly. 17 shaqyrym jerde Qarataý qoryǵy ornalasqan. Aýa raıy týrızmniń barlyq túrine qolaıly. Atap aıtqanda, eko týrızm, qonaqúı, saýyqtyrý bazalaryn uıymdastyrýǵa tolyq múmkinshilik bar.
