Iraktyń Premer-Mınıstri Haıdar ál-Ibadı «DAISH terror uıymy munaı qudyqtaryn búldirip, sý men munaıdy bir-birine qosty» dedi. Onyń aıtýynsha, DAISH Irakty osy áreketiniń kesirinen 35 mıllıard dollar shyǵynǵa batyrǵan. Ári, Mosýlda órtengen kúkirtten ekologıaǵa aýyr zardap kelgen.

Sondaı-aq Ibadı beıbit turǵyndarǵa DAISH jasaǵan zulymdyqtardy aıyptady.

Aıta keter bolsaq, DAISH uıymy Sırıa men Iraktyń biraz bóligin basyp alǵan últraradıkaldy terrorlyq uıym. Olar ózderin Islamnyń naǵyz qaǵıdalarymen júretin memleket quramyz dep sanaıdy. Alaıda, olardyń áreketterinen myńdaǵan beıbit turǵan túrli jantúrshigerlik ólimmen ajal qushsa, júzdegen tarıhı nysandar, eskertkishter men mádenı qaldyqtar búlindi.  

Eske sala ketsek, 17 qazan kúni Irak premer-mınıstri Haıdar ál-Ibadı Mosýl qalasyn DAISH terorıstik uıymynan azat etý operasıasy bastalǵanyn jarıalaǵan edi. Qala 2014 jyldyń maýsym aıynan beri lańkester yqpalynda qalyp kelgen.

Al azat etý operasıasy halyqaralyq koalısıasynyń áýe kúshteri, Irak áskerı kúshteri jáne kúrdi áskerleriniń qatysýymen júrgizildi. Kóp ótpeı operasıa óz nátıjesin berip, Iraktyń Mosýl qalasyn lańkesterden azat etý operasıasy barysynda úkimettik áskerı kúsh 13 aýdandy tazartty.