Qazirgi tańda elimizde mal sharýashylyǵyn órkendetýge aıryqsha kóńil bólinip keledi. Ásirese, memleket tarapynan asyl tuqymdy mal sharýashylyǵyn damytýǵa basymdyq berilgen. «Sybaǵa», «Qulan» baǵdarlamalary boıynsha mal sharýashylyǵyn damytamyn degenderge qarjylaı kómek kórsetilip jatyr. Degenmen, aldaǵy ýaqytta daǵdarysqa baılanysty memleketten beriletin kómektiń qysqaratyndyǵy jaıly jıi aıtylyp júr.

Ońtústik Qazaqstan aımaqta mal sharýashylyǵy jyldan-jylǵa damyp keledi. Atap aıtqanda, et, sút, jumyrtqa ónimderiniń kólemi artty. Jalpy, óńirimizde 858,8 myń iri múıizdi qara mal, 4 111,4 myń qoı men eshki, 223,6 myń jylqy, 23,4 myń túıe, 2 460,3 myń qus bar. Munyń barlyǵy sharýalardyń eńbegi jáne memleket tarapynan berilgen qarjylaı kómekti tıimdi paıdalanýdyń arqasynda deýge bolady. «İri qara mal eksportynyń áleýetin damytý» jobasy sheńberinde «Sybaǵa» baǵdarlamasymen 18,2 myń bas analyq iri qara mal satyp alyndy. Búginde 49,3 myń bas analyq iri qara malǵa tuqymdyq túrlendirý júrgizilýde. «Altyn asyq» baǵdarlamasy boıynsha 39,3 myń bas tusaq, «Qulan» baǵdarlamasy boıynsha 3,7 myń bas jylqy satyp alyndy.

 Tórt túliktiń ishinde qoı sharýashylyǵynda asyldandyrý jumystaryna kóbirek mán berilgen. Buǵan sharýalardyń ózi qyzyǵýshylyq tanytyp otyr. Aıtalyq, óńirimizde 119 sharýa qojalyǵy qoı ósirýmen aınalysady. Olar qazaqy, bıazy júndi, qarakól qoılaryn asyldandyrý isin qolǵa alǵan. Mundaǵy maqsat – az shyǵyn jumsap, kóp ónim alý.

Dáýren Darıabek