Ońtústikte qus sharýashylyǵy jaqsy damyp keledi. Osy oraıda Túrkistan qalasyna qarasty Oranǵaı aýylynda «Iassy qus» sharýa qojalyǵynda bolyp,jumysymen tanys boldyq.  Bul qojalyq sońǵy úlgidegi tehnologıalarmen jabdyqtalǵan qus sharýashylyǵyn damytýdy qolǵa ala bastady.  

Negizinen, taýyq eti men jumyrtqa óndirýdi kózdegen kásipker alǵashqy qadamynyń sátti bastalyp otyrǵanyn aıtyp otyr. Óıtkeni, óndirilgen jumyrtqa men taýyq eti búgingi tańda jergilikti naryqta joǵary suranysqa ıe bolyp úlgergen.

«Iassy qus» sharýa qojalyǵynyń ashylǵanyna nebary 9 aı. Munda 50 myńǵa jýyq taýyq baǵylady. «Loman ls klasık» taýyǵy men «broıler» balapandaryn ósirýdi qolǵa alǵan kásiporyn zamanaýı qurylǵylarmen jabdyqtalǵan.

Atalmysh sharýa qojalyǵynyń tehnology H.Mınkabılovtyń aıtýynsha 9 aıǵa jýyq ýaqyt buryn táýliktik balapandar satyp alynyp, qazir olardan balǵyn jumyrtqa alynyp otyr. Iaǵnı, aqpan aıynda óz jumysyn bastaǵan sharýashylyqtan búginde táýligine 5 myńǵa jýyq jumyrtqa alynýda. Aldaǵy 50-60 kúnde mundaǵy jumyrtqaǵa baǵyttalǵan 21 myń taýyqtan osynsha kólemde jumyrtqa alý mejelenip otyr.

Aıta keterligi, taýyqtardyń kútimi aıryqsha. Jem-sý retinde kúnine 4 ret otandyq ónimderden ázirlengen quramajemder beriledi. Qustar jabyq rejımde ustalady.

Al balapan kezinen bastap bas-aıaǵy 40 kún ishinde 3 kelige deıin et beretin «broıler» taýyǵynyń ónimi aldaǵy ýaqytta óńirge ózge elden eksporttalatyn taýyq etteriniń ornyn almastyrmaq. 

Danıar Erkinbek