Búgin 6 jeltoqsanda Astana qalasynda «Qazaqstandaǵy jańa ındýstrıalandyrý» jalpyulttyq telekópir aıasynda Elbasy Nursultan Nazarbaev onlaın-rejimde birqatar jańa óndiris ornyn ashyp, Qazaqstan boıynsha ınfraqurylymdyq jobalardy iske qosýǵa pármen berdi. Indýstrıalandyrý kúni aıasynda barlyǵy 23 aýqymdy óndiris iske qosyldy.
Atap aıtqanda, Aqmola oblysynda jylyna 1 mln. lıtr glıfosat kalıı tuzy bar gerbısıdter jáne glıfosat shyǵaratyn óndiris, Aqtóbe oblysynda jyldyq qýattylyǵy 50 myń sharshy metr turǵyn úı salatyn «Turǵyn úı qurylysy kombınaty», Almaty oblysynda ınovasıalyq tehnologıa boıynsha jylyna 400 myń tonna qoldanbaly shoıyn alatyn taý-ken óńdeý kesheni iske qosyldy.
Atyraý MÓZ qaıta jańǵyrtylyp, modernızasıalandy, al Shyǵys Qazaqstan oblysynda AES-ke arnalǵan jylý bóletin jınaq shyǵaratyn kásiporyn jumysyn bastady. Aqtoǵaı TBK-synda jylyna 37 mln tonna sýlfıdti ken óńdeıtin fabrıka iske qosyldy. Jambyl oblysynda «Qazfosfat» JSHS ekstraksıaly fosfor qyshqylyn óndiretin EFK-1 tehnologıalyq júıesi qaıta jańǵyrtyldy, Batys Qazaqstan oblysynda jyldyq qýaty 131 mln tonna balyq etin jáne 10 tonna ýyldyryq óndiretin akvaósirý kesheni iske qosylsa, Qaraǵandy oblysynda «ArselorMıttal Temirtaý» AQ № 4 domna peshi jańǵyrtyldy. «Kóktasjal» kenishi bazasynda jylyna 3 mln. tonna rýda óńdep, 18 myń tonna mys óndiretin taý-ken baıytý kesheni óz jumysyn bastady. Qostanaı oblysynda «Baıan sulý» AQ kondıterlik ónimder óndirisin jylyna 9 075 tonnaǵa deıin arttyrdy, Qyzylorda oblysynda Shalqıa kenishinde polımetal ken baıytatyn fabrıkanyń qurylysy júrip jatyr, jylyna 112 tonna myrysh jáne 29 myń tonna qorǵasyn óndiredi.
Telekópir barysynda SQO Taıynsha aýdanynda 120 myń tonna ósimdik maıyn shyǵaratyn maıly daqyldar óńdeıtin zaýyt, Ońtústik Qazaqstan oblysynda arnaıy maqsattaǵy jáne jalpy mashına jasaý salasyna qajetti quımalar shyǵaratyn zaýyt jumysyn bastady. Al Astanada qurylys materıaldaryn shyǵaratyn kásiporyn iske qosyldy. Zaýyt jylyna 120 myń tonna qurǵaq qospalar jáne 10 myń tonna dıspersıaly qospa óndiredi. Almatyda «Kazlegprom-Almaty» JSHS-niń jylyna 150 myń jup aıaq-kıim tigetin óndiristik sehy jumysyn bastady.
Sondaı-aq, Qazaqstan Prezıdenti Nursultan Nazarbaev telekópir barysynda strategıalyq mańyzy bar ınfraqurylymdyq jobalardy iske qosty. Atap aıtqanda, Mańǵystaý oblysynyń Quryq poselkesinde jylyna 5,1 mln. tonna júk túsirip-tıeıtin paromdyq keshen jumysyn bastady, Almaty-SHý ýchaskesinde jańa temirjol jelisi ashyldy. Bul jol táýligine 51 jup júk poıyzyn ótkize alady. Qaıta jańǵyrtylǵan «Astana-Temirtaý» (uzyndyǵy 169 km) jáne «Almaty-Qapshaǵaı» (uzyndyǵy 104 km) avtokólik joldary ashyldy, uzyndyǵy 598,5 km Ekibastuz-Semeı (Shýlbınskaıa GES) – Óskemen jalpyulttyq energetıkalyq jelisi iske qosyldy.
Indýstrıalandyrý baǵdarlamasyn júzege asyrý jyldarynda 4 trln. teńgeniń 961 jobasy iske qosyldy, 90,6 myń turaqty jumys orny ashyldy.
Sonyń ishinde 2016 jyldyń 10 aıynda 179,2 mlrd. teńgeniń 63 jobasy júzege asyrylyp, 4,8 myńnan astam turaqty jumys orny ashyldy.
Indýstrıalandyrý baǵdarlamasyn júzege asyrý bastalǵannan bergi aralyqta jasalǵan jobalar boıynsha 7,5 trln. teńge shamasynda ónim óndirildi, sonyń ishinde 2016 jyldyń 10 aıynda - 1,8 trln. teńgeniń ónimi óndirildi.
