«Facebookte» áleýmettik arazdyqty qozdyrdy degen aıyppen Aqtóbe soty kásipker Sanat Dosovty úsh jylǵa sottady dep habarlaıdy «Dıapazon».
Alty balanyń ákesi 46 jasar Sanat Dosov «facebook» áleýmettik jelisindegi jeke paraqshasynda Pýtınniń saıasaty, Sırıadaǵy soǵys, jergilikti bılik pen din jaıly pikir bildirip otyrǵan. Onyń keıbir pikiri emosıaǵa toly bolǵan. Tergeý ızolátorynda 4 aıyn ótkizgen Dosovtyń qorǵaýshysy tórt aı boıy taǵylǵan aıyptyń aqylǵa syımaıtyndyǵyn aıtýmen, dáleldeýmen boldy.
Qorǵaýshy Sanat Dosovty aqtap shyǵýdy, sonymen qatar iske qatysy bar İİB, UQK, prokýratýra qyzmetkerlerin jáne Baısalbaeva esimdi ekspertti qylmystyq iske tartýdy usynady. Memlekettik aıyptaǵýshy bolsa óz kezeginde tergeý barysynda eshqandaı quqyq buzýshylyq oryn almaǵandyǵyn, aıyptalýshynyń kinási tolyq dáleldengenin alǵa tarty. Ol sottan Sanat Dosovty 4 jyl bas bostandyǵynan aıyrýdy surady.
Aıyptalýshy Sanat Dosov óz kinásin moıyndaı otyra jazǵan oı-pikirinde eshqandaı aram pıǵyl bolmaǵandyǵyn, óziniń Qazaq eliniń patrıoty ekendigin aıtty. Alty balanyń ákesi ózin bas bostandyǵynan aıyrmaýdy ótinip surady. Sebebi Dosovtyń alty balasynyń tórteýi áli kámelettik jasqa tolmaǵan eken.
27 jeltoqsanda sot Sanat Dosovty úsh jylǵa temir torǵa qamaý jaıly sheshim shyǵardy. Sóz bostandyǵy dep erkin pikir bildirgen otandysymyz sóz sońynda sot aldynda bylaı depti: «Batý han ulyna bireýinde 1 quıryq, 100 basy bar, ekinshisinde 1 bas, 100 quıryǵy bar eki aıdahardyń ómir súrgendigi jaıly aıtyp beripti. Kún sýyǵanda 1 bastyń arqasynda 100 quıryq aman qalypty. Al, ekinshi aıdahardyń 100 basy daýlasyp, kelise almaı jatqanda ólip qalypty desedi. Bizdiń elde bir kósem bar. Men únemi sonyń artynan ilesip júrdim. Ózimdi Elbasynyń baǵdarlamasyna qarsy shyǵyp júrgen bas retinde sezingen emespin. Batys eli jýrnalıseriniń suraǵyna Nazarbaev Qazaqstanda dıktatýra joq, tek jaı ǵana aıqyn jol tańdaǵanymyzdy, ýaqyt óte bári ózgeredi dep jaýap qaıtarǵan bolatyn. Men sol kezde prezıdenttiń durys aıtqanyn túsindim. Meniń istegenim qatelik boldy. Reseı-Ýkraına soǵysy bizdiń maıdanymyz emes, sol sebepti ol týraly men ǵalamtorda jazbaýym qajet edi».
