Birneshe halyqaralyq uıymdar keler jyly Qazaqstan ekonomıkasynyń jetistikke toly bolatynyn aıtyp otyr. Máselen, Halyqaralyq valúta qorynyń Qazaqstandaǵy mısıa jetekshisi Mark Horton elimizdiń aýylsharýashylyǵy, qurylys jáne kólik salalarynda ilgerileýshilik bolatynyn aıtady. Maman bul boljamyn memlekettik mekemelerdiń ekonomıkany qoldaýǵa baǵyttalǵan jumysymen túsindiredi. Sóıtip, HVQ esebine saı, 2017 jyly ekonomıka ósimi 1 paıyzdy qurap, ınflásıa 9,3 paıyz kóleminde bolmaq.
Al, el úkimeti bolsa, keler jylǵy İJÓ ósimi 1,9 paıyz kóleminde bolady dep otyr. Eýropa qaıta qurý jáne damý banki Qazaqstandaǵy İJÓ ósimi 2,4 paıyzdy quraıdy dep taǵy qýantyp otyr. Ekonomıkaǵa qatysty boljamdar men zertteýler nátıjeleri kóp jaǵdaıdy kóńil kónshitpeı, kerisinshe, pesımızmge toly bolatyn. Biraq, bul jolǵy boljamdar negizsiz emes ekenin aıtady mamandar.
«Ulttyq ekonomıka mınıstrligi statısıka komıtetiniń derekterine saı, 2016 jyldyń 9 aıyndaǵy İJÓ kólemi 31 355 126,1 mln teńgeni qurady. Bul 0,4 paıyz ósim baryn ańǵartady. Sondyqtan, úkimettiń boljamdary shyndyqqa janasady. Odan bólek, 2017-2019 jyldary munaı baǵasy barreline 35 dollar bolady dep josparlaǵanbyz. Búdjet te sol baǵamǵa negizdeldi. Al, qazirdiń ózinde munaı baǵasy 57 dollar bolyp otyr. Sondyqtan, EDQQB – nyń esebi de negizsiz emes. Qazaqstan ekonomıkalyq quldyraýdy, ınflıasıanyń sharyqtaý shegin artqa tastap otyr», - deıdi ekonomıka ǵylymdarynyń doktory Tursynbek Ómirzaqov.
Munaı degende valúta baǵamy týraly aıtpaı ketýge bolmaıdy. Dollar baǵamyna qatysty boljamdar birkelki bolmaı otyr. ekonomıkalyq sholýshy D. Krıvosheev aldaǵy jyly teńge taǵy da qunsyzdanyp, 1 AQSH dollarynyń bańamy 420 teńgege deıin ósedi dese, ekonomıs Birjan Chýıkın dollar baǵamynyń ekonomıkalyq negizdelgen dálizi 330-350 teńge shamasynda bolady dep sanaıdy. Qalaı bolǵanda da valúta baǵamy halyqaralyq qor naryǵyndaǵy munaı baǵasyna táýeldi ekenin bilemiz. Soǵan saı, «Frıdom Fınans» taldaý departamentiniń dırektory Erlan Áýbákirov Qashaǵannyń iske qosylýy, munaı baǵasynyń qymbattaýy teńgeniń nyǵaıýyna sebep bolady dep otyr.
«Eger munaı baǵasy 62-65 dollarǵa deıin ósse, dollar baǵamy 280 teńgege deıin túsedi», - deıdi E. Áýbákirov.
