RF-nyń quramyna kiretin Mordovıa respýblıkasynyń Belozere eldimekenindegi orta mektepte 375 bala bilim alady eken. 5-11 synyp aralyǵyndaǵy qyz balalar sany 200. Olardyń kóbisi oramal taǵady dep habarlaıdy "Idel.Realıı".
Jalpy, atalmysh mekteptiń muǵalimderi de oramal taǵady eken. Mektep basshylyǵynyń oıynsha, oqýshy qyzdarǵa úlgi bolyp jatqan da solar. Mordovıa Bilim mınıstrligi men Belozere tatar aýylynyń ustazdar qaýymy arasyndaǵy daý-damaı jeltoqsan aıynda týyndaǵan bolatyn. Sol kezde mınıstr orynbasary Galına Iavkına merekeden keıin «oramaldaryńdy sheshińder» dep talap qoıǵan bolatyn.
Alaıda mektep dırektory Vera Lıpatova musylman oramalyn taqqan muǵalimder jumysynan qýylmaıdy dep sóz sóılegen bolatyn: «Demalystan keıin áriptester bolyp bas qosyp, kelissóz júrgizetin bolyp sheshtik. Búgingi tańda eshkim qyzmetinen bosatylǵan joq. Sol sebepti daý týǵyzýdyń qajettiligi de shamaly. Bir nárse aıta keteıin, mektep ol bilim ordasy, zaıyrly mekeme. Ony qarjylandyratyn memleket. Dinı kózqarastaryna qaramastan sabaq beretin ustazdar qaýymy ustaz bolyp qalýy kerek. Óıtkeni olar júris-turysymen, bet-beınesimen de óskeleń urpaqqa tárbıe beredi. Ár azamat óz memleketiniń zańyna súıenip áreket etkeni durys».
Ókinishke oraı, mektep basshylyǵy óz ýádesinde turmapty. Keshe ǵana óz esimin jasyrýdy jón sanaǵan muǵalim bylaı dep muńyn shaqty: «Demalys aıaqtalysymen bizdi bir-birlep jumystan shyǵaratyn bolypty. Sebep tabylady deıdi».
Quqyq qorǵaýshy Marat Áshimovtyń aıtýynsha, Mordovıa bıliginiń qyzmet babynda oramal taqpaý dep talap qoıýy Reseı Konstıtýsıasyna qaıshy. «Reseı eńbek kodeksine saı dinı, ulttyq negizde dıskrımınasıaǵa jol joq. RF Konstıtýsıasy dinı senimniń erkindigine kepildik beredi. Mordovıa bıligi mektep zaıyrly mekeme degendi kóp aıtady. Ol mektepte dinı sabaqtar berilmeıdi, oqytylmaıdy. Oramal taqqan muǵalim bilim berý mekemesiniń zaıyrlylyǵyna qaýip tóndirmeıdi. Belozere aýyly jalpy dinge berik eldimeken. 20 jyl boıy qyzmet etken muǵalimder álbette jumystarynan aıyrylǵylary kelmeıdi» dedi Áshimov.
Jazıra Baıdaly
