Mýrsı - Efıopıa men Afrıkanyń ońtústigindegi Omo alqabyndaǵy belgili taıpa. Olar - astyńǵy erinderinde laıdan jasalǵan tarelke salyp júretin áıelderimen ataqty. Muny estigen týrıser erekshe foto men vıdeo jasaý úshin mýrsılyqtarǵa keledi.

Qoǵam tarapynan zor qyzyǵýshylyqqa ıe bolǵan taıpa ókilderi týrıserdi kóp jaqtyra bermeıdi. Ashýlanbaı qaıtsin? Kóz aldaryńyzǵa elestetip kórińizdershi, bóten adamdar kelip, Mýrsılardyń úıine kirip, dástúrleri týrasynda surap mazalaryn alady.

«Olar bizdi túsirip alý úshin keledi. Quddy ekzotıkalyq janýar sekildimiz» dep Mýrsı taıpasynyń ýákilderi óz renishterin bildirdi.

Týrıserdiń jergilikti halyqqa degen mundaı qarym-qatynasy mýrsılyqtardyń ashýyn keltirdi. Taıpa adamdary týrıserdi qorshap alyp, ózderin barynsha dóreki ustaıdy eken. Sonymen qatar, olar eń jaqsy kıimderi men áshekeılerin kıip shyǵady. Sebebi mýrsılyqtar qanshalyqty erekshe kıinse, foto men vıdeo úshin sonshalyqty kóp aqsha alady.  

Mýrsılyq er adamdardyń kóbi Kalashnıkov avtomatyn asynyp júredi. Sondyqtan kórsetken qyzmetine ýaǵdalasqan aqshasyn bermeý múmkin emes. Balalar qaıyr tilegenniń ózinde týrıserdi «You money» nemese «You birr» («Sen aqshasyń» nemese «Sen byrr», byrr-jergilikti valúta) dep ataıdy.

Laıdan jasalǵan tarkelke kıip júretin áıelderge oralaıyq. 15 nemese 16 jasqa tolǵan qyzdyń astyńǵy ernin ortasynan tiledi de, aldyńǵy eki tisin julyp alady. Bul tistiń tarelkege tımeýi úshin jasalynady. Odan keıin kishigirim tarelkeni ornalastyrady. Jyldar óte ol úlkeıe beredi. Sáıkesinshe erinniń kólemi de ósedi. Áıel qanshalyqty úlken tarelke alyp júre alsa, toıda bolashaq kúıeýi sonshalyqty kóp aqsha tóleıdi.

Mundaı dástúr qul satý kezinde paıda bolǵan. Quldyqqa eń ádemi jáne qıyndyqqa tózimdi áıelderdi alǵan. Satylyp ketpeýi úshin áıelder ózderiniń kelbetin barynsha ajarsyzdandyryp otyrǵan.  

Jynysyna qaramaı mýrsılyqtar denesin tyrtyqpen túrli órnekter salady. Ol úshin óte aýyr ádisterge barady. Eń aldymen denesin tiledi. Odan keıin oǵan kúl nemese qurt, qumyrsqanyń dernásilderin sebedi. Adam aǵzasynyń reaksıasynyń nátıjesinde túrli órnekter shyǵady eken.

Mýrsılyqtardy jabaıy, qaýipti «janýarǵa» teńeýdiń qajeti joq. Taıpa - kólikter, túrli aýrýlar men bitpeıtin kameralary bar jańa álem jaǵdaıynda ómir súrý úshin kúresip júrgen jandar.

Atalmysh taıpa ókilderiniń rızashylyǵyn alý úshin bar bolǵany týrıser ornalasqan aımaqtan alystaý jerge baryp, birneshe syılyq jasap, (saqal alýǵa arnalǵan ustara joǵary baǵalanady. Sebebi ony denege órnek salý kezinde paıdalanady) olardy kameraǵa túsirmeı, jaı ǵana syrttaryna baqylaý jetkilikti.

Al shet aımaqtardaǵy týrıser onsha kóp kele bermeıtin eldi mekenderdegi adamdar qonaqjaı jáne meıirimdi. Olardyń óz dástúrleri bar. Bálkim keıbiri qyzyq kóriner. Biraq túptep kelgende barlyq adam zat birdeı. Meırim men qatigezdik, jomarttyq pen sarańdyq, ishtarlyq pen keńpeıildilik sekildi adamı qasıetter adamnyń dinin, ultyn, jerin, jasyn, násil tańdamaıdy. 

Derekkóz: free-eyes.com