Almatynyń halyqqa qyzmet kórsetý ortalyǵyna ýaqytsha tirkeýge kelip kóz jumǵan azamattyń otbasyna memleket tarapynan eshqandaı kómek kórsetilmegen dep habarlaıdy 31.kz. Tipti, resmı oryndardan bir de bir jan otbasyna kelip kóńil aıtpapty. Artynda eki balasy men jary qalǵan marqumnyń týystary keshe ǵana ony jer qoınyna tapsyrdy.
Ýaqytsha tirkeýge kelip kezekte turǵan Jaras Núrkebaıuly qaıtys bolardan bes mınýt buryn áıeline habarlasypty. Basy aýyryp, ózin jaısyz sezingenin aıtyp úıge qaıtpaq bolǵan. Jary İnjýgúl "ýaqytsha tirkeýge asyqpaı-aq bararmyz" dese, "aıyppul salsa tóleý qıyn bolar, tezirek tirkeleıik" dep ortalyqqa erte barǵan eken. Dárigerler aıtqan epılepsıa syrqatymen aýyrmaǵan, sap-saý azamat edi deıdi jaqyndary.
NÚRKEBAI QONQAQOV, Marqumnyń ákesi:
- Eshqandaı aýrýy joq edi. Aıaǵynan tik bardy ǵoı. Aýyrǵan joq, ýchetta joq, zdorovyı jigit edi. İri.
İNJÝGÚL KALIMBETOVA, Marqumnyń jary:
- Eshqandaı aýrýy joq, budan 4-5 jyl buryn gryja bolǵan omyrtqasynan, biraq emdelip jaqsy bolyp ketken. Aýyr jumys istemeıtin, qazir ohranık bolyp jumys isteıtin.
Azǵantaı aılyǵyn aıyppulǵa berýge qoryqqan azamat óz ákesiniń úıine tirkeýge turmaq bolǵan. Úlken úıge japsarlas salynǵan osy shaǵyn baspanada otbasymen kún keshken eken. Óz qolynda jan tapsyrǵan ulynyń ólimine 80-degi qarıa zań shyǵarýshylardy, jaǵdaı jasalmaǵan tireý ortalyǵyn kinálaıdy.
NÚRKEBAI QONQAQOV, Marqumnyń ákesi:
- Álbette, kinálaımyz. Qoǵam halyqqa qyzmet isteý kerek qoı. Adal qyzmet isteý kerek, halyqtyń jaǵdaıyn oılaý kerek, halyqpen keńesý kerek. Birden zań shyǵaryp, uıat qoı bul. Qylmys qoı bul, aınalaıyndar-aý!
"Ulymnyń qazasyna kim jaýap beredi" degen qarıa bılik ókilderiniń esh nazar salmaǵanyna kúıinedi. 80 jastaǵy Núrkebaı aqsaqal ákesiz qalǵan eki nemeresin qamqorlyǵyna alypty. "Tirkeýge kelip jan tapsyrǵandar otbasyna kómek bolady ma" degen saýalymyzǵa respýblıkalyq "Azamattarǵa arnalǵan úkimet" korporasıasy resmı jaýap berýden bas tartty.
JARAS NIAZBEK, Tilshi:
- Halyqqa qyzmet kórsetý ortalyǵyna kelip qaıtys bolǵan azamattardyń otbasyna qandaı da bir kómek kórsetý josparda joq degendi "Azamattarǵa arnalǵan úkimet" mekemesiniń ókilderi telefon arqyly aıtty. Ýaqytsha tirkeýge asyqqan adamdardyń qarasy áli de qalyń. Dál osy jaǵdaıǵa baılanysty "Úıinde de ol adam óler deısiz, Úıde ólý arman ǵoı, úıiń bolsa" degen torǵaılyq aqynnyń óleń joldary el arasynda keń taralýda.
