Italıadaǵy Rigopiano qonaq úıine qar kóshkini júrip ótkende qonaq úıde bolǵan 22 jasar qyzdyń áńgimesi kópti tań qaldyrdy. Ol BAQ qardyń astynda 58 saǵat boıy qalaı kúresip, ne istegenin aıtyp berdi.
Djordjı Galassıdiń aıtýynsha ol shólin qandyrý úshin qar jep, muz jalaǵan.
Galassı qutqarýshylar qutqaryp qalǵan 9 adamnyń biri. Basqalaryn da qutqarýǵa úmit bar deıdi qutqarý qyzmeti. 24 adam izdestirilip jatyr. 5 adamnyń denesi tabyldy.
Bıliktiń aıtýynsha 120 myń tonnalyq kóshkin qonaq úıdi saǵatyna 100 shaqyrym jyldamdyqpen basyp qalǵan.
Qonaqúıdegi adamdardyń kóbi birinshi qabatta bolǵan. Olar kóshkinge deıin bolǵan jer silkinisinen keıin qaýipsiz jerge kóshýge daıyndalyp jatqan. Bir sátte qar kóshkini kelip tutas bir qonaq úıdi basyp qaldy. Ary qaraı qarańǵylyq, tiri qalǵandardyń ashshy daýysy jáne shól.
Qar kóshkini kezinde Djordjıa 25 jasar Vınchenso Fortı esimdi jigitimen dıvanda otyrǵan.
«Aınaladaǵynyń barlyǵy qıraı bastady. Men eshteńe túsinbedim» deıdi qyz. Ol esin jınaǵanda otyrǵan bólmesi úńgirge aınalǵandaı áser qaldyrǵanyn aıtady. Djordjıe Galassı qonaq úı jerdiń tereń túbine túsip ketti dep oılady.
«Onda óte qarańǵy boldy. Syrttan eshqandaı dybys bolmady. Bizdiń daýystarymyz jańǵyryq bolyp shyǵyp jatty» deıdi 22 jasar stýdent qyz.
Djordjıa óziniń jigitin shaqyrǵan áıeldiń daýsy men qolyn jaraqattap alǵan rımdik er adamnyń shyńǵyrǵanyn estidi. Taǵy bir áıel qyzyn izdep jatty.
«Barlyq balalar ózderin óte jaqsy ustady. Balanyń jylaǵanyn múlde estimedim» deıdi Djordjıa. Al ózi kóp jas tókken. Al jigiti bolsa úmitin úzbedi.
«Ol bizge demeý kórsetip otyrdy. Keıde bizdi tynyshtandyrý úshin án aıttty» deıdi 22 jasar qyz.
Onyń aıtýynsha olardyń jeıtin tamaǵy bolmady. «Eshteńe bolmady. Tek muzdy jep otyrdyq. Al muz kóp boldy. Sol arqyly biz kúsh aldyq».
Jergilikti ýaqyt boıynsha saǵat 11.00-de juma kúni mehanıkalyq daýys odan keıin adamdardyń daýsy shyqty.
«Men Djordjıamyn, men tirimin». Tiri qalǵan qyzdyń sózinshe bul ómirindegi aıtqan eń keremet sózderi boldy.
Qonaq úıdegi adamdardy qutqarý úshin Italıanyń túrli qutqarý qyzmetteri atsalysty.
Sońǵy birneshe aıda Italıada birneshe jer silkinisteri boldy. Tamyz ben qazan aılary aralyǵynda Appenınada úsh márte 6 baldyq jer silkinisi boldy.
