Mańǵystaý oblysynda egizderdi kútken Tuıaqbaevtar otbasynda úshem dúnıege keldi dep jazady lada.kz. Mańǵystaý oblysynda da, Almaty qalasynda da últradybystyq tekserý kezinde úshinshi bala kórinbegen. Aqmaral Jalajanova aı-kúni tolyp bosanǵanda úsh balany dúnıege ákelgen. Bul balalardyń otbasy úshin ǵana emes, akýsherler úshin de kútpegen jaǵymdy tosyn syı boldy.

«Aqmaral Jalajanova 28 jeltoqsanda Shetpeden júktiliktiń 31-shi aptasynda kelip tústi. 12 qańtarda Aqmaraldyń jaǵdaıy nasharlap, qan qysymy 180-ge deıin kóterildi. 13-shi kúni ony reanımasıaǵa aýystyrdyq. 13 qańtarda dárigerler keńesi Aqmaralǵa ota jasaımyz dep sheshti. Sebebi júktilik 34-shi aptaǵa ketti. Joǵary dárejedegi preeklampsıa jáne ishtegi náreste durys jatpaı qaldy. Osyndaı dıagnozben ota jasaldy. Ota kezinde ekinshi náresteni alyp shyqqan soń, úshinshisiniń bary anyqtaldy, osylaısha ony da shyǵaryp aldyq»  dedi oǵan operasıa jasaǵan dáriger, perınıtarlyq ortalyqtyń bas dárigeriniń orynbasary Japyraq Epenova.

Aqmaral Jalajanovanyń ózi 33 jasynda kóp balaly ana atanatynyn bilmedi. Olar qyz týraly armandady. Tuıaqbaevtar otbasynda buǵan deıin 4 ul bala bolǵan. Endi Janserik Tuıaqbaev pen Aqmaral Jalajanova 7 balanyń ata-anasy.

Birinshi kópten kútken qyz dúnıege keldi. Ata-anasy oǵan Medına esimin berdi. Ekinshi Nurıslam atty jigit dúnıe esigin ashty jáne barlyǵy úshin jaǵymdy tosyn syı jasaǵan úshinshi qyz keldi. Onyń esimin ata-anasy Ádemi  dep qoıdy.

«Men egizdi dúnıege alyp kelemin dep oıladym. Operasıa kezinde esimdi bilip jattym. Mende eki bala emes, úshem dúnıege kelgende baqyttan basym aınaldy. Sonda men «Jaraısyń» dedim. «Dárigerler kim jarady?» dep suraǵanda, «men» dep jaýap berip edim, dárigerler maǵan qol shapalaqtady» deıdi Aqmaral Jalajanova.