Qaraǵandylyq rıtýaldy qyzmet kórsetetin dúkenderdiń biri Gollıvýd juldyzdary Andjelına Djolı men Bred Pıtt beınelegen qulyptas satýda. Ony satyp alyp jatqan eshkim joq. Munyń bári jarnamalyq qadam. Djolı men Pıttiń sýretteri ǵalamtorda taralyp ketkendikten búginde estigen jurt eriksiz jaǵasyn ustaýda. Másele Gollıvýd juldyzdarynda emes. Másele kiris kózin kóbeıtemiz dep tiri adamdardy óli sanatyna jatqyzýdan qoryqpaý. Sýretti kórgen qazaqstandyqtar «masqara, adamgershilikteri qaıda, myna jurt paıdadan basqa bir nárse oılaı ma eken» dep pikir bildirgen. Sýretti kórgen biz de eseńgirep qaldyq. Sóıtsek, mundaı marketıńtik ádis-tásil tájirıbede birinshi ret qoldanylyp jatqan joq eken. Buǵan deıin de mundaı qulyptas (ataqty tiri adamdardyń beınesin tasqa túsirý) Reseıde jarnamalyq negizde sátti qoldanylyp kelgen. Mysaly, ataqty akter Djordj Klýnı, RF prezıdenti Vladımır Pýtın jarnamanyń qurbany bolyp ólgenderdiń qatarynda júr.  

Jazıra Baıdaly