Ońtústikte jergilikti ózin-ózi basqarý zańynyń sharapatyn kórsek dep úmittenip otyrǵan aýyldar bar dep jazady otyrar.kz. Solardyń biri — Maqtaaral aýdanyna qarasty Jyly sý aýyl okrýgi. Mundaǵy 14 myńnan astam halyq joldyń azabyn tartyp otyr. Al Kárim ata aýylynda jol bylaı turǵanda tipti azyq-túlik dúkeni de, balabaqsha da joq. Órkenıetten tys qaldyq dep ashyndy turǵyndar.
Maqtaaralda órkenıetten tys qalǵan aýyl bar
Jetisaıdan 20 shaqyrym shyqqanda órkenıetten maqurym qalǵan aýyldy kóresiz. Kárim ata dep atalatyn aýylda azyq-túlik satatyn dúken de, balabaqsha da joq. Osy aýyldyń turǵyndary — Dúısebekovter qyryq jyldan beri tegis joldy armandap keledi. Erli-zaıypty ekeýi de İİ top múgedegi. Baldaqqa súıengen jarym jandar tozyǵy jetken joldyń kesirinen dárigerge kórine almaı otyrmyz deıdi. Tipti jaldap baratyn jeńil kóliktiń ózi batpaq jolpen qatynamaıdy dep ashynady.
«Kópirimiz qulap jatyr. Mektepke qatynaıtyn balalar qulap ketedi me dep ýaıymdaımyz. Kósheniń aty bylaı tursyn, kósheniń ózi joq bizdiń aýylda. Qystyń kúni myna baldaqpen úıden shyǵa almaımyz. Tipti jeńil kólik jaldap shaqyrtaıyn desek, olardyń ózi myna saz-batpaqpen júrmeımiz deıdi. Qyryq jyldan beri qınalyp kelemiz. Ne azyq-túlik dúkeni joq, ne balabaqsha joq. Órkenıetten tys qalyp otyrmyz» deıdi aýyl turǵyny Bazarkúl Dúısebekova.
Ózderin kóshten qalyp qoıǵan jurttaı sezinetin aýyl jurty basshylardyń ýáde sózine keıis bildiredi. Shaǵymdaryn aıtyp, san márte sabylyp jaýaptylarǵa da barǵan. Biraq birde-bireýine naqty jaýap bergen basshylyq bolmapty. Tipti qoǵamnan shyǵaryp tastady dep renjýli turǵyndar.
Maqtaaralda órkenıetten tys qalǵan aýyl bar
Quralbek Turlybaev, aýyl turǵyny: «Bul aýyl tipten umyt qalǵan. Birde-bir bılik ókilderi kelip, aýyldyń jaǵdaıynan habar almaıdy. Balalarym úsh shaqyrym jer batpaq keship, mektepke jaıaý qatynaıdy. Jylyna úsh-tórt ret aıaq-kıim aýystyramyz. Jaýyn jaýsa myna kóshelermen júre almaısyń. Osyny nazarǵa alyp, bolmaǵanda bir aıaq jol salyp berse eken bılik dep armandaımyz.»
Al jergilikti atqaminerlerge halyqtyń azaby jaqsy tanys. Tipti aýdan ákiminiń orynbasary okrýgke qarasty aýyldarda jyl boıy jasalǵan jumysty jipke tizip berdi. Endi Kárim ata aýylynyń problemasy shamaly ýaqyttyń ishinde sheshiledi dep sendirýge tyrysty.
