BJZQ-nyń zeınetaqy aktıvteri boıynsha ınvestısıalyq kiris 2016 jyly 531 mıllıard teńge bolǵany belgili boldy. Bul týraly QR Ulttyq banki tóraǵasynyń orynbasary Ǵalymjan Pirmatov aıtty, - dep habarlaıdy Tengrinews.kz

2016 jyldyń qorytyndysy boıynsha zeınetaqy aktıvteri boıynsha ınvestısıalyq kiris 531 mıllıard teńgege jetken. Ótken jyl boıy BJZQ-nyń zeınetaqy aktıvteri boıynsha ortasha alynǵan aı saıynǵy kiris 44,3 mıllıard teńge deńgeıinde bolǵan.

Sondaı-aq, QR Ulttyq banki tóraǵasynyń orynbasary 2016 jylǵy 12 aıda zeınetaqy aktıvteriniń 848,7 mıllıard teńgege, ıaǵnı, 6,7 trıllıon teńgege deıin ulǵaıǵanyn atap ótti, 

Ǵalymjan Pirmatovtyń aıtýynsha, 2017 jylǵy 1 qańtardaǵy jaǵdaı boıynsha "BJZQ" AQ salymshylarynyń zeınetaqy jınaqtary 6 685,3 mıllıard teńge boldy. "BJZQ" AQ qurylǵan sátten bastap saqtandyrý uıymdaryna aýdarymdardy qosa alǵanda, salymshylarǵa tólengen zeınetaqy tólemderiniń kólemi 410,6 mıllıard teńge boldy.

Sonymen qatar, Ǵalymjan Pirmatov ınvestısıalyq kiristi esepteý kún saıyn júzege asyrylatynyn habarlady. Onyń shamasy mynadaı qarjy quraldary - oblıgasıalardan, depozıtterden jáne aksıalardan turatyn ınvestısıalyq portfeldiń qurylymyna baılanysty bolady. Sondaı-aq, táýekelderdi tómendetý maqsatynda zeınetaqy aktıvteriniń bir bóligi shetel valútasynda shyǵarylǵan baǵaly qaǵazdarǵa ınvestısıalanǵan.

QR Ulttyq Banki Tóraǵasynyń orynbasary "Qazaqstan Respýblıkasynda zeınetaqymen qamsyzdandyrý týraly" Qazaqstan Respýblıkasy Zańynda salymshy zeınetaqy tólemderine quqyqty ıelengen kezde ınflásıanyń deńgeıin esepke ala otyryp, naqty engizilgen zeınetaqy jarnalarynyń (mindetti, mindetti kásiptik) saqtalýy boıynsha memlekettik kepildik kózdelgenin de eske saldy.

Aıta keter bolsaq, sońǵy kezderi jınaq qordaǵy aqshanyń orynsyz jumsalyp jatqany týraly áńgime kóptep tarady. Eske salaıyq, 2016 jyldyń 21 jeltoqsanynan bastap QR Ulttyq bankiniń qatysýymen "Biryńǵaı jınaqtaýshy zeınetaqy qory" Aksıonerlik qoǵamynyń qyzmetine tekseris júrgizilgen bolatyn. Al 9 qańtarda BJZQ basshylyǵy qamaýǵa alynǵan bolatyn.