Qaraǵandy oblysynda taǵy bir úı ishinara opyryldy dep habarlaıdy tengrinews.kz.
Tótenshe jaǵdaı qańtardyń 27-ne qaraǵan túni Qaraǵandy mańynda ornalasqan Aqtas aýylynda bolǵan. Kovylnaıa kóshesi, 43-úıde ornalasqan ekiqabatty kóppáterli úıdiń kiberisindegi jertóleniń qabyrǵasy opyrylǵan. Saldarynan úıdiń turǵyndaryna úlken qaýip tónip tur.
Tótenshe jaǵdaı bolǵan úıdiń turǵyndary evakýasıalandy. Olar ýaqytsha jergilikti HQKO-nyń ǵmaratynda turady. Biraq olardyń kóbisi bul usynystan bas tartyp, týystary men kórshileriniń úıine barǵan. Turǵyndardyń aıtýynsha, qazirgi ýaqytta jertóleniń opyrylǵan bóligi úlkeıip jatyr.
"Men otbasymmen osy apatty úıdiń birinshi qabatynda úsh bólmeli páterde turdym. 26 qańtarda túngi ýaqytta jertóledegi kótergish qabyrǵa opyrylyp ketti. Biraq biz ony birden baıqamadym, tek tańerteń áıelim sony kórsetti. Biraq ol burynnan opyrylaıyn dep turdy. Biz jergilikti ákimdiktegilerge birneshe ret bardyq. Keıin biz tótenshe jaǵdaılar qyzmetindegiler men basqa da vedomstvodaǵylardy shaqyrttyq. Biraq endi bizdi evakýasıalady. Sý men jaryq joq páterde tura turýdy usyndy. Árıne, biz bas tarttyq. Qazir dostarymyzdyń úıinde turyp jatyrmyz", - dedi turǵyn Temirbek Marıza.
Sondaı-aq, ol páterden keıbir jıhazdar men qajetti zattardy alyp ketkenin aıtty. Temirbek Marızanyń aıtýynsha, páterinde jaqynda ǵana jóndeý jumystary júrgizilgen. Qabyrǵa jertóledegi sýdan opyrylyp otyr. Turǵyndar sýdy ózderi tartyp shyǵarǵan. Qazir endi olar sarapshylardan turǵyn úıdiń jaramdylyǵy týraly qorytyndyny kútip otyr. Biraq turǵyndar páterler jaramdy dep tanylsa da, úılerine qaıtyp barýǵa qorqatyndaryn aıtyp otyr.
"Bul úıde meniń úsh bólmeli páterim bar. Onda kúıeýimmen jáne eki balammen turdym. Tótenshe jaǵdaıdan keıin bizge Qarttar úıinen bólme usyndy, biraq biz bas tarttyq. Qazir úlken ulymnyń eki bólmeli páterinde turyp jatyrmyz. Ulymnyń otbasymen birge segiz adam bolyp turyp jatyrmyz! Men kúnde ákimdikke baryp, páter berýlerin suraımyn. Biraq olar tek ýáde berip keledi. Sarapshylardyń qorytyndysyn kútý kerektigin aıtty. Úıdi kishkene jóndegen jaǵdaıdyń ózinde ol jaqta qalaı turasyń? Tótenshe jaǵdaı taǵy da qaıtalanyp, adamdar qaza tabýy múmkin", - dedi turǵyndardyń biri Natalá Pasechýk.
Turǵyndardyń aıtýynsha, bul úı 1954 jyly paıdalanýǵa berilgen. Sol kezden beri úıdiń jertólesi birde-bir ret jóndelmegen. Sońǵy kezderi jertóleni tipti sý basyp ketken. Jergilikti ákimdiktegiler Tengrinews.kz tilshisine turǵyndarǵa zańnama aıasynda kómek kórsetiletinin aıtty. Biraq ol úshin sarapshylardyń úıdiń jaramdylyǵyna qatysty qorytyndysyn kerek.
"Turǵyndarǵa ýaqytsha úı berdik. Keıbireýleri odan bas tartty. Turǵyndarmen kúndelikti sóılesip jatyrmyz, olarǵa ne qajet bolyp jatqanyn bilemiz. Olar bul jaǵdaıǵa túsinistikpen qarady. Kómek jaıly aıtatyn bolsaq, aldymen sarapshylardyń qorytyndysyn kúteıik", - dedi Aqtas aýylynyń ákimi Qoıshybaı Súleımenov.
Eske salaıyq, 1 qańtarda Shahtınsk qalasyndaǵy Shahan aýylynda keshki ýaqytta turǵyn úıdiń bir bóligi opyrylyp, 9 adam qaza tapqan bolatyn. Olardyń úsheýi er adam, úsheýi áıel, taǵy úsheýi balalar eken. Al keıin apattyń aldyn ala sebebi atalǵan edi
