17 jyl buryn Ózbekstannan atajurtqa oralǵan qandasymyz Sandýǵash Turmanova áli kúnge deıin QR-nyń azamattyǵyn ala almaı júr. Qazir ol Almaty oblysy, Qarasaı aýdanyna qarasty Jańaqurylys eldi mekeninde segiz balasymen páter jaldap turady. İsherge asy, kıerge kıimi joq kópbalaly otbasy kómek suraıdy. Bul týraly kaztrk.kz habarlady.
Sandýǵash Turmanova 2000 jyly Ózbekstannan otbasymen birge atajurtqa qonys aýdarǵan. Sol tusta onyń qolynda ózbektiń emes, Keńes ókimeti kezindegi qyzyl pasport bolǵan. Biraq sol qujatpen Jańaózenge tirkeýge turǵan. Al 2003 jyly olar Almaty oblysyna kóship kelgen. Ýaqytsha páter jaldap, Altyn Orda bazarynda saýda jasap kún kórgen.
“Bala ústinen bala týyp, pasportty aýystyratyn, jasaıtyn eshqandaı jaǵdaı bolǵan joq. Kúıeýim bazarda júk tasýshy boldy, men balamen úıde otyrdym” deıdi Sandýǵash Turmanova.
Ol Qazaqstanǵa kelgeli 7 qursaq kótergen. Onyń bireýi sábı kezinde shetinep ketken. Ekinshi perzenti úıdiń janyndaǵy sýǵa tunshyǵyp qaıtys boldy. Al qalǵan 8 balany baǵyp-qaǵamyn dep tirkeýge de turmaǵan. Sodan beri 17 jyl ótken. Kópbalaly ana atanǵanymen áli kúnge deıin azamattyǵy joq. Sondyqtan, altyn alqa almaq túgili, memleketten beriletin kómektiń bárinen qaǵylǵan.
“Beseýinde de metrkesi joq. Perzenthanada maǵan anyqtama da bergen joq”, – deıdi ol.
Byltyr joldasy ekeýi bala-shaǵasynyń aýzynan jyryp, tapqan 95 myń teńgesin "jeke kýáligińdi jasap beremin" degen beımálim kelinshektiń qolyna ustatqan. Aqyry ol aldap soǵyp, ushty-kúıli joǵalǵan. Endi eski qujatynan da qaǵylyp otyr.
Kóshi-qon polısıasy budan habardar ekenin jetkizdi. Mamandar olarǵa oralman mártebesin alýǵa kómek beretinderin aıtty.
Qazir tirkeý naýqany júrip jatyr. Sandýǵash bolsa qujat teksertýden qashyp, úıden shyqpaı otyr. Áıteýir balalary mektepke barady. Bul da kóńilge medet. Alaıda olardyń kıerge kıimi, isherge asy joq. Aıadaı bólmede balalardyń ash qursaq júretin kezderi az emes.
Bul otbasy 17 jyldan beri páter jaǵalap, árkimniń tabaldyryǵyn tozdyryp júr. Sondyqtan olar qandaı da bolmasyn kómekke muqtaj.
