«Kóppen kórgen uly toı» - dep jatamyz. Shynymen, qýanyshyń men qaıǵyńdy kóppen birge ortaqtasyp, kóppen birge bólisseń, ol – jaqsy, árıne.

        Degenmen, Abaı atamyzdyń myna bir qara sózin oqyp otyryp, ózgeshe oıǵa qalasyń: «Qazaqtyń jubanyshy - jalǵyz biz be eldiń bári de súıtip-aq júr ǵoı, kóppen birge bolsaq, boladydaǵy degen sózdi jubanysh qylady. Oǵan qudaı taǵala aıtyp pa, kópten qalmasań bolady dep, kópke qaharym júrmeıdi dep. Kópke tuzaǵym júrmeıdi dep. Kópke qorlyq júrmeı me? Bir úıdiń ishi túgel aýyrsa jeńil tıe me? Jer bilmegen kóp adam adasyp júrse, bir jer biletuǵyn kisiniń keregi joq pa?»- degen edi.

      Búginde jalqaý qazaqtyń janyna «Kóppen birdeımiz ǵoı», «Jurttan qalamyz ba?», «Kópten qalmasaq boldy-daǵy» degen jeńil sózder jubanysh. Kóptiń kókeıindegisin aıtar bir jaqsy bolsa, adasqan kópke baǵyt-baǵdar berer bir jan bolsa, nesi jaman? Kóptiń biri emes, kóshtiń «biri» bolý durys shyǵar.

     Taıaqtyń eki ushy bolatyny sekildi, qandaı nárseniń bolmasyn eki jaǵy bolady. Qaı kezde de kóppen birdeı bolý mindet emes qoı. Kóp sózine erip, aıtqanyna kónip, aıtaqtaǵanyna júrseń óz qoltańbańdy qalaı qaldyrasyń, óz jolyńdy qalaı salasyń, óz irgetasyńdy qalaı qalamaqshysyń? Keıingi urpaq kúnderdiń  kúninde ata-babam kóptiń biri bolyp júrip, kórkem dúnıe qaldyrmaǵan dese, nesi jaqsy?! Shyntýaıtyna kelgende, kókeıdegińdi kómeskilemeı, kóńilińdi aldamaı,  jalań úgit, jaıdaq aqylǵa ermeı, ańdaı otyryp, aqyryn basyp, aqyl tarazysyna sala bilgenge ne jetsin?!

     Oıymdy túıinder bolsam,  «Ózen aǵysymen óli balyq qana júzedi»,- degen qanatty sózdi oıǵa alar bolsaq, shyǵa oılap, shyǵandap tirlik etkenimiz abzal.

Nargıza Eres