Aq Jaıyqtyń qos arýyna úılengen aqtaýlyq egizder esińizde me? Jarasymdy januıalar búginde bir shańyraq astynda tatý-tátti kún keship jatyr dep jazady 24.kz.
Tórebek pen Asyl qyz tárbıelese, Joldasbek pen Aıym áýlettiń izin jalǵar ul ósirip júr. Mańǵystaýǵa kelin bolyp túsken egiz qyzdar ekinshi perzentin kútip úıde otyr. Al, Munaıly aýdandyq aýyl sharýashylyǵy ınspeksıasynyń mamany Tólepbergen Uzaqbaevtyń uldary áke jolyn jalǵap, qyzmetke jarap tur.
Arasy on mınýttyq egiz uldardy da birden ajyrata qoıý qıyn. Ata-anasy olardyń otyrysyna qarap anyqtaıdy. Dastarhanǵa aldymen úlkeni, sosyn kishisi jaıǵasady. Jalpy, tárbıeli otbasyda úsh qyz ben ul dúnıege kelgen. Al, el nazaryn aýdarǵan kenjelerdiń egizdermen otaý qurýyna naǵashy ájeleriniń ósıeti sebepker eken.
Lıza Sarbalaeva, egiz uldardyń anasy:
- Aýyrdy bizdiń balalar úshke kelgende. Hal ústinde jatyr degesin baryp qasynda otyr edik: «Áı, Lıza! Tórebek pen Joldasbek ekeýi bir adam, sen bolashaqta solarǵa bir úıdiń balasyn alǵanyń jaqsy-aý» dep qolyn batys jaqqa qaraı sermedi.
Egizder tańerteń jumysqa birge shyǵady. Tórebek inisin joldan tastap, qalaǵa kórshiles aýyldaǵy qyzmetine jetedi. Qaıtarda úıge ala keledi. Qalǵan ýaqytta juptary jazylmaıdy. Baqytty áke kenjeleriniń óńirlik mal sharýashylyǵynyń damytýǵa den qoıýymen shattanady.
Tólepbergen Uzaqbaev, egiz uldardyń ákesi:
- Bireýi zerthanada jumys jasaıdy, bireýi eldi mekende mal dáriger bolyp jumys isteıdi. Jalpy, Qazaqstan boıynsha mal dárigerlik júıege kóp adam barmaıdy. Sebebi, aılyǵyn az kóredi, jumysyn qıynsynady.
Qazaqylyq saqtalǵan óńirde bosaǵa attaǵan egiz qyzdar úıde ulttyq kıimmen júredi. Úlkeni dastarhan jaıyp, as daıarlasa, kishisi shaıdy sheber quıady. Toıdan soń, bir kelin úıge esikten, ekinshisi basqysh qoıylǵan terezeden kirgeni jurtqa ańyz. Al, egizder betashardan soń kelinshekterin aıyra almaı qalǵanyn kúlip eske alady.
Tórebek Tólepbergenuly, egizdiń úlkeni:
- Tanysqannan keıin kúnde kórip júrgen adamdy aıyrasyń ǵoı. Eń qyzyq kezi, úılenetin kezde betterine boıaý jaqqan kezde aıyra almaı qaldyq. Tanymaı qaldyq, shynymyzdy aıtsaq.
Egizder ata-anasyn baǵyp, úsh bólmeli páterde turyp jatyr. Bir-birine uqsas bólmeler ómirge ekinshi sábı kelse, tarlaý bolary ras.
Sondyqtan da, qos ul keleshekte qonys aýdarýdy josparlap júr.
