9-10 jastar shamasyndaǵy jetim bala bazarda arba aıdap kúneltedi. Birde ol arbasyn aıdap, aryn aqshaǵa aıyrbastaıtyn áıelder úıiniń janynan ótip bara jatady da aldynan jolyqqan bir adamnan: «Aǵa, myna jerde adamdar ne isteıdi?» – dep surapty.
Ol kisi: «Bul jer áıel adamdardy aqshamen satyp alatyn jer» – dep jaýap beripti. Bala: «Aaa, solaı ma, áıel adamdy qansha aqshaǵa satyp alýǵa bolady, bilmeısiz be?» – dep qaıtalap suraǵanda álgi adam sasqalaqtap: «Bilmeımin, óte kóp aqsha qajet bolýy kerek, óıtkeni bul jerde kóbinese baılar júredi ǵoı», – depti de tez-tez basyp uzap ketipti.
Sol kúnnen bastap bala ózi qansha ash-jalańash júrse de, kóp aqsha tabý úshin baryn salady. Aılar boıy arbamen júk tasyp, kólik jýyp, otyra qalyp eldiń etigin maılap, saǵyz satyp, ol túgili sýyqta dalada turyp án de aıtyp degendeıin tapqan aqshasyn junaı beripti. Onyń aıanbaı eńbek etip, mańdaı terimen tapqan qarajaty ózi úshin asa qymbat edi. Osylaısha bala birshama aqsha junaqtap alǵan soń álgindegi áıelder satylatyn jerge barypty. Sosyn «Eń ádemisin tańdap satyp alamyn» dep oılap turypty da kózge jyly kórinetin, sarǵysh shashty sulý áıelge jaqyndap kelip, kózi jasaýrap bylaı degen eken:
«Apaı, men kóp aqsha junap, sizdi satyp alýǵa keldim. Meniń qatarlastarymnyń barlyǵynyń da anasy bar. Al mende ana joq. Men anamnyń túrin eshqashan kórmeppin! «Anashym!» dep eshqashan eshkimdi atap kórmedim. Biraq men anamdy álemdegi eń sulý áıel bolǵan dep oılaımyn. Siz de óte sulýsyz. Birneshe aı buryn men osy mańnan ótip bara jatyp bul jerden áıel adamdy aqshaǵa satyp alýǵa bolady dep estidim. Sosyn qýanǵanym sondaı, men óz anamnyń bolǵanyn sondaı tileımin. Sol úshin aı boıy uıqy-kúlkisiz jumys istep aqsha junadym. Ózime Ana taýyp alsam basqasy túk te emes dep ózimdi jubatyp keldim. Siz maǵan ana bolyńyzshy. Men basqa balalarǵa uqsap anany-mynany áper dep mazańyzdy almaımyn. Sizdi renjitpeımin, ashýlandyrmaımyn, jaqsy bala bola alamyn. Ótinemin, maǵan tek qana Ana kerek, eger bul aqshamdy az deseńiz men taǵy da jumys istep, kóp aqsha taýyp Sizge ákeleıin», – depti.
Balanyń sózin jylap turyp tyńdaǵan álgi jas áıel jetimniń mańdaıynan supap, solyǵyn basa almaı: «Balam, álemde satyp alýǵa bolmaıtyn nárseler de bolady. Sonyń ishinde biz aqshaǵa Ana satyp ala almaımyz… Sen maǵan óte kóp nárse túsindirdiń, rahmet, balam! Meniń sen sekildi balam bar, ol úıde kútip otyrǵan bolar, men anamyn, úıime qaıtaıyn, bul jerge endi eshqashan qaıta aınalyp kelmespin. Eshkim de Ana degen adamdy esh jerden aqshaǵa satyp ala almaıtynyn túsindim. Sen maǵan óz qadirimdi túsindirdiń, rahmet saǵan», – dep balany qushaqtap súıipti de betin basyp jylaǵan kúıi úıine qaraı jónelipti…
Zamana.kz saıtynyń jazbasynan
