Ǵalamtorda keńinen taralyp jatqan bul sýret kóptiń ashýyna tıgeni anyq dep habarlaıdy «Qamshy» portaly. Aıgerim Jambylqyzy esimdi Almaty qalasynyń turǵyny óziniń ınstagram paraqshasyna júrgizýshi kýáligin fotoǵa túsirip, onyń astyna «Búgin maǵan júrgizýshi kýáligin satyp alyp berdi. Raqmet saǵan, ákeshim» dep jazyp qoıǵan. 

Iakov Fedorov esimdi feısbýk qoldanýshysynyń oıynsha bul baryp turǵan soraqylyq, shekten shyǵý. Aıgerimniń fotosyn óziniń paraqshasyna salyp, dabyl qaqqan Iakovtyń jazbasynyń astynda pikir qaldyrǵan oqyrmandar qarasy kóp. Kóbisi qyzdyń aqyl-esiniń durystyǵyna kúmán keltirip, qaıǵy-qasiretke alyp keletin jol-kólik oqıǵalardyń deni kýálik satyp alǵandardyń kesirinen bolatyndyǵyn aıtyp Aıgerimdi synap-minedi. Degenmen oqyrmandar arasynda qyzdy jaqtaǵandar da tabyldy. «Kýálik onsyz da satylady ǵoı. 2989 teńge tóleısiń alarda. Bul fotony qandaı maǵynada salǵandaryn bilmeısińder ǵoı. Qyzǵa sonsha atylǵandaryń ne?» deıdi jaqtaýshysy.

Uzynqulaqqa sensek, Aıgerimniń ákesi Almatydaǵy №5 aýrýhananyń dárigeri eken. Aıgerimniń bul fotony qandaı maǵyna, qandaı maqsatpen salǵanyn biz de bilmeımiz. Alaıda ákesiniń, aqshanyń arqasynda júrgizýshi kýáligin satyp alyp, tájirıbesiz bola tura temir tulparǵa otyryp, jol erejesin buzyp, birneshe adamnyń ólimine sebepker bolǵan ondaı balalardy qoǵam jatqa biledi. Aıtqymyz keletini, Úsenovtardyń baryn bile tura bul máselege alańdamaý múmkin emes.

Jazıra Baıdaly