Aldymyzdaǵy aptanyń sońynda, ıaǵnı demalys kúni jarty álem asyǵa kútken otandasymyz Gennadıı Golovkınniń amerıkalyq  Denıel Djeıkobske qarsy jekpe-jegi ótedi. «Gınnestiń rekordtar kitabyna qarsylastaryn kóbirek nokaýtpen jeńgeni úshin engen Genanyń nokaýttar serıasy ary qaraı jalǵasa ma?! Osy ýaqytqa deıin kil myqtylarmen qolǵap túıistirgen otandasymyzdyń aldaǵy qarsylasy qanshalyqty myqty?» degen suraqtardyń tóńireginde boks óneriniń maıtalmandary men óner juldyzdarynan saýalnama júrgizip kórdik.

1.   Denıel Djeıkobs Golovkınge qanshalyqty jáne nesimen qıyn qarsylas dep oılaısyz?

2.   Golovkın bastaǵan qazaq bylǵary qolǵap sheberleriniń elordada boks keshin ótkizýi jaıly ne aıtasyz?

Janqosh TURAROV, kásipqoı boksshy:

DJEIKOBS ÓTE JYLDAM BOKSSHY

1.   Meniń oıymsha, Djeıkobs Golovkınge eshqandaı da qıyndyq týdyrmaıdy. Árıne, bul boksshy da ońaı shaǵylatyn jańǵaq emes, soqqylardan der kezinde qashyp, barynsha qarsylastyń soqqysyn tıgizbeıtin sıaqty artyqshylyǵy bar. Golovkınniń basqa qarsylastaryna qaraǵanda Denıel óte jyldam judyryqtasatyn boksshy. Degenmen, 6 men 8 raýndtyń arasynda Golovkın qarsylasyn sulatady degen oıdamyn.

2.   Golovkınniń qatysyp-qatyspaıtynyn naqty bilmeımin, biraq Qanat aǵalarymyz bastaǵan boksshylar EKSPO kezinde elimizde keremet boks keshin ótkizýi múmkin. Egerde boks keshi ótetin bolsa, mindetti túrde qatysamyz dep oılaımyn.

Jánibek ÁLİMHANULY, álem chempıony:

GOLOVKIN DJEIKOBSTEN BİR BAS JOǴARY 

1.   Jalpy sportta álsiz qarsylastar bolmaıdy. Djeıkobstyń jekpe-jekterine kóz júgirtip kórdim. Bir baıqaǵanym: bul sportshy alǵashqy raýndta joǵary qarqynmen judyryqtasady eken. Degenmen, Golovkınge eshqandaı da qıyndyq týǵyza qoımas. Tehnıkalyq turǵydan da, soqqy jaǵynan da Golovkın Djeıkobsten bir bas joǵary ekeni anyq. Sondyqtan Djeıkobs Golovkınge qarsy tek bes raýnd qana tótep bere alýy múmkin.

2.   EKSPO kezinde tamasha boks keshi ótýi ǵajap emes. Elimizge kelgen álemniń alpaýyt memleketterine qazaq boksshylarynyń qaısarlyǵyn, jalpy qazaq halqynyń myqtylyǵyn tanytqymyz keledi. Egerde EKSPO kezinde sondaı múmkindik bolatyn bolsa, biz mindetti túrde Qazaq eline,jalpy álemge keremet boks keshin tartý etemiz dep oılaımyn. Jalpy, elimizde bundaı dodalardyń jıi ótip turǵanyn qalaımyn.

Eseı JEŃİSULY, jýrnalıs:

DJEIKOBS OTANDASYMYZǴA ERJÚREKTİGİMEN QIYN

1.   Djeıkobstyń asa qaýipti aýrýdy jeńip, boksqa qaıtyp oralýynyń ózi erlikke para-par. Mynadaı nárseni baıqadym: jekpe-jek aldynda aýzyńa ne kelse, sony aıtýǵa bolady. Ózińdi myqty ǵyp, erjúrek qyp kórset, qarsylasyńdy kómip tastaıtynyńdy aıta ber. Biraq sharshy alańǵa shyqqanda Golovkınniń alǵashqy aýyr soqqysyn kótere alasyń ba? Stıvens te, Rýbıo da, Leme de sóıtti, kezdesý aldynda ýádeni úıip-tókti. Biraq Genanyń alǵashqy soqqysynyń ózi-aq olardy táýbesine túsirdi. Djeıkobsti de is júzinde bir-aq kórgen durys. Brýkpen judyryqtasqanda Golovkın ashyq júrdi, kóp soqqy jedi. Osyny azaıtsa eken deımin. Djeıkobs otandasymyzǵa erjúrektigimen qıyn. Bárin sharshy alań kórsetedi.

2.   Eger memleket ózi qyzyǵýshylyq kórsetip jatsa, EKSPO aıasynda aıtýly boks keshiniń ótkeni durys. Bul – bizdiń jetistikterimizdiń kórmesi ǵoı. Onda nege barymyzdy kórsetpeske? «Álem barysy» týrnıri de sol ýaqytqa josparlanyp jatyr. Endeshe, Qanat Islam, Janat Jaqıanov, Beıbit Shúmenov, Gennadıı Golovkın sekildi myqtylar da, jańa boı kórsetip kele jatqan Madıar Áshkeev, Batyr Júkembaev, Isa Aqberbaev, Álı Ahmedov sekildi jigitter qatysatyn kesh uıymdastyrylsa, eldiń rýhy kóteriletin shara bolatynyna senimdimin.

Ermahan YBYRAIYMOV, Olımpıada chempıony:

EKİ QARSYLAS ASA BİR ASHYLYP JUDYRYQTASA QOIMAS

1.   Djeıkobs soqqysy joıqyn boksshylardyń biri bolǵandyqtan, alǵashqy raýndtarda eki qarsylas asa bir ashylyp judyryqtasa qoımas. Gennadıı alǵashqy úsh raýnd boıy qarsylasynyń osal tusyn baǵamdap, tek 4-5 raýntarda ashyq shabýylǵa shyǵady. Al 6-7 raýnd-tyń aralyǵynda Gena qarsylasyn nokaýtqa jiberedi dep oılaımyn.

2.   EKSPO qarsańynda Golovkın men Qanat Islam bastaǵan bylǵary qolǵap sheberleri sharshy alańǵa shyǵyp, kúlli qazaq jankúıerlerine keremet boks keshin tartýy tıis dep oılaımyn.

Baǵlan ÁBDİRAIYMOV, ánshi:

GOLOVKIN DJEIKOBSTEN KİSHİGİRİM

NOKDAÝN ALATYN SIAQTY

1.   Rasynda Golovkınniń karerasyndaǵy eń myqty, qaýipti qarsylas Djeıkobs bolaıyn dep tur. Djeıkobstyń meljemdi boksshy ekeni barshaǵa aıan. Meniń paıymdaýymsha, Golovkın Djeıkobsten kishigirim nokdaýn alyp, eldiń záresin alatyn sıaqty. Sodan keıin ǵana Golovkın qaharyna minip, tamasha jekpe-jek shoý kórsetip, 6-7 raýndta Djeıkobstyń mysyn basady dep oılaımyn.

2.   Golovkın, Qanat Islam, Janat Jaqıanov, Beıbit Shúmenov, Madıar Áshkeev, Batyr Júkembaev, Isa Aqberbaev, Aıdar Sháribaev sıaqty kásipqoı bokstyń sańlaqtary EKSPO kezinde, elordamyzdyń tórinde boks keshin ótkizse, EKSPO úshin de, Qazaq halqy úshin de keremet dúnıe bolar edi.

Danıar ELEÝSİNOV, Olımpıada chempıony:

DJEIKOBS GENANYŃ QATELİGİN

UTYMDY PAIDALANYP KETÝİ MÚMKİN

1.   Denıel Djeıkobs – asa qaterli dertti de jeńe bilgen óte shydamdy boksshy. Sharshy alańda qarsylasynyń is-áreketiniń der kezinde túsinip, aıaǵymen jaqsy jumys isteıdi. Qashyp júrip, óziniń qolaıly sátin kútip, Genanyń jibergen qateligin utymdy paıdalanyp ketýi múmkin. Biraq Gennadıı óziniń aıla-tásilimen, joıqyn soqqysynyń astyna alyp, Djeıkobske esh múmkindik bermeıdi dep oılaımyn.

2.   Árıne, EKSPO qarsańynda mundaı kesh ótse, óte tamasha bolar edi. Boks dese, jalpy sport dese, ishken asyn jerge qoıatyn jankúıerlerdi baqytqa bólep, marqaıyp qalatyny anyq. Qazaq boksshylaryna, qazaq eliniń jankúıerlerine búkil álem tamsana kóz tigip qaraıtyn sát týatyn edi.

Saýalnamany daıyndaǵan Dáýren TÚLKİBAI

 «Ulan», №11