Qazaqstannyń halyq  ártisi «Parasat», «Qurmet» ordenderiniń  ıegeri, 100  jastaǵy Aısha Abdýllınanyń ómiri men shyǵarmashylyǵyna  arnalǵan mereıtoılyq kesh ótkizdi. Keshti Qazaqstan Teatrlary qaýymdastyǵy  uıymdastyrdy, dep habarlaıdy  qamshy.kz     Qazaqparat-qa silteme jasap.

Mereıtoılyq keshte Qazaqstannyń halyq ártisi Asanáli Áshimov Aısha Tókebaıqyzyna Qazaqstan teatrlary asosıasıasynyń atynan 1 500 000 teńge aqshalaı syılyqty tapsyrdy.

Muhtar Áýezov atyndaǵy Qazaq Memlekettik akademıalyq drama teatrynyń dırektory Erlan Bilál ujym atynan jáne QR Mádenıet jáne sport mınıstri Arystanbek Muhamedıuly men Memlekettik hatshy Gúlshara Ábdihalyqovanyń quttyqtaýyn jetkizip, mereıtoı ıesine shapan japty.

«Eń birinshi 18 jasymda «Eńlik-Kebek» qoıylymyndaǵy Eńliktiń beınesin somdadym. Bul meniń eń birinshi basty rólim edi. Qobaljydym, ishteı qatty ýaıymdadym. Sol kúıimdi baıqaǵan Kúlásh Baıseıitova «Qoryqpa, ózińdi erkin usta, árbir sózińdi naqty aıt. Seniń sózińdi eń sońǵy qatarda otyrǵan kórermen anyq estıtin bolsyn»  dep, aqyl-keńesin berdi. Alǵash teatr tabaldyryǵyn attaǵan jastarǵa Kúlásh Baıseıitovadaı kisilerdiń bir aýyz jyly sózi qanat bitiretin. Shabyttandyratyn. Qazir oılap otyrsam sahnada 200-den astam rólde oınappyn. Ár ról janyma jaqyn boldy. Ony senimdi shyǵarý úshin qanshama izdendim, ter tóktim. Sol keıipker bolyp ómir súrdim. «Qyz Jibekte»  Jibek bolsam, «Qozy Kórpesh Baıan sulýda»  Baıan boldym», «Aıman  Sholpanda»  Aıman, «Er Tarǵynda»  Aqjúnis, taǵy basqa kóptegen qoıylymdarda basty róldi somdadym. Sondaı-aq, elimizde tuńǵysh ret qoıylǵan Ýılıam Shekspırdiń «Otella» qoıylymynda Dezdemonany beıneledim. Bul ekiniń birine buıyra bermeıtin baq edi» dep, mereıtoı ıesi ótkendi eske aldy.