Ortalyq Azıanyń Eýrazıa Qory (OAEQ) Qazaqstan Respýblıkasyndaǵy Eýropalyq Odaq Ókildiginiń qoldaýymen «Qazaqstandaǵy osal toptarǵa zańgerlik kómek kórsetý júıesin jetildirý» atty jańa jobany iske qosty dep habarlaıdy qamshy.kz. Joba maqsaty osal toptardyń quqyqtaryn qorǵaýdyń tájirıbesi men mehanızmderin jetildirý, sonyń ishinde olardyń qylmystyq jáne azamattyq ádilettilikke tartylǵan jaǵdaılarda memleket kepildik bergen zańgerlik kómeginiń sapasy men qoljetimdiligin jaqsartý bolyp tabylady.
Grant somasy 311 192 evro. Joba Qazaqstannyń jeti aımaǵyn qamtıdy: Almaty, Ońtústik Qazaqstan, Jambyl, Qaraǵandy, Pavlodar, Shyǵys Qazaqstan, Batys Qazaqstan oblystary. Joba uzaqtyǵy 24 aı (qantar 2017 – jeltoqsan 2018).
Joba OAEQ-nyń Qazaqstandaǵy adam quqyqtaryn, sonyń ishinde halyqtyń osal toptarynyń quqyqtaryn qorǵaý boıynsha joba toptamalarynyń jalǵasy bolyp tabylady. Atalǵan joba memleket kepildik bergen zańgerlik kómegin kórsetýdiń osy kúngi jaǵdaıy boıynsha aýqymdy zertteý júrgizýdi, sondaı-aq, osy saladaǵy zańnamany baqylaý men saralaý isin qamtıdy. Buǵan qosa, Grýzıaǵa josparlanǵan tanymdyq is-sapar barysynda qazaqstandyq delegasıa bul eldiń osal toptarǵa kepildengen zań kómegin qamtamasyz etýdegi oń tájirıbesin egjeı-tegjeıli túrde tanyp-bilýge múmkindik alady.
Atalǵan jobanyń boljamdy nátıjeleri qatarynda osal toptardyń memleket kepildik bergen zań kómegine qol jetkizýdegi negizgi kedergilerdi aıqyndaý, zańnamany jetildirý boıynsha usynymdardy jasap shyǵarý, naqty usynymdardy Qazaqstan Respýblıkasynyń qoldanystaǵy zańnamasyna engizý, sondaı-aq, osal toptarǵa zań kómegin kórsetý deńgeıin kóterý kózdeledi.
Joba «Taldyqorǵan quqyqtyq ortalyǵy» QQ-men seriktestikte, sondaı-aq syrtqy sarapshy, qorǵaýshy Aıman Omarovamen yntymaqtastyqta júzege asyrylatyn bolady. «Bul jobanyń mańyzy asa joǵary, sebebi onyń maqsaty azamattardyń, ásirese osal toptardyń zańgerlik kómekke teń qol jetkizýin qamtamasyz etý. Bul mindetti atqarý úshin, biz, eń aldymen, elimizdegi qorǵaýshylardyń ahýalyn jaqsartýymyz kerek, oǵan qosa, osy saladaǵy aldyńǵy qatarly halyqaralyq tájirıbeni úırený arqyly tıimdi tegin zań kómeginiń mehanızmin qurýymyz qajet», - dep atap ótti Vıktor Ten, joba seriktesi jáne «Taldyqorǵan quqyqtyq ortalyǵy» QQ-nyń dırektory.
