«Bosqyn» mártebesinen aıyrylsa da, aýǵanstandyq azamattyń óz eline qaıtatyn oıy joq, dep habarlaıdy "Qamshy" aqparattyq agenttigi.

Aýǵanstannyń turǵyny Mohammad Pardıs esimdi azamat osy máseleni sheshý úshin «Nur Otan» partıasynyń fılıalyna baryp aryz jazdy. Shymkent qalasynda ómir súrip jatqanyna 2 jyl bolǵan. Búginde jıhaz qurastyrýmen aınalysyp, el qatarly ómir súrip kele jatqanyn aıtady.

Endi «bosqyn» mártebesi alynǵandyqtan azamattyń Qazaqstanda júrýi zańsyz dep tanylǵan. Alaıda, Mohammad óz otbasymen Qazaqstan Respýblıkasynda ómir súrgisi keletini, ózi turyp jatqan jerdi jaqsy kóretinin aıtyp, aryzdanýda. Balalarynyń osynda bilim alǵanyn qalaıtyn ol Aýǵanstanda ómir súrýdiń múmkin emestigin de aıtyp qaldy. Áke balalarynyń ómiri úshin alańdaıdy.

Mamandar tájik ulty ókiline zańǵa baǵynyp, atalǵan qujattardy jınap kelmese, elden eriksiz túrde alastatylatynyn túsindirdi. Nátıjesinde elge qaıtyp múlde kirgizbeý týraly sheshim shyǵýy múmkin ekenin de jetkizdi. Alaıda, bosqyn mártebesin ala almaı júrgen azamat ne bolsa da osynda qalamyn dep bekinip otyr.