2017 jyldyń 11 sáýiri kúni «Ońtústik» óńirlik qolbasshylyǵynda tárbıe, quqyq, kadr máselelerine jaýapty mamandardyń basyn qosqan alqaly jıyn ótti. Óńirlik qolbasshylyqqa qarasty barlyq áskerı bólimdermen tikeleı baılanys ornatylyp, kún tártibindegi ózekti jaıttar jiti saralanǵan selektorlyq jıyndy «Ońtústik» óńirlik qolbasshylyǵynyń tárbıe jáne áleýmettik quqyqtyq jumystar jónindegi orynbasary polkovnık Sabyrjan Súleımenov ashyp, júrgizip otyrdy dep habarlaıdy "Qamshy" aqparattyq agenttigi «Ońtústik» óńirlik qolbasshylyǵynyń baspasóz qyzmetine silteme jasap.

         Sondaı-aq, sharaǵa Almaty áskerı prokýratýrasynyń áskerı prokýrory ádilet kapıtany Arman Qalymov qatysty. Aldymen kún tártibinde Ulttyq ulannyń Petropavl qalasyndaǵy Áskerı ınstıtýtyna oqýǵa talapkerlerdi zerdeleý jumystarynyń barysy qaraldy. Bul jóninde óńirlik qolbasshylyqtyń kadr bóliminiń bastyǵy polkovnık J.Esimhanovtyń atqarylǵan jumystar boıynsha baıandamasy tyńdaldy.

         Bul másele tóńireginde polkovnık S.Súleımenov: «Barshamyz bilemiz – jastar bizdiń bolashaǵymyz. Ómir almasady, jastar jańa oryndy basady. Sondyqtan da eldiń qorǵany da, keleshek ıesi de jastar. El qorǵaý zor abyroı. Áskerı qyzmet úlken senim. Biz Otan qorǵaý qyzmetine maman daıyndaýda óte jiti ári baıypty jumystar júrgize bilýimiz kerek. Jastardyń boıyndaǵy otansúıgishtik rýhynyń, talpysynyń, ór minezi men áskerı adamǵa tán qaısarlyǵynyń tabyn birden baıqap, sol oqýǵa joldama beretin jastyń bolashaqta jaqsy maman bolatynyn ańǵara bilsek ol mindetimizge jetkenimiz», - dep tıisti tulǵalarǵa naqty tapsyrmalar berdi.

         Jıynnyń sońynda áskerı polısıa bóliminiń bastyǵy polkovnık D.Ábdibekov áskerı bólimderdegi quqyqtyq tártiptiń qazirgi kúngi ahýaly jaıly baıandady. Laýazymdy tulǵanyń aıtýy boıynsha qazirgi kúni ásker quramynda aýyr quqyq buzýshylyq derekteri belsendi tómendegen. «Bul nátıjege tárbıeshi mamandardyń, áskerı polısıa, psıholog, komandırlerdiń údaıy qadaǵalaý sharalaryn tyńǵylyqty júrgizýleriniń arqasynda qol jetkizildi», - dep atap ótti.