«Qamshynyń» hat qorjynyna jýrnalıs Qazybek Isanyń tómendegi maqalasy kelip tústi. Halyq qalaýlysy Smırnovanyń eldiń jaǵasyn ustatqan pikirine ózi de yńǵaısyzdanyp, ýaıymǵa salynyp, kúni keshe keshirim suraǵanyn oqyrmanǵa habarlaǵan bolatynbyz. Elbasynyń saıasatyn qoldaýdyń ornyna, bizge túsiniksiz sebepterge baılanysty kertartpalyq áreketke bastaǵan depýtattyń júrekjardy sózderin balanyń áńgimesine balap, ońaı umytyp, birden keshire salatyn dúnıe emes. Qazaqstandyq bola tura qazaqtyń kúıin kúıttemegen ony qoǵamdyq talqyǵa salý oryndy deı kele materıaldy oqyrman nazaryna usynamyz.
«Elbasymyz Nursultan Nazarbaevtyń «Bolashaqqa baǵdar: Rýhanı jańǵyrý» maqalasyn el qýana qarsy alyp, qyzý qoldaýda. Bolashaqqa ıdeologıalyq baǵdar bergen maqalanyń mańyzy orasan ekenin kókiregi oıaý, kózi ashyq árkim de anyq túsinýde. Basty baǵyttaryna basa nazar aýdaryp, ár taraýyn ádiptep jatyr. Ásirese, álemdik ǵylym men tehnologıa tili – latyn álipbıine ótýdi rýhanı táýelsizdik retinde qulshyna qoldaýda.
Biraq kókiregi oıaýlyǵy kúmándi, kózi Kók týdy da kórmes kórsoqyrlar da tabylyp jatyr. Olar alystaǵy aýyl-aımaqtan emes, Astanadan, Parlament úıinen shyqty! Qazaqstan Halyq Komýnıstik partıasynan saılanǵan Májilis depýtaty Irına Smırnova: «Mundaı jolmen Qazaqstan orys áleminen alystap ketedi. Sebebi, kırıllısa joıylsa, bolashaq urpaq úshin bul alfavıt te joǵalady. Bul meni qaıǵyrtady», -dep, beti búlk etpesten betperdesin ashyp aldy…
Bul depýtattyń buryn mektep muǵalimi, mektep dırektory bolǵanyn eskersek, balalarǵa qandaı tárbıe berip kelgenin baǵamdaı berińiz.
Elbasynyń keshegi «Bolashaqqa baǵdar: Rýhanı jańǵyrý» atty el qoldaǵan maqalasy aırandaı uıyǵan halyq birligine daq salarlyq, bir qaryn maıdy shiritetin bir qumalaqtarǵa sabaq retinde jazylǵanyn da eske salamyz: « Bizge tarıh týraly ózderiniń sýbektıvti paıymdaryn tyqpalaýǵa da eshkimniń qaqysy joq»
Hosh, sonymen biz bul Smırnova hanymǵa eldiń kóńilin eleńdetken birer suraq qoıaıyn dep edik.
Birinshiden, ol osydan 26 jyl buryn Qazaqstannyń Táýelsizdik alǵanyn bile me, bilmeı me?
Ekinshiden, ol ózin Qazaqstan Respýblıkasy Parlament Májilisiniń depýtaty emes, sheteldiń, Reseı Dýmasynyń depýtaty sezinip júr me?
Úshinshiden, bul tek oıy buzyq depýtatqa ǵana emes, Qazaqstannyń halyqtyq komýnıstik partıasy basshylyǵyna da aıtylar sóz: Irına Smırnova Májiliske Qazaqstannyń Komýnıstik partıasynan ótti me, joq, Reseıdiń Komýnıstik partıasynan ótti me?
Tórtinshiden, «Qazaqstan orys áleminen alystap ketetin boldy» dep, ózge elde, aıdalada shala búlinip, shabyna shoq túsip jatqan shovınıser shýynyń jaýapkershiligi óziniń moınyna júkteletinin túsine alar saýaty bar ma?
Besinshiden, Elbasy belgilep bergen memlekettik saıasatqa qarsy shyǵatyndaı, ol «orys áleminsiz» kún kóre almaıtyn bolsa, ony kim ustap otyr bul elde?
Biz Májilis depýtaty I. Smırnova men Qazaqstannyń halyqtyq komýnıstik partıasy basshylyǵynan osy suraqtarǵa jaýap kútemiz».
Qazybek Isa
