Bokstan eki dúrkin álem chempıony bolǵan qazaq qyzy Nazym Qyzaıbaı "NK Team" brendimen jeıdeler toptamasyn shyǵardy, dep habarlaıdy Qamshy aqparattyq agenttigi. Bul týraly boksshy Ádilbek Nıazymbetov óziniń ınstagram paraqshasynda jazdy.

"Sport – densaýlyq kepili demekshi, búginde, sport ómirdiń ajyramas bóligi. Salaýatty ómir saltyn ustanatyn azamattar fızıkalyq jattyǵýlar jasaýmen qatar, sporttyq kıimge de nazar aýdarýy tıis. Aıta ketetin jaıt, bokstan álemniń eki dúrkin chempıony Nazym Qyzaıbaı jeńil jeıdeler toptamasyn jurt nazaryna usynbaq. Árıne, qazaq eliniń maqtanyshy, jeıdelerdi sportshylar men sport áýesqoılaryna arnaıdy. Atalmysh jeńil jeıdeler sportpen aınalysýǵa yntalandyratyn jazýlarmen, dáıeksózdermen bezendirilgen.
Osyndaı jeıdeler dostaryńyz ben jaqyndaryńyzdyń kóńilinen shyǵatyny aıqyn. Sonymen qatar, adamnyń qyzyǵýshylyǵy men áýestenýine baılanysty tańdalǵan jeıdeler sport súıer qaýymdy yntalandyryp qana qoımaı, talaı belesterdi baǵyndyrýǵa septigin tıgizedi!", — dep jazady Ádilbek.

Nazym Qyzaıbaı – qazaqstandyq boksshy, qazaq áıelder arasyndaǵy boks chempıony. 2012 jyly Álem chempıonatynyń qola júldegeri, 2014 jyly Ońtústik Koreıada ótken álem chempıonatynda altyn júldege ıelendi.