Osy jyly Reseıde 4 synyp oqýshylarynyń orys tilinen bilimderi mindetti túrde tekserilip, arnaıy test tapsyrmalaryn oryndaıtyn bolady, dep jazady Qamshy AA. Al úlken synyptar óz qalaýynsha tapsyra alady.
Reseı mektepteri oqýshylardyń orys tilinen bilimderin tekserýge kóshipti. Rosobrnadzor baspasóz qyzmetiniń málimetinshe, orys tili boıynsha Búkilreseılik test jumystary 4-synyptar úshin mindetteledi, al qalǵan synyptar úshin qatysý-qatyspaý óz erkinde.
Rosobrnadzor basshysy Sergeı Kravsov aıtyp ótkendeı Reseı mektepteriniń 70%-y orys tilinen tekserý jumystarynyń ótýine kelisimin bergen. Mektepter úshin mundaı jumystar ózin ózi dıagnostıkalaý, sondaı-aq bolashaq josparlarǵa paıdalana alatyn syrtqy baǵalaý úshin kerek bolady.
Seısenbi kúni Kravsov Búkilreseılik test jumystarynyń bastamasyn jasaý úshin máskeýlik gımnazıaǵa at basyn burmaqshy.
Aldaǵy jyly Rosobrnadzor BRTJ-yn úlken synyptarǵa mindettep, qataryna basqa da pánderdi qospaqshy.
Budan buryn Reseıde «Jappaı dıktant qabyldaý» aksıasy ótken bolatyn. Aksıa barysynda 866 qala men 71 aýyldyq aýdandardy qosqanda jalpy sany 200 myń oqýshy dıktant jazǵan. Nátıjesinde, qatysýshylardyń 10%-y ǵana «óte jaqsy» degen kórsetkishke ıe bolǵan. Keńes basshysynyń jetekshisi Natalá Koshkarevanyń aıtýynsha, reseılikter úshin qıynǵa soqqan sózder «konák» pen «sterlád» bolypty.
Al endi óz elimizdegi bilim júıesindegi sońǵy jańalyqtarǵa kóz júgirtip óteıik. Naýryzdyń basynda elimizde Ǵylym jáne Bilim mınıstrligi aqylǵa syımaıtyn baǵdarlama jasaǵan edi. UBT-ǵa birer aılar ǵana qalǵanda Qazaq tilin alyp tastaǵan bolatyn. Qazaq tili suraqtary budan bylaı test tapsyrýshylarǵa «Oqý saýattylyǵy» degen pánniń ishinde kózge kóriner-kórinbesteı kezigedi eken.
Tipti, ulttyq test ortalyǵynyń dırektory Ramazan Álimqulov «Qazaq tiliniń» UBT-dan resmı túrde alynyp tastalǵanyn málimdeı otyryp, «Men orys mektebinde oqımyn delik. Sonda, maǵan ulttyq biryńǵaı testileýde qazaq tilin tapsyrý mindetti emes pe» degen jýrnalısiń suraǵyna «mindetti emes» dep jaýap bergen bolatyn. Bul neni bildiredi? Elimizdegi tildiń mártebesiniń baǵasyn anyq kórsetedi emes pe? UBT-daǵy jańalyq qazaq úshin ǵana emes, Qazaqstan halqynyń bolashaǵy úshin tıimsiz ekeni de belgili edi.
Qarap otyrsaq, Reseı bıligi óz memleketterinde til máselesine nemquraıly qaramaıynyn anyq kórsetip tur. Al, bizdiń elimizde, ókinishke oraı, UBT-dan qazaq tiliniń alynyp tastalǵanyna kóz juma qarady, ózgeris sol qalpynda qalyp qoıa berdi.
