Kóbine jastar qoldanatyn «Vkontakte» áleýmettik jelisinde jumys usynatyn toptar da kóp bolady. Ár qaladan jastar úshin jumys usynatyn sondaı toptardyń biri – Rabota v Aktaý – Jumys Aqtaýda. Farmasevtik orynǵa maman izdegen aqtaýlyq kásipker ózine kerek adamdardyń erekshelikterine toqtala ketip, mátindi bylaı aıaqtaıdy, jaı ǵana emes, bas áriptermen: ÓTİNİSH, STÝDENTTER MEN ORALMANDAR MAZALAMASYN!
Birinshiden, jastar qoldanatyn áleýmettik jelide stýdentter mazalamasyn degen mazmunmen jarnama bergeni qaı sasqany? Stýdentter tájirıbesiz degendi alǵa tartar, bálkim. Alaıda, tájirıbesiz adamdy jumysqa almasa, ol tájirıbeni qaıdan jınamaq?! Maman retinde jańadan jetilip kele jatqan stýdentterdi keýdesinen ıtermeı, bilmegenin úıretip, jumyspen qamtamasyz etý – bilikti mamandardyń mindeti bolýy tıis. Bul – bir.
Ekinshiden, «Oralmandar mazalamasyn» degendi qalaı túsinýge bolady? Stýdentter men oralmandardy jumysqa qabyldamaıtyn bul qandaı kompanıa?
Osy suraqtardyń jaýabyn bilý maqsatynda Qamshy AA-nyń tilshisi habarlamany jarıalaǵan Gaýhar esimdi mamanǵa qońyraý shaldy. Tutqany kótere sala, áıeldiń keshirim suraǵany óziniń qandaı bálege tap bolǵanyn túsingenin bildirip tur. Alǵashynda oralmandar elimizde tirkelmegen, sondyqtan artyq máseleler týyndamasyn dep oıladyq dep jaýap qaıtardy. Keıinnen:
-Men bilgen joqpyn. Qazir zaman basqa. Adamdarǵa senýge qaldyq. Bári aldap ketedi. Keshirińizder, - dep alǵashqyda óz aıtqanynan jaltardy.
«Sonda bul zamanda aldap ketetin oralmandar ǵana ma eken?» deı bergen tilshiden maman keshirim suraýmen ǵana shekteldi. Biraq, habarlama paraqshadan áli kúnge deıin alynbaǵan.
Bul halyqty ekige bólý emeı nemene? Óz elimizde júrip bir-birine jábir kórsetetin tek qana qazaqtar. Mundaı dıskrımınasıadan qashan qutylar ekenbiz?
Qaltasynda kók tıyn bolmasa da, Qazaqstan shańyraq qurǵanda bir ýyǵy bolsam degen nıetpen Otanyna oralǵan oralmandardy aqtaýlyq kásipkerler adam qataryna jatqyzbaı tur. Táýelsizdikten beri Qazaqstanǵa oralǵan sheteldegi qandastarymyzdyń sany 1 mıllıonnan asqan. Bul qýantarlyq kórsetkish. Alaıda, ata qonysyna oralǵan qalyń jurtshylyqtyń Otanyna kelip ornyǵýy ońaı bola qoımaǵanyn da aıtyp ótý kerek. Sonyń ózinde olardyń basym bóligi qazaq qoǵamyna aralasyp, sińisip úlgergen. Elbasy aıtqandaı, endigi maqsat Qazaqstan turǵyndaryn 20 mıllıonǵa jetkizý bolǵan. Munda da arqa súıerimiz sheteldegi qandastarymyz emes pe? Osyǵan oraı, Eńbek jáne halyqty áleýmettik qorǵaý mınıstrligi «Halyqtyń kóshi-qon týraly» zań jobasyn da ázirlegen.
Elimiz qanshama jyldar boıy ańsaǵan táýelsizdikke qol jetkizgende óz Otanymyzǵa qaıtatyn kún týdy dep tóbeleri kókke jetip qýanǵan sol oralmandar boldy. Óz aýasymen tynystap, óz aǵashynyń saıasynda júrgen qandastarymyzǵa biz qoldaý kórsetpegende, kim kórsetedi?
Mańǵystaý jurtshylyǵy men Aqtaý qalasynyń jaýapty organdary men turǵyndarynan mundaı zańsyzdyqqa jol bermeýlerin suraımyz! Qazaqstanda zań boıynsha dıskrımınasıaǵa oryn joq. Endeshe aqtaýlyq kásipker qısynsyz jarnamasy úshin zańmen jazalanady degen úmittemiz.
Qamshyger: Gúlim Jaqan
