Kópbalaly Ospanovtar áýleti jaqynda taǵy bir janmen tolyqty. Ómirge kópten kútken shekesi torsyqtaı ul keldi. Atalarynyń qalaýy boıynsha uldyń esimin Nurtileý dep qoıdy. Baqytty otbasy jaıynda eKaraganda portalynyń tilshisi bilip qaıtty.
Zámzágúl Mamalınova men Dýman Ospanov 7 qyz tárbıelep otyrǵan erli-zaıyptylar. Qyzdarynyń úlkeni 26 jasta, al kishisi 2-de. Dýman «Qaraǵandy Sýda» sheber.
«Altyn alqa» ıegeri atanǵan 42 jastaǵy áıel turmysqa shyǵarda kóp balaly otbasy atanarmyz dep oılamaǵan. Olar áý basta ul bolǵanyn qalaıdy, alaıda 25 jyl boıy taǵdyr otbasyna qyz syılap kelgen. Ana alǵashqy qyzyn bosanǵanda 18 jasta bolǵan. Eki jyldan keıin ekinshi qyzyn bosandy, sóıtip araǵa jyldar salyp taǵy da ómirge tek qyz bala kelip júrdi.
Kópbalaly ata-ana qyzdary úshin qoldarynan kelgeniniń bárin istedi. Jaqsy tárbıe berdi, Joǵarǵy oqý oryndarynda oqytty. Balalarynyń bolashaǵy úshin bar kúshterin jumsady.
Búginde eseıgen eki qyzy óz mamandyqtary boıynsha jumys istep júr. Qalǵan qyzdary ýnıversıtet pen mektep qabyrǵalarynda bilim alýda. Qyzdary ónerden de kende emes. Biri bı bılese, biri án aıtady, endi biri dombyramen kúı shertedi.
Ana aldyndaǵy mindetterdi oryndaýmen qatar Zámzágúl eki oqý ornyn bitirgen (fılolog jáne zańger), búginde 10 jyldyq jumys tájirıbesi bar.
Endi, mine, uıyp otryǵan otbasy kezekti qýanyshtarymen bólisti. Otbasynda ul paıda bolǵanyna ata-ana erekshe qýanyshty.
«Bul kúıeýim ekeýimizdiń úlken armanymyz. Biz naǵyz qazaq otbasymyz» deıdi Zámzágúl.
Qazir Ospanovtar áýleti úsh bólmeli páterde turyp jatyr. Baspanaǵa kezekte turǵanyna 10 jyldan asqan. Buryndary óz úılerinde turǵan eken, alaıda keıbir jaǵdaılarǵa baılanysty satýǵa májbúr bolǵan. Búginde týystarynyń páterin jaldap turyp jatyr.
Qandaı jaǵdaı bolmasyn, erli-zaıyptylar kezdesken ár qıyndyqqa tózip kelgen. Qyzdaryn qatarynan qaldyrmaı, jetildirgen. Ol úshin qyzdary ata-anasyna dán rıza.
«Qandaı jaǵdaı bolmasyn bir-birimizdi tastap ketpeıtinimizge sendim. Balalarymyzdyń boıyna tek jaqsylyqty daryttyq. Bir-birine baýyrmal bolsyn, úlkendi qurmettep, óz halqynyń rýhanı qundylyqtaryn saqtasyn dep ósirdik» deıdi kópbalaly ana.
