Almatydaǵy stýdentterdiń jataqhanasy jalǵa berilgen. Al shalǵaıdan bilim izdep kelgen jastarǵa jasalǵan jaǵdaı kózboıaýshylyq. Stýdentter úıinde jýynatyn bólmesi, jattyǵý jáne oqý zaldarynyń esigi qulyptaýly tur. Almaty qalalyq jastar saıasaty basqarmasy bastap, qoǵamdyq uıymdar qaladaǵy birneshe oqý oryndarynyń jataqhanasyn qarap shyqty. Kútpegen  qonaqtardan tyǵylǵan bógde adamdar men basshylardyń ýáji mynadaı.

Bul týraly Almaty telearnasy habarlaıdy.

Bul Qazaq Ulttyq agrarlyq ýnıversıtetiniń stýdentter úıi. Stýdentterge arnalǵan jataqhanada turatyn adamdar aıaq asty kelgen tekseristi kútken joq. Ár bólmeniń esiginde kimderdiń jáne qaı kýrs stýdentteri túratyny anyq jazylǵan. Sol esikterdiń birinde eshqandaı aqparat joq. İshinen jaýyp alǵan esikti polıseıler ashqyza almady. Jalpy agrarlyq ýnıversıtette onǵa jýyq jataqhana bar. Oqý orny jetekshileriniń aıtýynsha, bir ǵımarat arnaıy qyzmetkerlerge, doktoranttar men magıstranttarǵa berilgen. Qalǵandarynda tek kileń stýdentter turady eken. Biraq tekseris barysynda januıaly jandardyń da turatyny baıqalyp qaldy. Atalǵan ýnıversıtet jataqhanasynda bıyldyń ózinde eki stýdenttiń ómiri qıylǵan. Biraq oqys oqıǵalardy jasyryp baǵýǵa tyrysqan basshylar aqyry ólimge soqtyrǵan istiń oryn alǵanyn rastady. 

«Oqys jaǵdaı boldy. Mynaý jańaǵy qar kóshkini bolyp, bir qyzymyzdy ústinen basyp qalyp, sondaı bir jaǵdaı boldy. Ókinishke oraı»,- dedi Qazaq Ulttyq Agrarlyq Ýnıversıteti Tehnologıa jáne bıoresýrstar fakúltetiniń  dekany, Batyrhan Buralhıev. 

Eskirgen jataqhana, tozyǵy jetken bólmeler, synǵan oryndyqtar, aýystyratyn ýaqyty áldeqashan ótip ketken  káris jelileri, las bólme. «Aqbota» dep atalatyn stýdentter úıiniń qazirgi jaǵdaıy osyndaı. 

«Jataqhanada tolyq jaǵdaı jasalǵan dep aıta almaımyz. Keıbir bólmelerde bizde sylaq qulap jatyr. Keıbir bólmelerde remontty shala-pala jasaǵan. Bizdiń maqsat eki aptanyń ishinde 94 jataqhanany júrip ótip, naqty stýdentterdiń mazasyn alyp otyrǵan jaǵdaılardy joǵary oqý oryndarynyń basshylaryna kórsetý»,- dedi Jastar saıasaty máseleleri jónindegi basqarma basshysynyń mindetin atqarýshy, Shyńǵys Beskempirov.  

Sonymen qatar, Qanysh Sátbaev atyndaǵy Qazaq Ulttyq tehnıkalyq ýnıversıtetiniń jataqhanasy da bar. Jalpylama alǵanda jaqsy kóringenmen, jataqhananyń jipke tizer kemishilikteri kóp. Júzdegen stýdentter jýynatyn dýsh aptasyna úsh aq kún, onyń ózinde ary ketse úsh saǵat qana jumys isteıdi. Al, oqý jáne jattyǵý zaldary stýdentterge emes, zat saqtaıtyn  qoımaǵa aınalǵan. Kirgen shyqqandy qalt jibermeı, qaýipsizdikti qadaǵalaıdy dep qoıylǵan kameralardyń aty ǵana.   

«Ul balalar men qyz balalardyń bólmeleri bir-birine qarama qarsy. Ár túrli kýrstardyń birge jatýy kúsh kórsetý sharalarynyń faktory retinde anyq kórsetip otyr»,- dedi Stýdentter alánsynyń  jetekshisi, Albına Sarıeva.

«Dárethanada tórt kabınka bar. Onyń ekeýi jumys istemeıdi. Jýynatyn bólmeniń ishi las jáne onyń bir rakvınasy jumys istemeıdi. Jataqhananyń turǵyndary remontyna ár bólmege óz qaltalarynan qarjy shyǵarady»,- dedi Jastar kongresiniń jetekshisi, Sandýǵash Sandybaeva. 

Elimizdiń árbir úshinshi stýdenti  Almatyda bilim alady. Bilim alyp jatqan jastardyń sany jalpy 140 myńǵa jýyq. Qalada 38 joǵary oqý orny bar bolsa,olardyń 7-eýi  ulttyq mártebege ıe.  Biraq, bilim berýmen bıznesti de qatar jalǵastyryp jatqan  oqý oryndarynyń barlyǵynda arnaıy stýdentterine arnalǵan jataqhana joq. Al, Almatyda 90-nan astam jataqhana bolsa, onda turatyn qyzmetkerler men izdenýshiler sany ne bary 30 myń.