Qazaq tilinde óziniń ana tilindeı emin-erkin kósilip sóıleıtin, qazaqsha óleń jazatyn, ata-babamyzdyń salt-dástúrin qadirlep, qasterleı bilýmen qatar, ıslam dinin qabyldap, musylmanshylyqty berik ustanatyn orys jigiti Vácheslav Vavılın "Aıqyn" gazetine bergen suhbatynda óziniń tabysqa jetýiniń qupıasymen bólisti. Qamshy aqparattyq agenttiginiń tilshisi orys jigitiniń ónegeli ómiri jaıynda aqparatty oqyrman nazaryna usynady.
Búginde «Generaldar keńesi» respýblıkalyq qoǵamdyq birlestigi tóraǵasynyń keńesshisi qyzmet atqaratyn ol Qazaq kórkemóner akademıasynyń akademıgi atanǵan.
Qazaq tilinde jaı ǵana emes, maqaldatyp sóıleıtin orys jigiti «Tildi meńgerý – óner!» deıdi óz sózinde. Til úırenýge kishkentaı kezinen bastap mán bergen.
«Qazaq tili eńbekpen alyndy. On eki jasymnan qazaqsha úırene bastadym. Mıra degen ustazym boldy. Tildi kishkentaı kezden bastap nasıhattaý kerek, menińshe, elimizdegi barlyq balabaqsha qazaq tiline ótýi kerek, ıaǵnı, bastapqy bilim qazaqsha berilse, tilmen tanysý arqyly balalar salt-dástúrdi meńgeredi, til arqyly qazaq ultyna degen jastaıynan mahabbaty oıanady. Mektepti, joǵary bilimdi qaı tilde alatynyn árkim ózi tańdasyn. Sonda ǵana bolashaqta bir ǵana memlekettik tilde sóıleıtin elge aınalamyz», - dep qazaq tiline degen mahabbaty jaıynda aıtyp berdi.
Váchaslav Almatydaǵy №18 orys mektebin bitirgen. Qazaq-Amerıka ýnıversıtetiniń zań fakýltetin 2002 jyly úzdik dıplommen aǵylshynsha aıaqtady. Qosymsha Qazaq ınjenerlik-ekonomıkalyq ýnıversıtetiniń qarjy jáne kredıt fakúltetin bitirdi.
2003-2004 jyldary Almaty qalasy Almaly aýdany ákiminiń birinshi orynbasarynyń keńesshisi bolyp qyzmet atqardy.
«Memlekettik qyzmettiń qaı túri bolsyn qazaq tilin bilý májbúrligin sezindiredi. Jarıa aıtylmasa da, is qaǵazdary qazaq tilinde bolsyn degen talap bar. Qazir iri mekemelerdiń bárinde zamanaýı jabdyqtalǵan qazaq tiline arnalǵan kabıneti bar. Ókinishke qaraı, basqa ult ókilderine qaraǵanda orys tildi qazaqtardyń óz ana tilin úırenýge degen umtylysynyń joǵyna tańqalamyn», dep memlekettik tildiń mańyzdylyǵy jaıynda aıtty.
Biraz ýaqyt Joǵarǵy sot tóraǵasy Qaırat Mámıdiń kómekshisi bolyp eńbek etken.
2005-2007 jyldary Halyqaralyq áýesqoı boks qaýymdastyǵy Azıa kontınentaldyq AIBA búrosynyń vıse-prezıdenti, sonymen qatar Álemdik áýesqoı boks qaýymdastyǵy prezıdentiniń keńesshisi bolyp qyzmet etti.
Al Islam dinin qabyldaýyna dinı kitapatardy salysytyra oqyp júrgeni sebep bolǵan kórinedi:
«Sábı shaǵynda adamnyń tańdaýy joq. Anam da meni shirkeýge aparyp, hrıstıan qyldy. Biraq óse kele, dinı kitaptardy ózara salystyryp oqı júrip, Bıblıada aqyrǵy paıǵambar Ahmadtyń keletini ap-anyq jazylǵan aıat baryn bildim. Ahmet – Muhammedtiń bir aty. 25 jasymda shahadat aıtyp, Allanyń qalaýymen musylman boldym. Odan bergi 10 jyl ishinde musylman bolǵanyma raqattanyp júrmin. Qazir tájýıd úırenýdemin, tolyq meńgermesem de, Qurandy arabsha erkin oqı beremin. Birneshe parasyn jatqa bilemin».
Búgingi tańda Qazaqstan Kórkemóner akademıasynyń akademıgi bolǵan Váchaslav Vavılın: «Álem sheberi ataǵy bar sýretshi, memlekettik syılyqtyń ıegeri Amandos Aqanaev basqaratyn Kórkem akademıanyń meni ózderine múshe etip qabyldap, akademık etip saılaýy – meniń memlekettegi qyzmettegi jáne qoǵamdyq ómirdegi eńbegimdi, ónerge degen qurmetimdi qazaqstandyq mádenıetke qosqan bir úlesim retinde baǵalaǵandary. Ol úshin kóp raqmet aıtamyn», deıdi.
Eki jyldan beri «Generaldar keńesiniń» tóraǵasy, general-maıor Rústem Qaıdarov myrzanyń keńesshisi qyzmetin atqaryp keledi. Keńestiń maqsaty – erlikti ulyqtaý, urpaqqa otanshyldyq tárbıe berý. Keńes quramyndaǵy generaldar sany 100-den asady. Ár saladan zeınetke shyqqan generaldardyń basyn qosqan bul keńes 2000 jyldyń basynda qurylǵan keńes birneshe ıgilikti jumystar atqaryp keledi.
Máselen, aldaǵy 31 mamyr kúni Máskeýde Keńes Odaǵynyń batyry, qazaqtan shyqqan tuńǵysh armıa generaly, №1 Halyq Qaharmany, Qazaqstannyń eń alǵashqy Qorǵanys mınıstri Saǵadat Nurmaǵambetovtiń músini qoıylmaq. Búgingi tańda keńes músheleri atalmysh sharaǵa daıyndyq ústinde.
«Bul – máskeýlikter úshin ǵana emes, kúlli elimiz úshin mańyzy úlken shara», deıdi el azamaty suhbat berý barysynda.
Váchaslav 2009 jyly úılengen eken. Bir ul, bir qyzy bar. Ulynyń atyn alǵashqy paıǵambardyń esimimen Muhammed ámın dep ózi qoıǵan.
Daıyndaǵan: Gúlim Jaqan
