Patıma!
Meniń seni súıýim haq. Qaı hatymda bolsa da jazǵanymnyń bári shyn. Birin biri bekitedi, bári bireý-aq. Aldyńǵy hatymdy sońǵy hatym rastaıdy. Aldyńǵy sózimnen sońǵy ashyǵyraq. Súıýimniń shyndyǵyna kúdiktenýge oryn bar, biraq eki maǵynada dep uǵynýdyń orny joq. Súıýim shyn, súıýim bútin. Janym da, tánim de sol júregimniń jeteginde. Syrlasaıyn, sóıleseıin, súıeıin — bári bir súıý (lúbov). Bólek-salaq balý, jalǵyz ózim — sózge, syrǵa, súıýge bólip-jarylýǵa qolymnan kelmeıdi. Senen dos izdegende, mahabbat izdegende júregim izdeıdi, janym tileıdi. Aqylym, aılam, jigitshiligim izdemeıdi, izdep, taýyp bitkem. Ekinshi, meniń seni súıýýim — óz jumysym. Súıýim — seni bir nársege de mindettendirmeıdi. Súıý, súımeý — seniń jumysyń.
Meniń hattarym — júregim jumysy. Meniń mahabbatym — sensiń. Menińshe, adamnyń adamshylyǵyna senetin kisige másele ashyq. Hattarym da osyny aıtady. Ásirese sońǵy hatym — seni súıgendigimniń sheginen asyp jazylǵan hat. Súıý — kóńil jumysy. Adamnyń ajaly, ne aýrýy sıaqty belgisiz bir nárse. Ómirde uzaqqa sozylyp, súıegimen birge ketetin bolady. Jaýyndy kúngi jasyndaı jaryq berip óte shyǵatyny bolady. Menińshe, ol adamyna, adamdardyń kóńiline baılanysty. Súıýge srok kesý— benkeniń bekisi, mekemeniń qyzmeti emes shyǵar. Al ózimdi alǵanda — bolashaqty boljap aıtý aqyldyń isi emes. Men ótkenimdi, ústimdegi ómirimdi, búgingi kóńilimdi ǵana aıta alam. Ótkenimdi aıtsam — men súıgen kisimin. 2,5 jyldan beri jyldan beri seniń otyńa kúıgen kisimin. Burynyraq mahabbat bar ma degenge kúdikti qaraǵan, baǵalamaǵan, jabaıy qazaqpyn.
Sońǵy jyldarda barlyǵy túgil, sonyń jan qorlyǵyn tartyp júrgen sorlymyn. Biraq sol ómirdiń ishinde seni súıetinimdi jaryqqa shyǵaryp, saǵan arsyzdyq (nahalstvo) istegenim joq. Syrttan saǵynýmen kelem. Múmkin qadary seni kórmeske, «jaldastyq» ádetin syndyrmasqa ótken jyl jarymdarda tyrysqamyn. Kerek dese, janymnyń jaýabyn, júregim syryn saǵan ashqanym da joq. Aıaǵy bolmady, eriksiz aınaldym. Janym jaı tappaı, seni súıýim jyldan-jylǵa eseıdi. Kúnen-kúnge kúsheıdi. Aıaǵynda shydamadym. Shekten shyqty. Eski tártipti, ádetti buzdym. Saǵan ashyq sóıledim. Hattarymda osy saryn jazyla bastady. Sońǵy hatymda anyǵyn aıttym. Osyǵan qaraǵanda, meniń súıýim jigitshilik te emes. Aqyndardyń áıelge áýestigi de emes. Meniń, seni súıýim — ózime tańdaýly, taýandy mahabbat. Uzaq ómirdiń súıý saryny sıaqty.
18. IV. 1932 jyl
Janym Pátishim!
Men ketip baram. Biz shyqqaly 27-inshi saǵat. Onyń kópshiligi seni oılaýmen ótip keledi. Aqqan ózen, ıir-ıir jaǵa, keıde qoshqyl taýlar, qojyr-qojyr tastar. Kóz aldymda sen... Meniń qazirgi oıym, qıalym — osyndaı ádemi. Keleshek jaryq, nurly sıaqty. Senimen ómir ózgeshe qyzyq sıaqty! Ózimiz árge júzip kelemiz! Kóńil de órge júzip keledi! Senimen sońǵy túni tolǵasyp, sóılese almaı kettim. Sen maǵan tutqıyldan (neojıdanno) aýyr usynys jasadyń. Sen buǵan ózińdi kúni buryn daıyndaǵan shyǵarsyń. Men daıyn emes edim. Óıtkeni men seni bul oıda dep, buǵan keledi dep qıalyma keltirgen joq edim. Ol seni qımaǵandyǵymnan, seniń qabaǵyńa qaraǵandyǵymnyń saldary edi! Menen sen batyl shyqtyń, men qýandym! Áńgimeni sen ashtyń. Men qansha daıyndyǵym bolmasa da, senimen qol alystym, shynyń ba? dep, eki qaıyrdym.
«Shynym» dediń. Sonda meniń kózimnen jyly jas tamyp ketti. Árıne otyrǵan jerim qarańǵy edi ǵoı. Sonan keıin ne bolǵanymdy kópke sheıin bilgenim joq. Senimen qalaı qoshtasqanymdy da bilmeımin... Sóıtip, biz máseleniń negizin sheshtik. Biz jalǵyz kóńildiń ǵana emes, ómir máselesin sheshtik! Endi áńgime, bitti ǵoı... Men qandaı «jaqsym» bolsa da, sen úshin qurban etem degemin... Endigi isti, jumysty, bar tirshilikti osyǵan daıyndyqqa qaraı yńǵaılaı berý kerek... Pátishim! Ómirdiń keleshegi nurly elesteıdi. Menen jańa qaırat, jańa qýat týatyn sıaqty. Ótken ómirdiń eski qorshylyǵy, armany bári bitip, bári tolyp, kóńil de, ómir de jańadan qaıta ósetin sıaqty! Baqytty bolatyn sıaqtymyz! Sen maǵan áli sózge sarańsyń. Óz kóńiliń, óz oıyń qalaı, áli aqtarǵan joqsyń. Biz aıtpaǵan sóz qalǵan joq, endi shyndap sóılesýdiń, súıisýdiń, bylaısha aıtqanda ómirdi qyzyqtaýdyń ekeýmizdiń aramyzdaǵy perdesi ashylyp bitti.
Shyn sezimdi aıtysyp, jazysyp, sóılesýdiń, súıisýdiń ózi — olja ómir, qyzyq emes pe? Men senen hat kútem! Ózim taǵy da hat jazarmyn. Men, ár ýaqyt seni oılaımyn. Oıym, sezimim — bári de senimen áýre! Mine, bir óleńdi dápterimnen kóshirip jiberdim. Bul óziń súıgizetin túni uıyqtaı almaı jatqandaǵy jazylǵan. Janym, qosh, qatty qysyp súıdim! Súıdim!
Súıikti Patıma!
Hatyńda alyp, hat jazýǵa asyǵyp otyrmyn. Senen hat alsam, jaýap jazýǵa asyǵam. Óıtkeni seni saǵynam. Seni oılaımyn... Men járdemdi senen kútem. Sen – maǵan úlken qýatsyń. Senimen sóıleskim keledi, senimen habarlasqym, hattasqym keledi. Meniń saǵan jazǵan hattarymdy osy sarynnyń barlyǵyn jasyrýǵa bolmaıdy. Sen meniń bul sózimnen álde nárse oılaýyń múmkin, biraq onyń bári qate. Men senen esh nárse de kútpeımin. Meni qalaı baǵalasań, ne deseń – seniń óz erkiń.
Men seni qatty jaqsy kórem, qatty súıem, biraq meniń bul súıýim seni esh nársege mindettendirmeıdi... Men syqyldy meni de saǵynýdy, súıýdi, syılaýdy — men senen kútpeımin. Sen ony isteme... Menen gráznyı nárse jáne kútpe... Onda qatalasqanyń... Meni bosqa kúıdirýshi balma... Maǵan keregiń — járdemiń, dostyǵyń. Men tek, saǵan janymdy jeńiltip, syrymdy sóıleıtin bolaıyn. Sen meniń sózimdi kóteredi, túsinedi dep oılaımyn. Eger sen meniń saǵan aıtqan bul syrlarymdy baǵalasań — meniń ómirimde bir tereń iz qaldyratyn bir jaqynymsyń. Osy týraly tolyq jaýap jaz. Óz pikirińdi aıt, sheshile aıt. Bir-birimizdi úgitpen uǵyndyryp jatatyn kisi emespiz ǵoı. Ashyq jaýap kútem...
İlıas. 22/ III
Derekkóz: Ádebıet Portaly
