Metú men Danıela shańyraq kóterdi. Jeti aı ótkennen keıin qaıǵyly jaǵdaı boldy. Metú iri jol-kólik apatyna tústi. Sonyń saldarynan komaǵa túsip, birneshe aıǵa tósekke tanyldy. Ol jasandy tynys alý appartymen ǵana tynys alyp, sol arqyly júregi soǵyp turdy. Dárigerler Danıeldi apparattan óshirýge keńes berdi. Sebebi mundaı jaǵdaıdaǵy adamdardyń tek 10% oıanady eken. Kóbi ómir boıy tósekke tanylyp, estússiz jatady. Alaıda Danıela dárigerlerdiń usynysyn ashýmen qabyldady. Sebebi súıikti jaryn óz qolymen óltirý onyń eshqashan oıyna kelgen emes.
Danıela kúıeýin úıine alyp ketip, oǵan ózi qarady. Oıanatyn adamdardyń 10% ishinde Metú da bolady dep sendi. Uzaq jyldar boıy Danıela ǵajaıypqa sendi, kútti. Áıeldiń ata-anasy oǵan dárigerdiń usynysyn qabyldaýǵa úgittedi. Kúıeýi endi oıanbaıtynyn aıtyp, jańa ómir bastaýǵa keńes berdi. Onyń jastyq shaǵy men ómiri naýqas kúıeýine qaraýmen ótip jatqanyn jáne jeke ómirine nuqsan keltirip jatqanyn alǵa tartty. Ata-anasy Danıelany jigittermen tanystyrýǵa talpyndy. Bireýge ǵashyq bolsa óz oıyn ózgertedi dep sendi. Alaıda Danıela eshkimge qulaq aspady. Tek Metúdi súıetinin jáne ol tiri kezde oǵan adal bolatynyn aıtty. Ol jatsa da, tursa da qudaıdan kúıeýiniń saýyǵyp ketýin tiledi.
Jasandy tynys alý apparatyna da aı saıyn qomaqty qarjy qajet boldy. Danıela negizgi jumysynan bólek, qosymsha jumys istedi.
Bes jyldan keıin Metú kózin ashty. Ony «ósimdik» sanatyna kirgizgen dárigerlerdiń boljaǵany bolmady. Kúıeýi esin jıǵanymen barlyǵyn umytyp qalǵan. Tipti óz áıeli de esinde joq eken.
Súıikti jarynyń qamqorlyǵy men mahabbatynyń arqasynda onyń jaǵdaıy kúnnen-kúnge jaqsaryp keledi. Ol kishkentaı bala sekildi barlyǵyn basynan úırenip júr. Júrýdi, sóıleýdi, qasyqty ustaýdy jáne t.b. Munyń barlyǵyn Danıela yjdaǵattylyqpen, mahabbatpen kúıeýine úıretýde. Qazir Danıela óte baqytty ekenin aıtady. Al Metú Danıela sekildi adamnyń ómir jolynda kezdeskenine jáne jar tańdaýda qatelsepegeni úshin qudaıǵa kúnde alǵys aıtyp, áıeline sheksiz rıza ekenin aıtady. Aıaǵyna tik turyp, qalypty ómirge oralǵannan keıin Danıelany baqytty etý úshin qolynan kelgeniniń barlyǵyn jasaýǵa ýáde berdi. Muny estigen Danıelanyń onyń oıanǵanynyń ózi ol úshin baqyt ekenin aıtady.
Daıyndaǵan: Ásem Álmuhanbet
