Emma Ýıverdiń kúıeýi AQSH áskeriniń joǵarǵy leıtenanty Todd Ýıver Aýǵanstandaǵy qyzmeti barysynda óltirilgen. Áıeli ómirindegi kúıeýimen baılanystaryǵan bar dúnıeni jınamaq bolady.
Jerleý rásimi aıaqtalyp 2 kún ótken soń Emma kúıeýiniń noýtbýgyn ashady. Sol kezdegi kórgeni áıeldiń kózine eriksiz jas keltirgen.
Jumys ústelinde eki Word qujaty turdy. Birinde «Qymbatty Emma» dep, endi birinde «Qymbatty Kaılı» dep turdy. Kaılı ekeýniniń jalǵyz qyzdary edi.
Janary jasqa tunǵan Emma qujattardy ashyp, Todd qaldyrǵan hatty oqı bastady.
Emmaǵa jazylǵan hattyń mazmuny mynadaı edi:
Qymbatty Emma!
Eger sen bul hatty ashqan bolsań, men úıge qaıtpadym degen sóz. Saǵan degen mahabbatymdy taǵy da jetkize almadym degen sóz.
Men seni qatty súıemin, ómir boıy súıip ótetin bolamyn. Janyńda bolmasam da, saǵan joǵarydan qarap júretinimdi oılap, kóńlim jaı tabady.
Men árdaıym seniń janyńdamyn, meniń rýhym senimen birge. Qazir qınalyp otyrǵanyńdy bilem, biraq sen myqtysyń ǵoı.
Umytpa, Qudaı biz úshin qalaı jaqsy dep tapsa, sony isteıdi, bizge tek jaqsylyq tileıdi. Munyń bári kezdeısoq bolǵan jaǵdaılar emes. Sený qıyn, bilem, biraq soǵan kóziń jetetin kún keledi.
Men úshin seniń ornyń mańyzdy, sony bilip júr. Janymda senen ózge qamqor, sulý, meıirimdi jardy elestete almaımyn. Senimen ótkizgen ár kúnim – ómirimdegi eń keremet shaqtar.
Múmkin ómirim tym qysqa bolǵan shyǵar, biraq men árkimge buıyra bermeıtin eń keremet kúnderdi bastan keshtim, sheksiz baqytty boldym. Sebebi, álemdegi eń minsiz jar maǵan tıesili body, eń súıkimdi, eń tátti qyz meniki boldy. Tipti eń adal ıtter mende boldy. Budan artyq ne kerek? Janyń jabyrqasa, ekeýmizdiń baqytty sátterimzdi esińe al. Bizdiń qyzymyzǵa qara da, onyń asqan sulýlyǵyn kór.
Qyzymyz úshin myqty bol. Ákesi ony qatty jaqsy kóretinin kúnde esine salyp júr.
Onyń dúnıege kelgen kúni meniń ómirimdegi eń baqytty kún boldy. Onyń kúlkisi, jymıǵany – meniń ómirimniń ǵajaby. Ákesi ony árdaıym qorǵap júretinin bilsin.
Seni sheksiz súıemin, Emma. Baqytym osymen támam dep oılaýshy bolma. Baqytyńdy izdeýdi jalǵastyr. Bul múmkin emesteı kórinedi, bilemin, biraq eńseń túspesin.
Alda seni jaqsy kúnder kútip tur. Kaılı ekeýiń áli de talaı baqytqa kenelesińder.
Seniń kúıeýiń, Todd.
Kelesi hat Kaılıge tıesili, mazmuny mynadaı:
Qymbatty Kaılı, kúnim meniń!
Meni esińe túsire almaıtyn shyǵarsyń, biraq ákeńniń seni qatty jaqsy kóretinin umytpa.
Sen 9 aılyq bolǵanda men Aýǵanstanǵa attandym. Seni tastap, alysqa attaný men úshin óte qıyn boldy.
Sen meniń kúnimsiń ǵoı, barymsyń, qudaıdyń bergen eń keremet syıysyń.
Seniń dúnıege kelgen kúniń – meniń ómirimdi túbegeıli ózgertken kún.
Sen kúlgen saıyn, men erekshe baqytqa kenelemin. Meniń ómirimdi jaryq kúnge aınaldyrǵan asyl qyzym, seniń qalaı óskenińdi kóre almaıtynyma qatty ókinemin.
Biraq, esińde saqta – ákeń árdaıym janyńda.
Sen álemdegi eń baqytty qyzsyń, sebebi seniń keremet anań bar. Tártipti qyz bolyp, anańa qashan da qolǵabys bol.
Ár túni anań úshin duǵa et.
Biz seni bar jan-tánimizben jaqsy kóremiz. Mektepke barǵanda, kóp izdenýge, kóp bilýge umtyl.
Aınalańa qamqorlyqpen qara, meıirimińdi tók, sol kezde tabıǵat saǵan bar jaqsylyǵyn tógedi.
Eger bári sen qalaǵandaı bolmasa, umytpa, Qudaı saǵan neniń kerek, neniń kerek emes ekenin jaqsy biledi.
Seniń bolashaǵyń jarqyn.
Ómir súr. Kóńil kóter. Ákeń senimen maqtanady, seni jaqsy kóredi.
Úlken mahabbatpen, ákeń.
Hatty oqyǵan Emma álemge jar salýdy oılamaǵan, alaıdy bul hattar jaqynyn joǵaltqan ózge adamdar úshin kúsh berýi múmkin. Sóıtip, áleýmettik jelige taratty.
Sholýshy: Gúlim Jaqan
