-Allo, bul izdeý búrosy ma? Telefonnyń ar jaǵynan kishkentaı balanyń daýsy estildi.

-Iá, balaqaı. Birnárse joǵalttyń ba?

-Men anamdy joǵalttym. Ol sizderde emes pe?

-Anańnyń qandaı ekenin aıtshy, qáne?

-Ol – óte sulý, meıirimdi. Sosyn ol mysyqtardy jaqsy kóredi.

-Saǵan jaqsy jańalyǵymyz bar. Keshe bir anany tapqanbyz, seniń aıtqandaryńmen sáıkes keledi. Sen qaıdan habarlasyp tursyń?

-№3 jetimder úıinen.

-Jaqsy, jaqynda saǵan anańdy jiberemiz. Kút.

Mine, bólmege eń sulý, meıirimdi, qolyna mysyq ustaǵan áıel kirip keldi.

-Ana! – qýanyshtan aıqaıǵa salǵan bala áıelge qaraı júgirdi. Ony qushaqtaǵany sonshalyq, eshqashan jibermesteı kórindi. – Anashym meniń!

Artem óziniń daýsynan ózi shoshyp oıandy. Mundaı tústerdi sońǵy kezderi jıi kóretin boldy. Qolyn jastyǵynyń astyna salyp, qyzdyń sýretin alyp shyqty. Sýretti aýlada oınap júrgende taýyp alǵan eken. Sóıtip, ony kóziniń qarashyǵyndaı saqtap keledi, sebebi sýrettegi álgi qyzdyń anasy ekenine senimdi boldy. Ár túni sýretke qarap jatyp, uıyqtap júrdi.

Tań ata jetimder úıiniń meńgerýshisi Angelına Ivanqyzy ádettegideı bólmelerdi aralap, ár balany súıip shyqty. Artemniń janyna jaqyndaı bergende tóseginiń astynan qyzdyń sýretin baıqap qalady. Sýretti kóterip, Artemnan kim ekenin suraıdy.

-Artem, myna sýret sende qaıdan júr?

-Kósheden taýyp aldym.

-Bul kim?

-Meniń anam. Ol ádemi, meıirimdi jáne mysyqtardy jaqsy kóredi, - dep jymıdy balaqaı.

Meńgerýshi oıǵa batyp ketti, sebebi sýrettegi qyzdyń kim ekenin jaqsy bildi. Ol erikti dostarymen jetimder úıine kelip turatyn, sýretin sol kezde túsirip alǵan bolý kerek. Qyzdyń bala asyrap alǵysy kelgen nıeti de joq emes edi, sol úshin kóp kúsh jumsady. Alaıda turmysta bolmaǵandyqtan bul múmkin emes edi.

-Bul seniń anań bolsa, onda isti ózgertemiz, - dedi Angelına Ivanovna.

Birneshe kúnnen soń meńgerýshiniń bólmesine sýrettegi qyz kirdi de, qujatqa toly papkasyn ústel ústine qoıdy.

-Mine, bárin jınap bittim, - dedi.

-Jaqsy, Alına. Sizge qoıatyn birneshe suraǵym bar. Úrdis sondaı. Siz óte úlken jaýapkershilikke baryp turǵanyńyzdy bilesiz be? Balany ómir boıyna alyp tursyz...

-Bárin túsinemin. Bilesiz be? Bir adamǵa kerek ekenimdi bilip turyp birge emes ekenimizdi oılasam, janym jaı tappaıdy.

-Jaqsy, balalardy qarap shyqqyńyz kelmeıdi me?

-Joq, qaramaımyn, Angelına Ivanqyzy. Siz ákelgen alǵashqy balany alamyn, - dedi Alına.

Mundaı jaýapty kútpegen Angelına qyzǵa kózin almastan qarap qaldy.

-Bári naǵyz analardyń basynan ótkergendeı bolǵanyn qalaımyn. Analar balasyn tańdamaıdy ǵoı. Men naǵyz ana bolǵym keledi, - dedi qobaljyp otyrǵan Alına.

-Dál osyndaı asyrap alýshylyqty birinshi ret kórýim. Sizdiń kimge ana bolatynyńyzdy men bilemin. Onyń esimi Artem, jasy 5-te, týǵan anasy perzenthanalar úıinde-aq balasynan bas tartqan. Daıyn bolsańyz, qazir ákeleıin, - dedi meńgerýshi.

-Daıynmyn, maǵan ulymdy kórsetińiz.

Bólmeden shyǵyp ketken meńgerýshi biraz ýaqyttan soń balamen keldi.

-Artem, tanysyp qoı, bul...

-Ana! - dep aıqaı saldy Artem. – Anashym!!!

 Alınany qushaǵyna basqan balanyń qýanyshynda shek joq.

-Balam, balam meniń... Men endi seniń janyńdamyn...

Sóıtip qujattaryn daıyndap bolyp, Alına Artemdi alyp ketpek bolady. Balanyń júzi bal-bul jaınaǵan, tipti anasynyń qolyn bir sátke de jibermeıdi. Bár daıyn bolǵan soń bala meńgerýshimen qoshtasyp, jetimder úıinen shyǵyp ketedi.

Úıine qaıtyp bara jatqan bala anasyna mańyzdy suraǵyn qoıady:

-Ana, sen mysyqtardy jaqsy kóresiń be?

-Qatty jaqsy kóremin. Meniń eki mysyǵym bar, - dep jymıdy Alına ulynyń kishkentaı ǵana alaqanyn qysyp.

Jaýapqa rıza bolǵan Artem qadamdaryn nyq basyp, kóńildi júzben anasynyń artynan erip keledi. 

Daıyndaǵan: Gúlim Jaqan