Búgin Aqtóbede qalasynda ornalasqan «Meıirim» jastar úıine Keńes Raqyshev pen Ásel Tasmaǵambetova keldi. Qazaqstannyń baı mesenattary Aqtóbeden jetim balalarǵa arnalǵan ortalyq salyp berdi dep habarlaıdy Qamshy aqparattyq agenttigi  Aktobenews.kz- ke silteme jasap.

Jastar úıin salý úshin Imanǵalı Tasmaǵambetovtyń qyzy men kúıeý balasy otbasylyq búdjetterinen 1,5 mlrd qarjy jumsalǵan.

«Ortalyq týraly aýyzymyzdy toltyryp aıtýǵa bolady. Qazaqstanda osyndaı áleýmettik balalar úıi birinshi ret Aqtóbeden ashylyp jatyr. Bul jerde barlyq jaǵdaı jasalǵan. Ata-anasynyń qamqorlyǵynsyz qalǵan balalar óz úıinde turǵandaı seziný kerek. Ortalyq ishinen birneshe seh ashyldy. Balalar jumys istep úırenip, ózderin damytsa deımiz. Qazirgi zamanda jastar masyl bolmaý kerek. Osy balalardy qýantyp jatqan sizderge alǵys aıtamyn. Ramazan aıynda jasaǵan istiń saýapby úlken. Adam árqashan alǵys alyp júrý kerek», – dedi Aqtóbe oblysynyń ákimi Berdibek Saparbaev.

Ortalyqtyń ishi men syrtyn oblys ákimimen birge aralap shyqqan qonaqtar bul Aqtóbege jasap otyrǵan sońǵy kómekteri emes ekendikterin jetkizdi.

«Sábı» qaıyrymdylyq qorynyń usynysymen salynǵan «Meıirim» jastar ortalyǵynyń ashylýymen barshańyzdy quttyqtaımyn. El bolashaǵy jastardyń qolynda. Sol sebepti bul jobanyń mańyzy zor. Ortalyqta tek baspana berilip qana qoımaıdy. Olardyń osy jerden mamandyq alýyna da jaǵdaı jasalǵan. Osy bastamamyz ári qaraı damıtynyna senemin. Mundaı ortalyq Qazaqstanda birinshi ret salyndy. Bul Aqtóbedegi bizdiń alǵashqy jobamyz emes. Múgedekterge kólik pen birneshe balalar alańynyń qurylysyn salyp berdik. Búgingi sharanyń bizdiń qaıyrymdylyq qorymyzdyń 15 jyldyǵymen tuspa-tus kelgenine qýanamyz», – dedi Tasmaǵambetova.

«Meıirim» ortalyǵynda 16-29 jas aralyǵyndaǵy balalar úıiniń túlekteri turatyn bolady. Qazirgi ýaqytta onda 88 tárbıelenýshi qabyldanǵan. Mamandar tárbıelenýshiler sany 110-ǵa jetetin aıtty. Ortalyqtyń 5 korpýsy bar.

Sholýshy: Aıgerim TAÝBAI