Keıde úlken kisilerden góri búldirshinderdiń aqylyna, danalyǵyna qaıran qalasyń. Ómirge endi ǵana qadam basyp kele jatqan kishkentaı balaqaıǵa qarap, ózińdi tárbıeleısiń, boı túzeısiń. 6 jastaǵy Elena Desserıchtiń nebári 6 jylǵy ómiri adamzatqa ǵasyrlar boıy úlgi bolyp qalary sózsiz.

Óziniń óletinin bilgen 6 jasar qyz úıdiń ár buryshyna otbasyna arnalǵan hattar qaldyrǵan. Hatynda búldirshin júrektiń sýretin salyp, ákesine, anasyna, sińlisine degen mahabbatyn jetkizdi.

Elena Desserıch atty búldirshinniń mıynda qaterli isiktiń bary anyqtalǵanda, jasy nebári 6-da edi. Birneshe aıy ǵana qalǵanynan habardar qyz óziniń óliminen keıin otbasy qýanyp qalsyn degen nıetpen birnárse qaldyrmaq bolady. Ol úshin 100-ge jýyq hat jazyp, úıdiń ár buryshyna tyǵyp qoıdy.

Elenanyń mahabbatqa toly hattary sórelerde, kitaptardyń betterinde, qoraptarda jatty. Ár hatynda kúlki men júrekterdiń sýreti salynyp, «Men sizderdi jaqsy kóremin, ana, áke, Greıs», «Aýrýǵa shaldyqqanym ókinishti» dep jazylǵan.

«Elena aqyldy qyz bolatyn. Ózinen kishi qyzdarǵa kómektesip, úlkenderdiń qınalǵanyn kórse, jubatyp júretin» deıdi Elenanyń ákesi.

Elenanyń aýrýy qaterli isiktiń sırek kezdesetin túrlerine jatatyn, ol kezde aýrýǵa shıpa bolatyn dári-dármekter de bolmaǵan. Ákesiniń aıtýynsha, qyz munyń bárin jaqsy bilgen, sezgen, alaıda ózi úshin emes, sińlisi úshin ýaıymdaıtyn.

Dert qyzdy kúnnen kúnge soldyra berdi. Alǵashynda daýsynan aıyryldy, sóıtip jıi talmasy ustap qalatyn boldy, biraq bul qıyndyqtar qyzdyń hat jazýyna bóget keltirgen joq. Elenanyń qurmetine ata-anasy ózge qaterli iskke shaldyqqan balalar úshin qaıyrymdylyq qoryn ashty.

Sholýshy: Gúlim Jaqan