Bul oqıǵa Ivan esimdi bala týraly. Alaıda bul tek bir balanyń ǵana oqıǵasy emes, álemdegi mıllıondaǵan balanyń aýyr taǵdyryn sýretteıdi.

Meniń esimim Ivan. Jasym 7-de. Men ákem men anamdy óte qatty jaqsy kóremin. Alaıda olardan qatty qorqamyn. Olar meni jıi urady.

Men tań erteń turdym da, mektepke kettim. Men jaqsy oqýshymyn. Sondyqtan muǵalim meni jaqsy kóredi.

Synyptastarym jaqsy. Alaıda meniń dostarym joq. Sondyqtan úzilisterde bos synypta jalǵyz ózim otyramyn. Nege ekenin bilmeımin, eshkim menimen oınaǵysy kelmeıdi. Men basqa balalarmen dos bolýǵa tyrystym. Alaıda olar mennen jıirkenetinderin aıtty.

Bálkim, men kúnde bir kıimdi kıetinime kúletin shyǵar. Bir kúni kıim aýystyratyn bólmege kirip, bireýdiń kúrteshesin urlap kettim. Odan keıin úıge qaıttym. Dala óte sýyq edi. Qatty jel soǵyp turdy. Kenetten bireý artymnan qatty ıterip jiberdi. Sonyń saldarynan qarǵa qulap tústim. Itergen synyptastarym eken. Olar: «Seni barlyǵy jekkóredi» dedi.

Olar birneshe ret arqamnan, ishimnen uryp qashyp ketti. Men sýyq qarda jattym. Men jyladym. Tońǵannan nemese aýyrǵannan emes, barlyǵyn jaqsy kórsem de birde-bir dosymnyń joqtyǵynan jyladym.

Úıge kelgende anam meniń kir kıimimdi kórip, shashyma jabysa ketti.

«Qaıda júrsiń? Nege ústińniń barlyǵy kir, sý? Tamaq ishpeısiń. Bar da bólmeńnen shyqpaı otyr» dedi anam.

Men anamnyń aıtqanyn eki etpeı bólmeme bardym da ol jerde tańǵa deıin otyrdym. Qarnym ash bolǵanyna qaramastan bólmemnen shyqpadym.

Meniń sabaǵym kúnnen-kúnge tómendeı berdi. Bul týraly ákem bilgende soqqynyń astyna alatyn. Bir kúni qatty urǵandyǵy sonshalyq suq saýsaǵymdy qımyldata almaı qaldym. Ony synyptastarym mazaq etti.

Túnde keýde tusym qatty aýyra bastady. Men tósekte jatyp keýdemniń aýyrýy qoısa eken dep armandadym. Sebebi men ata-anamdy ashýlandyrǵym kelmedi.

Kelesi kúni mektepte armandarymyzdy qaǵaz betine túsirýge tapsyrma berdi. Mennen basqalarynyń barlyǵy kólik, zymyran men ádemi qýyrshaqtardy saldy. Olar meni qyzyqtyrmaǵandyqtan emes. Meniń eń úlken armanym ata-anamnyń meni jaqsy kórýi edi. Sondyqtan men anamdy, ákemdi jáne ózimdi saldym. Olar birge oınap otyrdy. Muny salyp otyrǵanda kózime jas keldi. Men ata-anamnyń meni qatty jaqsy kórgenin armandaımyn.

Sýretti kórsetetin meniń kezegim jetti. Men taqtaǵa shyǵyp sýretimdi kórsetkende synyp dý kúldi.

 «Meniń eń úlken armanym - otbasy» degenimde kúlkileri kúsheıe tústi. Sol kezde men jylap jiberdim.  

«Ótinemin kúlmeńizder. Bul shynymen de meniń eń úlken armanym. Sender meni jekkóretin shyǵarsyńdar. Alaıda ótinemin meniń armanyma kúlmeńdershi! Men de senderdikindeı ata-ana bolǵanyn qalaımyn. Olar meni qushaqtap, menimen birge kúlgenin qalaımyn. Ata-anam meni mektepten alyp ketip, menimen birge oınasa eken deımin. Bilemin, men súıkimsizbin, álsizbin, bir saýsaǵym qımyldamaıdy. Alaıda maǵan kúlmeńizdershi!» dedi Ivan.

Muǵalim meniń kóz jasymdy súrtýge tyrysty. Keıbir balalar meni túsingendeı boldy. Alaıda basqa balalar kúlýin toqtatpady.

Bir kúni  baqylaýdan eki aldym. Meniń anam qatty ashýlanatynyn bildim. Anam kúndelikti kórgennen keıin yzamen ony jerge laqtyryp jiberdi. Odan keıin eki ret basymnan urdy da, bólmeden shyǵyp ketti. Qaıtyp kelgende meni edenge qaraı ıterip jiberdi. Men baspen quladym.  Jerde jatyp, tura almadym. Anam bólmeden shyǵyp ketti. Qaıtyp kelgende maǵan bólmeni jınastyryp qoıýdy buıyrdy. Óıtpegen jaǵdaıda úıge kelgennen keıin ákem meni jazalaıtynyn aıtty.

Anam ákeme ekilik týraly aıtqanda ákem betimnen uryp jiberdi. Odan keıingisi esimde joq.

Aýrýhanda esimdi jıdym. Qolymnyń saýsaqtaryn sezbeı turdym. Sol kezde terezege qarap, jylap jiberdim. Kóshede balalarmen oınap júrgen analardy kórdim.

Meniń ne úshin jylaǵanymdy bilesińder me?

Sebebi anam meni eshqashan qushaqtaǵan emes. Olar meni tek urady. Men árqashan úıde jaqsy bala bolýǵa tyrystym. Alaıda ata-anam meni jaqsy kóre almady.

Eki kún ótkennen keıin Vaná jaraqattardan aýrýhanada kóz jumdy. Dárigerler onyń qolynda hat taýyp aldy.

«Qymbatty ana men áke!

Meniń osyndaı usqynsyz jáne aqymaq ekenime óte qatty ókinemin. Sol úshin meni jaqsy kóre almaǵandaryń úshin ózime renjip otyrmyn.

Men eshqashan sizderge ashýlanǵan emespin. Men tek anamnyń bir ret bolsa da qushaqtaǵanyn qaladym. Al ákem sırek bolsa da menimen birge oınasa eken dep armandadym.

Men úshin uıalatyndaryńyzdy bilemin. Men eshqashan ...»

Vaná hatyn aıaqtap úlgermedi. Vanányń mahabbatqa toly júregi toqtap qaldy.

Bul hatty árbir ata-ana oqyp, sabaq alsa eken deımiz. Sebebi barlyq bala mahabbatqa laıyq. Ár mınýt, sekýnd saıyn balaǵa zorlyq-zombylyq kórsetiledi. Keıde jaı ǵana qushaqtap oǵan kúsh pen baqyt syılaı alamyz. Birde-bir bala ózin súıikti emes ekenin sezbeýi kerek.

Daıyndaǵan: Ásem Álmuhanbet