Anglıalyq azamat Qazaqstandaǵy ómiri jaıynda, Almatydan góri Astanada ne sebepti turǵysy kelgeni jaıynda, sondaı-aq qazaq halqynyń qonaqjaılylyǵy týrasynda aıtyp berdi. Weproject.kz saıtynyń jarıalaǵan suhbatyn Qamshy aqparattyq agenttigi qazaq tiline aýdaryp, sheteldik azamattyń Qazaqstan jaıly oılaryn oqyrman nazaryna usynady. Oksford qalasynyń týmasy Genrı Manýel 36 jasta. Búgingi tańda Haileybury Astana mektebiniń oqytýshysy.
Astanadaǵy ómir jaıynda
Bul jaqta turyp jatqanyma 3 jyl boldy. Buǵan deıin 2 jyl Pekınde jumys istedim. Sóıtip, Anglıa men Qytaıǵa múldem uqsamaıtyn memlekette ómir súrgim kelip, Qazaqstandy tańdadym. Jumysty ǵalamtordan álem boıynsha muǵalim izdeıtin toptar arqyly taptym. Bul jerdiń adamdary – fantasıka. Ári meni qyzyqtyrǵany, Qazaqstan úzdiksiz damý ústinde.
Astanaǵa tań ata kelgem, kún ystyq edi. Kózime alǵash túskeni keń alqap boldy. Park Inn qonaqúıi mańyndaǵy páterdiń birine ornalastym, sol sebepti qalanyń Oń jaǵalaýynda biraz serýendedim. Sóıtip Sine Tempore saýda ortalyǵynyń kafesinen dámi til úıiretin pıssa jedim.
Men 4 jasar balaqaılarmen jumys isteımin. Baıqaǵanym, Qazaqstanda Anglıaǵa qaraǵanda ata-ana men bala tarapynan muǵalimge degen qurmet erekshe. Máselen, 1 qyrkúıek kúni syılastyq retinde oqýshylar buryn-sońdy kórmegen muǵalimge gúl beredi. Bul kún – olar úshin de, muǵalimder úshin de asa mańyzdy. Gúl syılaý – ata-ana men balanyń muǵalimmen jaqynyraq tanysýy úshin jasaǵan mańyzdy qadamy.
Qazaqstanǵa kóship kelmeı turǵanda, Almatyda biraz kún bolǵanmyn. Kóbisi Almatyny Astanaǵa qaraǵanda kóńildirek deıdi. Tipti ony Ortalyq Azıadaǵy Parıj deıtinder de bar. Biraq Almatynyń Eýropa qalalarynan aıyrmashylyǵy joq, sol sebepti onda turǵym kelgen joq. Maǵan ózge, ǵajaıypqa toly álem kerek boldy.
Qalaǵa tez beıimdeldim. Sýyǵyna da daıyn boldym, orys tilin de azdap meńgergenmin. Basqa qıyndyqtarmen maǵan aınaladaǵy adamdar kómektesti.
Qala jaıynda
Maǵan Esildiń jaǵalaýy unaıdy. Demalys kúnderi mindetti túrde Ortalyq saıabaqtyń jaǵalaýynda 3 saǵattap serýendeıtinmin. Jaz mezgilinde adamdar belsendi, qysta da solaı, jaǵalaýdaǵy muz aıdynynda adamdar tolastamaıdy. Sondaı-aq Oń jaǵalaýda, Respýblıka dańǵyly men Kenesary kóshelerindegi aýdanda serýendegendi jaqsy kóremin. «Artem» bazary da unaıdy.
Meniń bul jerde paıdalanatyn jalǵyz qýlyǵym – kúlkim. Kúlip júrseń, Astananyń adamdary da saǵan jyly shyraı tanytady, isiń de ońǵa basady.
Astanada taksı ustaý da ońaı. Taksıge miný arqyly qyzyqty adamdarmen tanysýǵa bolady.
Men «Kerýen» saýda ortalyǵy ornalasqan aýdanda turamyn, ózime sol aýdan erekshe unaıdy. Biraq, Qytaıǵa qaraǵanda Astanada komýnaldyq qyzmet úshin tólenetin qarjy qymbatyraq.
Kıimdi sırek alamyn. Astanada turǵaly qystyq etik pen ulttyq naqyshtaǵy aıaq-kıim aldym.
Tamaǵy jaıynda
Men jegen tamaqtardyń ishindegi kóńilime jaqqany – qaımaq qosylǵan túshpara men kompot. Sondaı-aq, beshbarmaqty da súıip jeımin, biraq ol kúndelikti jeýge bolatyn taǵam emes.
Káýabyn da aıtpaı ketpeske bolmas. Káýapty jıi jeımin. Mánti, palaý, qýyrdaq, chak-chak, baýyrsaqty jaqsy kóremin. Kóbine London meıramhanasyna, «Daredjanı», «Kafe Selınnıkov», «Vechnoe nebo», Sshaaý Tshmf kofehanasynda tamaqtanamyn.
Maǵan «Astana opera» unaıdy, biraq 4-5 márte ǵana bardym. Qazaqstandyq ánshilerdiń ishinde Ǵalymjan Moldanazardy tyńdaımyn.
Adamdary jaıynda
Qazaqtardy qonaqjaılylyǵy erekshelendirip turady. Maǵan munysy áser etti. Endigi joly maǵan qonaqtar kelgende Anglıadaǵy sekildi bir kese shaımen rıza qylyp qoımaı, olardy toıdyryp biraq jiberemin.
Negizi adamdary dórekileý. Dúken qyzmetshileri men kólik júrgizýshileri urysqaq keledi. Anglıada kerisinshe.
Biraq tez til tabysqysh. Bir kezde qalany eski fotoaparatpen sýretke túsirip júrgenimde bir fotograf janyma kelip, áńgime-dúken quryp ketti, qazir biz jaqsy aralasatyn dostarmyz.
Qazaqstanda salt-dástúr men zamanaýı ómir qashan da ushtasyp turady. Meni tańqaldyratyny osy.
Sholýshy: Gúlim Jaqan
