Óziń týraly jıi oılaımyn. Keıde ózimniń sheshimderim men áreketterime aqyl-keńes qajet bolǵanda endi eshqashan keńes bere almaıtyn adamnan ony kútetinim aqymaqtyq bolyp kórinedi. Basymdaǵy qalǵan estelikter men daýysyńnyń dybysy, eske túsken sózderiń men aqyldaryń meniń áreketterimniń durystyǵyna kúdik keltiretini de aqymaqtyq sıaqty.
Qaıda ekensiń dep boljam jasaımyn. Múmkin joǵaryda kezdesken adamdarmen sóılesip júzińdegi nurly kúlkińdi barshaǵa shashyp júrgen shyǵarsyń.
Taǵy boljaımyn. Maǵan qaraılasyp júrsiń be? Aqymaqtyq jasaǵanda, kúlgende, ǵashyq bolǵanda maǵan qarap bas shaıqap otyrasyń ba? Oılanamyn. Men týraly basqa perishtelerge aıtyp berip júrsiń be? Qandaı kishkentaı qyz bolǵanymdy endi qalaı eresek áıelge aınalyp bara jatqanymdy basqalarǵa aıtyp berdiń be?
Oılanamyn. Eger tiri bolǵanyńda menimen maqtanatyn ba ediń...
Sensiz bul jol maǵan tym aýyr. Seniń qazań tek meni ǵana qynjyltqan joq, bilemin. Tolqyndarǵa qarap otyryp eger sen qazir qasymda bolsań ne dep aıtar ediń, sony oılaımyn.
Múmkin sen maǵan jazýdy jalǵastyr deıtin ba ediń. Jazýyńdy jalǵastyr, úmit ólse de sóziń ólmesin deıtin ba ediń. Múmkin óz tulǵańdy joǵaltpa, mahabbat úshin qatty qapalanba deıtin ba ediń. Nemese meni qolymnan salyp jiberip, Qudaımen kóbirek tildes dep aıtar ma ediń.
Oılaımyn. Men duǵa etkende meni estımisiń, men sharshaǵanda qadamdarymdy baqylaımysyń, meni alǵa júrýge ıtermeleımisiń?
Tún ortasynda jaýynnyń terezege tıgen dybystarynan oıanǵanda taǵy oılaımyn- múmkin meniń qasymda ekenińdi, meni jaqsy kóretinińdi aıtqyń kelip sony osylaı túsindiretin shyǵarsyń.
Men sen týraly jańbyrly keshterde kóp oılaımyn. Kún batys jaq qyzyl araılanyp aspan álemi uıqyǵa ketýge yńǵaılanǵanda sen oıymdasyń.
Árqashan salmaqty, baıypty bolǵanyń esime túsedi. Tipti sońǵy sátterde de...
Keıde meni qatty ashýlandyrǵan kezderiń esime túsedi, bolmashy dúnıelerdi qatty saǵynady ekensiń.
Keıde sen men týraly ne oılap jatyr eken dep sony boljaımyn. Meniń bir bólmelik páterim jaıynda, jınalmaǵan tósegim, shashylyp jatqan qaǵazdarym týraly, men ǵashyq bolǵan er adamdar týraly, qarym-qatynastarym týraly, jazyp júrgen sózderim týraly oılaıtyn bolarsyń.
Eger tiri bolǵanyńda men shyǵarǵan óleń shýmaqtaryn oqıtyn ba ediń ? Seni tiri kezińde qazir jaqsy kórgendeı jaqsy kóre almaǵanym úshin meni keshire alasyń ba, sol týraly oılaımyn.
Seni qanshalyqty jaqsy kóretinimdi qazir túsingen shyǵarsyń. Solaı dep úmittenemin. Tiri bolmasań da, qasymda bolmasań da, menimen maqtana alatyn shyǵarsyń degen úmitim eshqashan óshpek emes...
Aýdarǵan: Nazerke MUSA
